約翰福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
5:1 耶穌醫好破病三十八年ê人
Chiahê tāichì了後，有偤太人ê節期，耶穌to̍h tńg去耶路撒冷。
5:2 Tī耶路撒冷，近羊門ê所在有一个池，希伯來話叫做Bia̍t-su-tá，tī hia有五個門廊。
5:3 有真chē病人倒tī門廊內面，有chheⁿmê ·ê、跛腳ê、半遂ê，
5:4 in teh等水振動。有時主ê天使會落來池裡kā水phah振動，水振動了後，頭一个落去ê人，無論啥物病lóng ē好去。(註：有ê抄本ke chit節)
5:5 Tī hia有一个破病三十八年ê人。
5:6 耶穌看tio̍h伊倒tī hia，知影伊已經破病真久，to̍h óa去kā伊講：「你有ài你ê病好起來無？」
5:7 Hitê病人應講：「先生ah，水振動ê時，無人thang扶我落池；我想beh落去ê時，別人已經比我先落去à。」
5:8 耶穌kā伊講：「起來，giâ你ê舖á起來行。」
5:9 Hitê人隨時好去，就giâ伊ê舖á起來行。Hit日是安息日，
5:10 偤太人to̍h kā得tio̍h醫好ê人講：「今á日是安息日，你giâ舖á是無合律法。」
5:11 Hitê人應講：「Hitê kā我醫好ê人kā我講：『Giâ你ê舖á起來行。』」
5:12 Hiahê偤太人問伊講：「Kā你講：『Giâ舖á起來行。』ê是啥人？」
5:13 Hitê得tio̍h醫好ê人m̄知祂是啥人，因為有真chē人tī hia，而且耶穌mā已經恬恬á離開hia。
5:14 後來，耶穌tī聖殿tú tio̍h hitê人，to̍h kā伊講：「你ê病已經好à，m̄ thang koh犯罪，你chiah bē tú tio̍h koh khah慘ê tāichì。」
5:15 Hitê人to̍h去kā偤太人講：醫好伊ê人to̍h是耶穌。
5:16 為tio̍h ánne，偤太人開始迫害耶穌，因為祂tī安息日kā人醫病。
5:17 耶穌應講：「我ê天父繼續teh做工，我mā是ánne teh做工。」
5:18 所以，偤太人koh khah想beh害死耶穌，因為祂m̄ nā犯tio̍h安息日ê規定，koh稱上帝做祂ê天父，看kakī kah上帝平等。
5:19 上帝ê Kiáⁿ ê權柄
耶穌to̍h應講：「我實在kā lín講，Kiáⁿ bē tàng照kakī ê意思做tāichì，tio̍h照天父án怎做去做，因為天父所做ê，Kiáⁿ mā照ánne去做。
5:20 因為天父疼Kiáⁿ，所以，kā kakī 所做ê lóng kā Kiáⁿ指示，mā ē kā比chiahê koh khah大ê tāichì指示Kiáⁿ，beh hō͘ lín感覺奇怪。
5:21 父hō͘死人koh活，賞賜hō͘ in活命；親像ánne，Kiáⁿ mā beh kā活命賞賜hō͘祂所意愛ê人。
5:22 天父lóng無kā人審判，祂kā審判ê權柄lóng交帶Kiáⁿ。
5:23 Án-ne是beh hō͘眾人lóng尊敬Kiáⁿ ná親像尊敬天父；無尊敬Kiáⁿ ê人，to̍h是無尊敬差派祂來ê天父。
5:24 「我實在kā lín講，聽我ê話，mā信hit位差派我ê人to̍h有永遠ê活命，伊m̄免受審判，已經出死入活ā。
5:25 我實在kā lín講，時teh beh到，現在to̍h是à。死人ē聽tio̍h上帝ê Kiáⁿ ê聲，聽tio̍h ê人to̍h ēkoh活起來。
5:26 因為天父本身是活命ê根源，祂mā是ánne hō͘ Kiáⁿ成做活命ê根源。
5:27 Koh因為Kiáⁿ是人子，天父已經kā 審判ê權柄hō͘ Kiáⁿ。
5:28 Lín m̄ thang感覺chitê tāichì奇怪，因為時teh beh到，所有tī墓裡ê死人ē聽tio̍h Kiáⁿ ê聲，tùi墓裡出來。
5:29 做好ê人ēkoh起來得tio̍h活命，做pháiⁿ ê人ēkoh起來受審判定罪。
5:30 「我kakī bē tàng做啥物，我照所聽tio̍h ê來審判。我ê審判公正，因為我無照kakī ê意思，是遵照差派我來ê hit位ê旨意。」
5:31 為耶穌做證
「我若為kakī 做見證，我ê見證to̍h無真實。
5:32 有另外一个人teh為我做見證，我知伊為我所做ê見證是真實。
5:33 Lín bat派人去見約翰，伊有為真理做見證。
5:34 其實我無需要人為我做見證，我講起chiahê tāichì是beh hō͘ lín得tio̍h救。
5:35 約翰是一葩teh to̍h teh照光ê燈，lín歡喜暫時享受伊ê光。
5:36 總是，我有比約翰khah有力ê見證，因為天父所交帶我來完成ê tāichì，to̍h是我所teh做chiahê工作，ē tàng見證我是天父所差派來ê。
5:37 差派我來ê天父mā bat 為我做見證，lín iáu m̄ bat聽tio̍h祂ê聲，mā m̄ bat看tio̍h祂ê形像。
5:38 Lín無kā祂ê話khǹg tī心內，因為lín m̄信祂差派來ê hit位。
5:39 Lín研究chiahê經典，因為lín想講hit中間chhōeē tio̍h永遠ê活命。其實to̍h是chiahê經典teh為我做見證；
5:40 總是，lín iáu koh無beh來我chia得tio̍h活命。
5:41 我m̄是teh ài人oló。
5:42 總是，我bat lín bat kah有chhun，lín根本無疼上帝ê心。
5:43 我奉我ê天父ê名來，lín無beh接納我；若有別人奉kakī ê名來，lín顛倒kā伊接納。
5:44 Lín大家互相ài oló來oló去，m̄求tùi獨一上帝來ê oló，ánne，lín ná ē信我？
5:45 M̄-thang想講我ētī天父ê面前控告lín；teh控告lín ê是lín所仰望ê摩西。
5:46 Lín若真正有信摩西，mā ē信我，因為伊有記載我ê tāichì。
5:47 伊寫ê冊lín都m̄信，ná ē信我ê話？」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。