利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
2:1 素祭ê規定
「若有人獻素祭做禮物hō͘上主，tio̍h用幼ê麵粉做伊ê禮物，tio̍h thîn油tī hit頂面，hē乳香tī hit頂面。
2:2 帶到亞倫ê kiáⁿ孫做祭司ê hia，伊to̍htui3幼ê麵粉中取一把出來，kah淡薄á油，以及所有ê乳香，祭司to̍h kā它燒tī壇頂做記念，是獻hō͘上主做芳芳ê火祭。
2:3 素祭所chhun落來ê，tio̍h歸hō͘亞倫kah伊ê kiáⁿ孫；這是獻hō͘上主火祭中做至聖ê。
2:4 「你若帶火爐所煏ê禮物做素祭，tio̍h用幼麵粉ê無酵餅，用油調和ê á是用油抹ê無酵ê薄餅。
2:5 若用煎盤煎ê禮物做素祭，to̍h tio̍h用調和油ê無酵幼麵粉。
2:6 Tio̍h peh kui塊，thîn油tī頂面，這是素祭。
2:7 若用鼎煮ê禮物做素祭，to̍h tio̍h用油kah幼麵粉做。
2:8 Tio̍h kā chiahê物做素祭，帶到上主ê面前，交帶祭司，hō͘伊帶到壇前。
2:9 祭司tio̍h tùi素祭中the̍h出做記念ê，燒tī壇頂，這是獻hō͘上主做芳芳ê火祭。
2:10 素祭所chhun落來ê tio̍h歸hō͘亞倫kah伊ê kiáⁿ孫，這是獻hō͘上主ê火祭中做至聖ê。
2:11 「見若lín獻hō͘上主ê素祭，lóng m̄ thang用酵來做，因為酵kah蜜lín lóng m̄ thang燒來做火祭，獻hō͘上主。
2:12 Chiahê物lín tio̍h獻hō͘上主，做起頭熟ê禮物，總是，m̄ thang khǹg tī壇頂燒來做芳味。
2:13 見若獻做素祭ê禮物，lóng tio̍h用鹽調和；tī你素祭ê頂面m̄ thang欠缺lín ê上帝所立約ê鹽。你一切ê禮物，lóng tio̍h配鹽來獻。
2:14 若用起頭成熟ê物做素祭，獻hō͘上主做禮物，tio̍h用新ê穗，to̍h是過碾、過烘ê好五穀，獻來做lín起頭成熟ê素祭。
2:15 Mā tio̍h thîn油tī hit頂面，hē乳香tī hit頂面，這是素祭。
2:16 祭司tio̍h kā hit中間做記念ê，to̍h是過碾ê穗一份，kah油一份，以及一切ê乳香，lóng kā它燒，這是獻hō͘上主ê火祭。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。