出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
39:1 In用藍色、紫色、朱紅色ê料做手工幼ê衫褲，tī聖所穿來服事，koh kā亞倫做聖衫，是照上主所吩咐摩西ê。
39:2 伊用金kah藍色、紫色、朱紅色ê料kah過紡ê幼苧，做祭司服。
39:3 In kā金搥做薄片，剪做線，chham tī藍色、紫色、朱紅色ê料kah幼苧用奇巧ê工夫做ê。
39:4 Koh kā伊做披肩來kā它連做伙，hō͘它雙pêng相連。
39:5 Hit頂面用奇巧ê工夫所織ê帶，所用來縖ê，kah祭司服相siâng ê做法，kah它連做一塊，用金kah藍色、紫色、朱紅色ê料kah過紡ê幼苧來做，照上主所吩咐摩西ê。
39:6 Koh琢（tok）紅瑪瑙入tī金槽裡，照刻印ê方法，tī hit頂面刻以色列hiahê kiáⁿ ê名；
39:7 安置tī祭司服ê披肩，為以色列人做記念石，照上主所吩咐摩西ê。
39:8 造捕褂
(出28：15-30)
伊用奇巧ê師傅ê手工做捕褂，kah祭司服相siâng ê做法，用金kah藍色、紫色、朱紅色ê料以及過紡ê幼苧做ê。
39:9 捕褂是四方ê，拗做雙重，長一掠，闊一掠，是雙重ê。
39:10 頂面鑲寶石四chōa，一chōa是紅寶石、黃玉kah紅玉，這是第一chōa。
39:11 第二chōa是綠寶石、，藍寶石kah金剛石。
39:12 第三chōa是紫色ê瑪瑙、白色ê瑪瑙kah紫色ê水晶。
39:13 第四chōa是綠玉、紅瑪瑙kah碧玉，chiahê lóng鑲tī金槽內。
39:14 Chiahê寶石照以色列ê kiáⁿ ê名，共十二塊，親像刻印，每塊刻一个名，為tio̍h十二支族來ánne做。
39:15 In用純金phah鍊á，親像索á，安置tī捕褂。
39:16 In koh做兩 个金槽kah兩 个金環，kā chit兩 个環安置tī捕褂ê雙頭。
39:17 Kā所phah hit兩條金鍊á，連tī雙頭ê兩 个環。
39:18 用所phah兩條鍊á ê雙頭，連tī兩 个槽，安置tī祭司服披肩ê頭前。
39:19 做兩 个金環，hē tī捕褂雙頭ê墘（kîⁿ），óa祭司服ǹg內hit-pêng。
39:20 Koh做兩 个金環，安置tī祭司服披肩下面ê頭前，óa近相連ê所在，tī祭司服用奇巧ê工夫所織ê帶ê頂面。
39:21 In用藍色ê幼帶，kā捕褂ê環kah祭司服ê環縛相連，hō͘它連tī祭司服用奇巧ê工夫所織ê帶，hō͘捕褂kah祭司服無離縫，是照上主所吩咐摩西ê。
39:22 製造祭司ê其他聖服
(出28：31-43)伊用織布ê工夫做祭司服內面ê外袍，kui領是藍色。
39:23 袍ê對中做一个領孔，孔ê四箍圍織領緣，親像戰甲ê領孔，免得破裂。
39:24 袍ê下腳pô͘，用藍色、紫色、朱紅色ê料kah過紡ê幼苧，做石榴形ê裝飾。
39:25 Koh用純金做銜鈴，用銜鈴kâⁿ石榴，hē tī袍ê四箍圍下腳pô͘，石榴ê中間；
39:26 一粒銜鈴，一粒石榴，一粒銜鈴，一粒石榴，tī袍四箍圍ê下腳pô͘，thang穿來服事，是照上主所吩咐摩西ê。
39:27 In用織成ê幼苧布，kā亞倫kah伊hiahê kiáⁿ做內衫。
39:28 Mā做幼苧布ê帽á kah幼苧布súi-súi包頭殼ê巾，用過紡ê幼苧布做褲。
39:29 Koh用過紡ê幼苧，kah藍色、紫色、朱紅色ê料，用繡花ê手工做腰帶，是照上主所吩咐摩西ê。
39:30 In用純金做聖ê冕旒ê牌，照刻印ê方法，刻字tī hit頂面，ánne寫：「做聖歸上主」。
39:31 Koh用藍色ê帶，kā牌縛tī帽á頂，是照上主所吩咐摩西ê。
39:32 聖幕完工
(出35：10-19)
就ánne，聚集ê會幕一切ê工lóng做完了後，所有上主所吩咐摩西ê，以色列人lóng照ánne做。
39:33 In送到摩西hia，to̍h是會幕、布棚kah所有ê器具，它ê鉤、板、栱、柱、臼，
39:34 染紅羊káng皮ê蓋，海狗皮ê蓋 kah遮閘ê帳簾，
39:35 法櫃kah它ê槓，kah施恩所，
39:36 桌á kah它所有ê器具，kah排列ê餅，
39:37 純金ê燈台kah它ê燈盞，to̍h是排列ê燈盞kah伊所有ê器具，kah點光ê油，
39:38 金壇，抹ê油，香ê芳料，布棚門ê門簾，
39:39 銅壇kah它ê銅ê燈柵，它ê槓kah它所有ê器具，洗盪ê盆kah它ê座，
39:40 埕ê帳帷kah它ê柱，它ê臼，埕門ê門簾，用ê索，釘（tèng）ê釘，以及布棚kah會幕內所有做路用ê器具，
39:41 手工幼ê衫褲，tī聖所穿來服事，kah祭司亞倫ê聖衫，以及伊ê kiáⁿ ê衫，做祭司來服事。
39:42 以色列人照上主所吩咐摩西一切ê話，做一切ê工。
39:43 摩西看tio̍h一切ê工，你看，in已經做成，照上主所吩咐ê，in照ánne做，摩西to̍h kā in祝福。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。