出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
34:1 第二塊石碑
(申10：1-5)
上主對摩西講：「你phah兩塊石碑，kah以前ê仝款，你前所phah破hiahê碑hit頂面ê字，我ēkoh寫tī chiahê碑。
34:2 明á早起，你tio̍h準備便，透早你tio̍h上西奈山，tī hia，tī山尾溜，khiā tī我面前。
34:3 M̄-thang有人kah你做伙來，遍山lóng m̄ thang看tio̍h有人，tī山腳mā m̄ thang hō͘牛群、羊群食草。」
34:4 上主就phah兩塊石碑，kah以前ê仝款。摩西透早起來，照上主所吩咐伊ê，上去西奈山，手裡the̍h hit兩塊石碑。
34:5 上主坐雲臨到，kah伊khiā tī hia，宣布祂ê名—耶和華。
34:6 上主tùi伊ê面前經過，宣布講：「上主，上主，是有憐憫koh有恩典ê上帝，無快受氣，koh有豐盛ê慈愛kah誠實，
34:7 為千萬人存慈愛，赦免罪過、過失kah罪惡，絕對無掠有罪ê做無罪，會歸咎伊ê罪，tùi父到kiáⁿ，到孫，到三四代。」
34:8 摩西趕緊àⁿ落地敬拜，講：
34:9 「主ah，我若tī祢ê面前得tio̍h恩典，求主tī阮中間kah阮做伙行，因為chiahê是頷頸硬ê人民。Koh求祢赦免阮ê罪過kah阮ê罪惡，掠阮做祢ê產業。」
34:10 重新立約
(出23：14-19；申7：1-5；16：1-17)
上主講：「你看，我beh重新立約，beh tī lín眾人ê面前行奇妙ê tāichì，是天下萬國中所m̄ bat行ê。Τī你四箍圍ê眾人to̍h ē看tio̍h上主ê所做，因為我對你所行ê是thang驚ê tāichì。
34:11 「我今á日所吩咐你ê，你tio̍h執守。你看，我beh tùi你ê面前趕出亞摩利、迦南、赫、比利洗、希未kah耶布斯 hiahê族。
34:12 你kakī tio̍h謹慎，m̄ thang kah tòa tī你所去hit所在 ê人民立約，恐驚he會成做lín中間ê羅網。
34:13 Lín tio̍h拆in ê祭壇，phah碎in雕刻ê柱，剉in ê亞舍拉。
34:14 「M̄-thang敬拜別个神明，因為上主ê名叫做獨尊，祂是獨尊ê上帝。
34:15 恐驚你kah tòa tī hit所在ê人民立約，in tòe in ê神明行邪淫，祭祀in ê神明，有人叫你，你就食伊ê祭物，
34:16 koh恐驚你kā你ê kiáⁿ娶in ê chabó͘ kiáⁿ做bó͘，in ê chabó͘ kiáⁿ tòe in ê神明行邪淫，hō͘你ê kiáⁿ mā tòe in ê神明行邪淫。
34:17 「你m̄ thang為kakī 鑄造chiahê神明。
34:18 「你tio̍h守除酵節，照我所吩咐你ê，tī亞筆月內所定tio̍h ê日期，食無酵餅七日，因為你tī亞筆月內出埃及。
34:19 「見若頭胎ê lóng是我ê，所有ê chengseⁿ頭水ê，無論是牛á是羊，公ê lóng是我ê。
34:20 頭水ê驢tio̍h用羊á替贖，若無替贖，to̍h tio̍h 摃斷牠ê頷頸。見若你頭chiūⁿ ê kiáⁿ lóng tio̍h贖回。「人來見我m̄ thang空手。
34:21 「你六日tio̍h做工，第七日tio̍h安息，tī栽種收割ê時mā tio̍h安息。
34:22 「麥起頭熟收割ê時，tio̍h守七七日節。Koh tī年尾，tio̍h守收藏 ê節。
34:23 「Lín所有ê chapo͘丁tio̍h一年三pái來見至koân上主—以色列ê上帝。
34:24 我beh tùi你ê面前趕出外邦人，擴展你ê地界。你一年三pái上去見你ê上主ê時，一定無人貪你ê土地。
34:25 「你m̄ thang kā我ê牲禮ê血chham有酵ê物來獻，Pôaⁿ過節ê祭物mā m̄ thang留到隔工早起。
34:26 「地裡siōng起頭熟ê物tio̍h送到上主—你ê上帝ê厝，煮山羊á m̄ thang用牠ê老母ê奶。
34:27 上主對摩西講：「你tio̍h寫chiahê話，因為我是照chiahê話kah你以及以色列立約。
34:28 摩西kah上主tī hia四十工四十暝，無食餅無lim水。祂kā chitê約ê話，to̍h是十條誡，寫tī兩塊碑。
34:29 摩西落山
摩西落西奈山ê時；伊ê手the̍h兩塊約碑，伊落山ê時，伊ê面因為上主kah伊講話，就射出光，摩西kakī m̄知。
34:30 亞倫kah以色列人民看tio̍h摩西ê時，你看，伊ê面射出光，in to̍h驚，m̄敢óa近伊。
34:31 摩西叫in來，亞倫kah會眾中chiahê頭人to̍h lóng倒tńg到伊hia，摩西to̍h kah in講話。
34:32 然後以色列人民lóng進前來，摩西to̍h kā上主tī西奈山kah伊所講一切ê話，lóng kā in吩咐。
34:33 摩西kah in講話了後，to̍h用帕罩面。
34:34 總是，摩西入去上主ê面前kah祂講話，帕就掀起來，一直到伊出來。伊出來ê時，to̍h kā上主所吩咐ê話對以色列人講。
34:35 以色列人看tio̍h摩西ê面，摩西ê面射出光，摩西koh用帕罩面，thèng候到伊入去kah上主講話，帕就掀起來。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。