約翰福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權) 客語 現代客語 福州話 粵語和合本 希臘文(WH-NT) 下載檔案 關於語音聖經
17:1 耶穌ê祈禱
耶穌講chiahê話了後,gia̍h頭ǹg天,講:「天父ah,時已經到à。願祢榮耀祢ê Kiáⁿ,thang hō͘ Kiáⁿ mā ē tàng榮耀祢。
17:2 祢有kā統治萬民ê權柄賞賜hō͘ Kiáⁿ,hō͘祂ē tàng kā永遠ê活命賞賜hō͘所有祢交帶祂ê人。
17:3 永遠ê活命to̍h是:認bat祢是獨一真ê上帝,koh認bat祢所差派來ê耶穌基督。
17:4 我已經tī地chiūⁿ完成祢交帶我做ê工作來榮耀祢à。
17:5 天父ah,taⁿ求祢hō͘我tī祢ê面前得tio̍h榮耀,to̍h是創造世間以前我kah祢做伙有ê榮耀。
17:6 「祢tùi世間揀選出來hō͘我ê人,我已經有kā祢ê名對in顯明。In原本是祢ê,祢kā in賞賜hō͘我,in mā已經有遵守祢ê道理。
17:7 Taⁿ in知祢hō͘我ê ta̍k項lóng是tùi祢來ê。
17:8 因為我有kā祢hō͘我ê信息傳hō͘ in。In有接受hiahê信息,mā確實知我是tùi祢hia來,koh相信是祢差派我來。」
17:9 「我為tio̍h in對祢祈求,m̄是為tio̍h世間求,是為tio̍h祢hō͘我ê人來求,因為in是祢ê。
17:10 我ê一切lóng是祢ê,祢ê一切mā lóng是我ê。我koh有通過in得tio̍h榮耀。
17:11 Taⁿ我無koh tiàm tī世間,in iáu tī世間。聖ê天父ah,願祢用祢ê名,to̍h是祢hō͘我ê,來保守in,thang hō͘ in成做一體,親像咱是一體。
17:12 我kah in做伙ê時,bat奉祢ê名,to̍h是祢hō͘我ê,來保守in。除了hitê註定沉淪ê人以外,我mā有照顧in,hō͘ in lóng無沉淪,ánne是beh hō͘經典ê話得tio̍h應驗。
17:13 Taⁿ我beh去祢hia;我iáu tiàm世間ê時講ê chiahê話,是beh hō͘ in心內充滿我ê歡喜。
17:14 我有kā祢ê道理傳hō͘ in;世間怨恨in,因為in無koh屬chit世間,親像我無屬chit世間。
17:15 我m̄是求祢chhōa in離開chit世間,是求祢保守in脫離hitê邪惡。
17:16 In無koh屬chit世間,親像我無屬chit世間。
17:17 求祢用真理kā in聖化;祢ê話to̍h是真理。
17:18 親像祢有差派我入世間,我mā有差派in入世間。
17:19 Taⁿ我為tio̍h in來聖化我kakī hō͘祢用,thang hō͘ in mā ē tàng通過真理來聖化in kakī hō͘祢用。
17:20 「我m̄ nā為tio̍h chiahê人祈求,mā為tio̍h tùi chiahê人所傳ê道理來信我ê人祈求,
17:21 thang hō͘ in lóng成做一體。天父ah,親像祢tiàm tī我內面,我tiàm tī祢內面,求祢hō͘ in mā ánne tiàm tī咱內面,thang hō͘世間相信是祢差派我來ê。
17:22 祢hō͘我ê榮耀,我mā有hō͘ in,thang hō͘ in成做一體,親像咱是一體。
17:23 我tī in內面,祢tī我內面,是beh hō͘ in ē tàng完全成做一體,thang hō͘世間知是祢差派我,mā知祢有疼in親像祢有疼我。
17:24 「天父ah,祢交帶我hiahê人,我無論tī tó位lóng ài in kah我做伙,thang hō͘ in看tio̍h祢賞賜我ê榮耀,因為祢tī創造世間以前to̍h已經疼我。
17:25 公義ê天父ah,世間m̄ bat祢,獨獨我bat祢。Chiahê人mā知祢有差派我。
17:26 我已經有hō͘ in bat祢ê名,mā beh繼續指示in,thang hō͘祢對我ê疼tī in內面,我mā tī in內面。」
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。