約翰福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
3:1 耶穌kah尼哥底摩
有一个法利賽派ê人，名叫做尼哥底摩，是偤太人ê官。
3:2 有一暗，伊來對耶穌講：「老師，阮知祢是上帝差來ê教師，因為若m̄是有上帝同在，無人ē tàng行祢所行ê神跡。」
3:3 耶穌應講：「我實在kā你講，人若無重頭生，to̍h bē tàng看tio̍h上帝國度。」
3:4 尼哥底摩問講：「人已經老ā，ná ē重頭生？Kám ē tàng koh入去老母ê腹肚來重頭生？」
3:5 耶穌應講：「我實在kā你講，人若無tùi水kah聖神來重頭生，to̍h bē tàng入去上帝國度。
3:6 Tùi肉體生ê是肉體；tùi聖神生ê是聖神。
3:7 M̄-thang因為我講：『Lín tio̍h重頭生』來感覺奇怪。
3:8 風beh吹去tó位就吹去tó位，你有聽tio̍h聲，m̄知它tùi tó位來，beh tùi tó位去。Ta̍k個 tùi聖神來出世ê人mā是ánne。」
3:9 尼哥底摩問講：「Náē發生chit款tāichì？」
3:10 耶穌應講：「你做以色列ê教師，連這都m̄知，是無？
3:11 我實在kā你講，阮講阮所知ê，見證阮所看tio̍h ê，m̄ koh，lín m̄接納阮ê見證。
3:12 我kā lín講chit世間ê tāichì，lín都m̄信；我若kā lín講天頂ê tāichì，lín ná ē beh信？
3:13 Tùi天降臨ê人子以外，無人bat上天。
3:14 親像摩西tī曠野舉起銅蛇，人子mā一定tio̍h ánne受舉起，
3:15 thang hō͘每一个信祂ê人得tio̍h永遠ê活命。
3:16 上帝chiahni̍h疼世間，甚至賞賜獨生Kiáⁿ，hō͘所有信祂ê人bē沉淪，反tńgē得tio̍h永遠ê活命。
3:17 因為上帝差祂ê Kiáⁿ來世間，m̄是beh審判世間，是beh通過祂來拯救世間。
3:18 信祂ê人bē受審判，m̄信祂ê人已經受定罪，因為伊m̄信上帝ê獨生Kiáⁿ。
3:19 上帝kā in定罪是因為：光進入世間，世間khah ài烏暗，khah無ài光明，因為in ê行為邪惡。
3:20 做pháiⁿ ê人怨恨光，mā m̄接近光，ánne，伊ê pháiⁿ行為chiah bē露現出來。
3:21 獨獨遵照真理ê人來就近光，是beh顯明伊ê行為是遵照上帝ê旨意。」
3:22 行洗禮約翰ê最後見證
Chiahê tāichì以後，耶穌kah門徒到偤太地區，kah in做伙tòa hia，kā人洗禮。
3:23 約翰mā tī撒冷附近ê Ai-nóng teh kā人洗禮，因為tī hia有真chē水，眾人來hia hō͘伊洗禮。
3:24 Hit時，約翰iáu未hō͘人關落監。
3:25 有一kóa約翰ê門徒kah一个偤太人，為tio̍h潔淨ê禮儀teh辯論。
3:26 In來kā約翰講：「老師，你看，早前tī約旦河東岸kah你做伙，你為祂做證ê hit位，chitmá祂teh kā人洗禮，群眾lóng去祂hia。」
3:27 約翰應講：「若m̄是天賞賜，人bē tàng做啥物。
3:28 我bat講，我m̄是基督，只不過是受派來做祂ê先鋒。Chitê tāichì，lín本身是我ê見證。
3:29 娶新娘ê是新郎，新郎ê朋友khiā tī邊á聽tio̍h新郎ê聲to̍h非常歡喜，所以，我滿心大歡喜。
3:30 祂一定ēná興旺，我一定ēná衰微。」
3:31 Tùi天頂來ê
「Tùi頂面來ê，是tī萬物ê頂面；tùi地chiūⁿ來ê是屬地chiūⁿ，mā lóng講地chiūⁿê tāichì。Tùi天頂來ê，是tī萬物ê頂面。
3:32 祂為tio̍h所聽tio̍h kah所看tio̍h ê來做見證，mā無人接納祂ê見證。
3:33 接納祂ê見證ê人，見證上帝是真實ê。
3:34 上帝所差遣ê hit位講上帝ê話，因為上帝無限量賞賜聖神hō͘祂。
3:35 父疼Kiáⁿ，已經kā 一切交tī祂ê手頭。
3:36 信Kiáⁿ ê人有永遠ê活命；m̄順服Kiáⁿ ê人，m̄ nā bē tàng得tio̍h活命，反tńgē hō͘上帝tiāⁿ-tiāⁿ 受氣。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。