出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
30:1 燒香ê壇
(出37：25-28)
「你tio̍h用皂莢柴做一座壇，thang來燒香。
30:2 長一肘，闊一肘，四角形ê款式，高兩肘，它hiahê角tio̍h kah壇連做伙。
30:3 壇kah它ê頂面，kah它ê四箍圍，kah它hiahê角，lóng用純金來包，mā tio̍h tī它ê四箍圍做金線齒。
30:4 你tio̍h做兩 个金環安置tī齒線ê下面，tio̍h做tī壇ê雙pêng，兩支橫桿ê頂面，chiahê環tio̍h做穿槓ê路用thang扛壇。
30:5 Tio̍h用皂莢柴做槓，用金來包。
30:6 你tio̍h kā壇hē tī óa近法櫃ê帳簾前，tī法櫃頂施恩所ê頭前，to̍h是我beh kah你相會ê所在。
30:7 亞倫tī壇頂tio̍h燒芳料所做ê香，ta̍k早起伊整頓燈ê時tio̍h燒香。
30:8 到黃昏，亞倫點燈ê時，mā tio̍h燒香，是做lín ta̍k世代tī上主ê面前tiāⁿ-tiāⁿ 燒ê香。
30:9 Tī chitê壇頂，m̄ thang獻別種ê香，mā m̄ thang獻燒祭kah素祭，mā m̄ thang灌奠tī它ê頂面。
30:10 亞倫tio̍h一年一pái tī壇頂ê角贖罪，伊一年一pái tio̍h用贖罪祭ê血tī壇頂贖罪，ta̍k世代tio̍h ánne做。Chitê壇tī上主ê面前做至聖。
30:11 上主聖幕ê稅捐
上主吩咐摩西講：
30:12 「你做以色列人ê人口調查，照in中間有資格ê登記，你teh算ê時，in ta̍k人tio̍h為tio̍h kakī ê性命用贖回ê價錢獻hō͘上主，免得你teh算ê時，tī in中間有災禍。
30:13 見若過去歸tī hiahê有資格ê，ta̍k人tio̍h照聖所ê 秤the̍h出半舍客勒ê銀á，chit半舍客勒是獻hō͘上主ê。（一舍客勒ê銀á是二十個季拉。）
30:14 見若過去歸tī hiahê有資格ê，二十歲以上tio̍h kā chitê獻hō͘上主。
30:15 為tio̍h贖回lín ê性命，kā chitê獻hō͘上主ê時，好額人m̄ thang出khah chē，sànchhiah人mā m̄ thang出khah少，ta̍k人lóng出tú好ê半舍客勒。
30:16 你tio̍h tùi以色列人收chitê贖回ê銀á來做會幕ê路用，thang tī上主ê面前為以色列人做記念，來贖回lín ê性命。」
30:17 銅盆
上主吩咐摩西講：
30:18 「你tio̍h用銅做洗盪ê盆，它ê座mā tio̍h用銅做，thang用來洗盪。Tio̍h kā它hē tī會幕kah壇ê中間，內面tio̍h貯水。
30:19 亞倫kah伊ê kiáⁿ beh tī hia洗in ê手kah in ê腳。
30:20 In入去會幕á是來到壇前服事，用火燒祭服事上主ê時，tio̍h用水洗，免得死亡。
30:21 In tio̍h ánne洗手洗腳，免得死亡，這是做in定tio̍h ê例，to̍h是做伊kah伊ê kiáⁿ孫ta̍k世代永遠ê例。」
30:22 聖油ê製法
上主koh吩咐摩西講：
30:23 「你tio̍h取上品ê芳料，to̍h是流質ê沒藥五百舍客勒，芳ê肉桂兩百五十，芳ê菖蒲兩百五十，
30:24 沉香五百kah橄欖油一欣，lóng照聖所ê秤á。
30:25 你tio̍h用來做thang抹ê聖油，to̍h是照做芳味ê製法來調和，是beh做thang抹ê聖油。
30:26 Tio̍h用chitê油來抹會幕kah法櫃、
30:27 桌á kah桌頂所有ê器具，燈台kah燈台ê器具，以及香壇，
30:28 燒祭ê壇kah它所有ê器具，洗盪ê盆kah它ê座。
30:29 你tio̍h hō͘ in做聖，hō͘ in成做至聖，見若摸tio̍h它ê lóng分別做聖。
30:30 你tio̍h用油抹亞倫kah伊hiahê kiáⁿ，hō͘ in做聖，thang做祭司來服事我。
30:31 你tio̍h kā以色列人講：『Chitê油beh做我ê聖油，做抹油ê路用，到lín ta̍k世代。
30:32 M̄-thang倒tī人ê身軀，mā m̄ thang照chitê調和ê製法做kah chitê仝款。Chitê油是聖，lín mā tio̍h掠它做聖。
30:33 見若調和kah chitê仝款，á是用它抹tī外人ê身軀ê，我beh kā伊tùi人民ê中間剪除。』」
30:34 香ê製法kah用法
上主對摩西講：「你tio̍h取芳ê香（hiuⁿ）料，to̍h是ná-ta̍t，tí-hê-le̍k，hek-pi-ná（註：Chit三種植物是舊約時代ê芳料，台語無對等ê名詞。有英語譯本譯做 "stacte, onycha, galbanum"，有華語譯做「蘇合香、香螺、白松香」）；chiahê芳芳ê香料kah清ê乳香，ta̍k種稱平重。
30:35 你tio̍h用chiahê做香，照做芳味ê法來做芳料，用鹽調和，hō͘它清氣koh聖潔。
30:36 你tio̍h the̍h淡薄á chitê香，舂（cheng）hō͘它真幼，hē tī會幕內ê法櫃前。我beh tī hia kah你相會，lín tio̍h掠它做至聖。
30:37 Lín所做ê香m̄ thang照chitê調和ê方法為tio̍h kakī 來做，lín tio̍h掠它做聖，歸tī上主。
30:38 見若做親像chit款ê香，ài beh phīⁿ芳ê，我ētùi人民ê中間kā伊剪除。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。