利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
3:1 平安祭ê規定
「伊ê禮物若是謝恩ê祭，á是tùi牛群中獻，無論是公ê á是母ê，tio̍h用無缺點ê獻tī上主ê面前。
3:2 伊tio̍h tī禮物ê頭殼頂hōaⁿ手，tī會幕ê門口kā牠thâi。亞倫kiáⁿ孫做祭司ê，tio̍h用血hiù tī壇ê四箍圍。
3:3 Tùi謝恩祭ê中間，tio̍h kā火祭獻hō͘上主，用蓋腹內ê油kah腹內所有ê油，
3:4 以及兩粒腰子kah in所有ê油，to̍h是óa近腰雙pêng ê油kah肝裡ê網紗，以及腰子，全部the̍h起來。
3:5 亞倫ê kiáⁿ孫tio̍h kā它燒tī壇裡燒祭ê頂面，to̍h是tī火裡ê柴，這是獻hō͘上主做芳芳ê火祭。
3:6 「伊ê禮物做謝恩ê祭獻hō͘上主ê，若是tùi羊群中，á是公ê，á是母ê，tio̍h用無缺點ê。
3:7 若獻一隻羊á-kiáⁿ做禮物，tio̍h tī上主ê面前獻。
3:8 Mā tio̍h tī伊ê禮物ê頭殼頂hōaⁿ手，tī會幕前kā牠thâi。亞倫ê kiáⁿ孫tio̍h kā牠ê血hiù tī壇ê四箍圍。
3:9 Tùi謝恩祭ê中間，tio̍h kā火祭獻hō͘上主，hit中間ê油kah牠全部肥ê羊尾tio̍h tùi óa近脊骨ê所在the̍h起來，蓋腹內ê油kah腹內所有ê油mā tio̍h the̍h起來，
3:10 以及兩粒腰子kah in所有ê油，to̍h是óa近腰雙pêng ê油、肝裡ê網紗kah腰子，一概lóng tio̍h the̍h起來。
3:11 祭司tio̍h tī壇頂kā它燒，這是獻hō͘上主做火祭ê食物。
3:12 「伊ê禮物若是山羊，tio̍h tī上主ê面前獻。
3:13 Tio̍h tī牠ê頭殼hōaⁿ手，tī會幕前kā牠thâi。亞倫ê kiáⁿ孫tio̍h kā血hiù tī壇ê四箍圍。
3:14 伊tio̍h tùi這獻伊ê禮物做火祭hō͘上主。
3:15 用蓋腹內ê油kah腹內所有ê油，以及兩粒腰子kah in所有ê油，to̍h是óa近腰雙pêng ê油kah肝頂面ê網紗，以及腰子，一概the̍h起來。
3:16 祭司tio̍h tī壇頂kā它燒，做芳芳ê火祭ê食物。油lóng是上主ê。
3:17 Tī lín所有tòa ê所在，油kah血lóng m̄ thang食，這beh做lín ta̍k世代永遠定tio̍h ê例。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。