出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
40:1 Tio̍h起聖幕
上主吩咐摩西講：
40:2 「正月初一，你tio̍h起聚集用ê會幕。
40:3 你tio̍h kā法櫃hē tī hit內面，用帳簾kā它遮閘。
40:4 扛桌入去，排設頂面ê物。扛燈台入去，點它ê燈。
40:5 扛燒香ê金壇，hē tī法櫃前，掛會幕門ê門簾。
40:6 Kā燒祭ê壇，hē tī聚集ê會幕門前。
40:7 Kā洗盪ê盆，hē tī會幕kah壇ê中間，貯水tī盆內。
40:8 Koh tī四箍圍khiā埕帷，掛埕門ê門簾。
40:9 「用油抹會幕kah其中所有ê器具來分別做聖，它to̍h成做聖。
40:10 Koh抹燒祭ê壇kah它所有ê器具，kā壇分別做聖，壇to̍h成做至聖。
40:11 Mā tio̍h抹洗盪ê盆，kā它分別做聖。
40:12 「Koh tio̍h chhōa亞倫kah伊hiahê kiáⁿ，來到會幕門前，用水kā in洗。
40:13 Mā kā亞倫穿聖衫，koh用油kā伊抹，kā伊分別做聖，hō͘伊做祭司來服事我。
40:14 Koh chhōa伊hiahê kiáⁿ來，kā in穿內袍。
40:15 Tio̍h kā in抹油，親像抹in老父相siâng，hō͘ in做祭司來服事我。In受抹油beh永遠做祭司，到ta̍k世代。」
40:16 摩西ánne行，lóng是照上主所吩咐伊ê來行。
40:17 第二年正月初一，會幕to̍h khiā起來。
40:18 摩西khiā會幕hē hiahê臼，khiā hiahê板，穿（chhng）hiahê橫栱，khiā hiahê柱。
40:19 Tī會幕頂搭布棚，kā布棚ê蓋（kòa）蓋（khàm）tī它ê頂面，是照上主所吩咐摩西ê。
40:20 Koh kā律法hē tī櫃內，用槓穿tī櫃裡，kā施恩所hē tī櫃頂。
40:21 扛櫃入來會幕，掛帳簾來遮閘（jia-cha̍h）法櫃，是照上主所吩咐摩西ê。
40:22 Koh kā桌á hē tī會幕內，hē tī會幕ê北pêng，hē tī帳簾ê外面。
40:23 Hit頂面用餅排tī上主ê面前，是照上主所吩咐摩西ê。
40:24 Koh hē燈台tī會幕內，kah桌á相對，tī會幕ê南pêng。
40:25 Tī上主ê面前點燈，是照上主所吩咐摩西ê。
40:26 Koh hē金壇tī會幕內ê帳簾前，
40:27 tī hit頂面燒芳料ê香，是照上主所吩咐摩西ê。
40:28 Koh掛會幕門ê門簾。
40:29 Tī聚集ê會幕門前，hē燒祭ê壇，kā燒祭kah素祭獻tī hit頂面，是照上主所吩咐摩西ê。
40:30 Kā洗盪ê盆hē tī會幕kah壇ê中間，盆內貯水，thang洗盪。
40:31 摩西kah亞倫kah伊hiahê kiáⁿ，tī hia洗手、洗腳。
40:32 In入去會幕ê時，á是來到壇ê時就洗，是照上主所吩咐摩西ê。
40:33 Tī會幕kah壇ê四箍圍khiā帳帷，mā掛帳帷門ê門簾，ánne摩西就完工。
40:34 雲遮蓋會幕
(民9：15-23)
Hit時，雲遮蓋會幕，上主ê榮光充滿會幕。
40:35 摩西bē tàng入去會幕，因為雲停tī hit頂面，koh有上主ê榮光充滿tī會幕。
40:36 雲tùi會幕收tńg去ê時，以色列人to̍h出發行in ê路程。
40:37 雲若無收tńg去，in to̍h無出發行路，一直到雲收tńg去。
40:38 日時，上主ê雲tī會幕頂；暗時hit中間有火，tī以色列全家ê目chiu 前。Tī in所行ê路程lóng是ánne。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。