出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
29:1 立亞倫kah伊ê Kiáⁿ孫做祭司ê規定
(利8：1-36)
「你kā in分別做聖，做祭司來服事我，tio̍h ánne行：取一隻公ê牛，兩隻無缺點公ê綿羊，
29:2 koh取無酵餅kah攪油ê無酵餅，以及抹油無酵ê薄餅，lóng tio̍h用好ê麵粉來做。
29:3 Chiahê餅tio̍h hē tī一kha筐，貯tī筐裡帶來，koh牽hit隻公ê牛kah兩隻公ê綿羊來。
29:4 「Tio̍h hō͘亞倫kah伊hiahê kiáⁿ來到會幕ê門口，用水kā in洗身軀。
29:5 Tio̍h the̍h hiahê衫褲來，kā亞倫穿內衫kah祭司服內面ê外袍，以及祭司服連捕褂，mā kā伊縖用奇巧ê工夫所織祭司服ê帶。
29:6 Kā帽á戴tī伊ê頭殼，kā聖ê冕旒疊tī帽á ê頂面。
29:7 Tio̍h用抹ê油倒tī伊ê頭殼來kā伊抹油。
29:8 「Tio̍h hō͘伊ê kiáⁿ來，kā in穿內衫。
29:9 Koh用帶kā亞倫kah伊hiahê kiáⁿ縖，用巾kā in包頭殼，in照永遠ê例得tio̍h祭司ê職。Koh tio̍h kā亞倫kah伊hiahê kiáⁿ行設立ê禮。
29:10 「你tio̍h牽hit隻公ê牛來到會幕前，亞倫kah伊hiahê kiáⁿ tio̍h tī牛ê頭殼頂hōaⁿ手。
29:11 你tio̍h tī上主ê面前，tī會幕ê門口，thâi hit隻牛。
29:12 取牠ê血淡薄á，用指頭á抹tī壇ê四角，kā血lóng piàⁿ tī壇腳。
29:13 Tio̍h kā所有五臟ê油、肝頂面ê網紗kah兩粒腰子，以及腰子ê油lóng燒tī壇頂。
29:14 獨獨牛ê肉kah牠ê皮，以及牠ê屎，lóng tio̍h tī營外用火燒，是做贖罪祭。
29:15 「你tio̍h牽一隻公ê綿羊來，亞倫kah伊hiahê kiáⁿ tio̍h tī hit隻羊ê頭殼頂hōaⁿ手。
29:16 Tioh8thâihit隻羊，kā牠ê血hiù tī壇ê四箍圍。
29:17 Tio̍h kā羊切做一塊一塊，kā五臟kah腿洗清氣，然後lok tī切kui塊ê肉kah頭ê頂面。
29:18 Tio̍h kā kui隻羊tī壇頂燒，這是獻hō͘上主ê燒祭，是用火燒hō͘上主芳芳ê祭。
29:19 「你tio̍h kā第二隻公ê綿羊牽來，亞倫kah伊hiahê kiáⁿ tio̍h tī羊ê頭殼頂hōaⁿ手。
29:20 你tioh8thâi hit隻羊，取牠ê血淡薄á，抹tī亞倫正pêng ê耳á垂kah伊hiahê kiáⁿ 正pêng ê耳á垂，koh抹tī in正手ê大頭拇kah正腳ê大頭拇，koh kā血hiù tī壇ê四箍圍。
29:21 你tio̍h取壇頂ê血淡薄á kah抹ê油，hiù tī亞倫kah伊ê衫，koh hiù tī伊ê kiáⁿ kah伊ê kiáⁿ ê衫；伊kah伊ê衫，伊ê kiáⁿ kah伊ê kiáⁿ ê衫，lóng分別做聖。
29:22 「Koh tio̍h取hit隻羊ê油kah牠ê肥ê尾，以及蓋五臟ê油kah肝頂ê網紗、兩粒腰子kah腰子ê油，以及正pêng ê腿。(這是承接聖職ê禮儀所獻ê羊)。
29:23 Koh tùi hit-kha hē tī上主ê面前貯無酵餅ê筐á內，the̍h一塊餅，一塊攪油ê餅，一塊薄餅，
29:24 lóng hē tī亞倫ê手kah伊ê kiáⁿ ê手，tī上主ê面前搖來做搖祭。
29:25 你tio̍h tùi in ê手接來，tī壇頂燒祭ê頂面燒，做芳芳ê祭獻tī上主ê面前，是用火燒hō͘上主ê祭。
29:26 「亞倫受設立ê禮儀所獻ê公羊，你tio̍h取牠ê胸，tī上主ê面前搖來做搖祭，這是你ê份額。
29:27 「行設立ê禮儀所獻ê公羊，hitê搖祭ê胸kah舉祭ê腿，to̍h是所搖ê，所舉起ê，你tio̍h kā它分別做聖，to̍h是屬tī亞倫kah伊hiahê kiáⁿ ê。
29:28 這tio̍h做亞倫kah伊ê kiáⁿ孫tùi以色列人所得tio̍h永遠ê份額，因為是舉祭。Tio̍h tùi以色列人平安祭ê中間做舉祭，to̍h是in獻hō͘上主ê舉祭。
29:29 「亞倫ê聖衫tio̍h留hō͘伊後代ê kiáⁿ孫，thang穿來受抹油，mā穿來受設立。
29:30 伊hitê續接伊做祭司ê kiáⁿ，ta̍k pái入去會幕，tī聖所服事ê時，tio̍h穿七日。
29:31 「行設立ê禮儀所獻公羊ê肉，你tio̍h tī聖ê所在煮。
29:32 亞倫kah伊ê kiáⁿ tio̍h tī會幕ê門口，食chit隻羊ê肉kah筐á內ê餅。
29:33 In tio̍h食所用來贖罪ê物，hō͘ in擔當職務，mā kā in分別做聖；獨獨外人m̄ thang食，因為he是聖物。
29:34 Hitê行設立ê禮儀所獻ê肉á是餅，若有留到隔工早起ê，你tio̍h kā所留ê用火燒，m̄ thang食，因為是聖ê物。
29:35 「你tio̍h照我所吩咐ê一切對亞倫kah伊ê kiáⁿ ánne行，行設立ê禮tio̍h七日。
29:36 Ta̍k日tio̍h獻公ê牛一隻做贖罪祭，你為壇贖罪ê時tio̍h hō͘它清氣，mā tio̍h kā它抹油來分別做聖。
29:37 你tio̍h為壇贖罪七日，hō͘它成聖，壇to̍h成做至聖。見若摸tio̍h伊ê人lóng分別做聖。」
29:38 每工Tio̍h獻ê祭
(民28：1-8)
「你所tio̍h獻tī壇裡ê，to̍h是未滿年ê羊á兩隻，ta̍k日tio̍h獻。
29:39 早起時tio̍h獻一隻，黃昏ê時tio̍h獻另外一隻。
29:40 你tio̍h用十分之一伊法ê幼麵粉，來kah kheh好ê油四分之一欣調和，kah一隻羊á同齊獻，koh用四分之一欣ê酒做灌奠。
29:41 另外hit隻羊á tio̍h tī黃昏ê時來獻，tio̍h照早起時ê素祭kah灌奠ê禮儀來料理，用火燒hō͘它芳芳來獻hō͘上主。
29:42 這beh tī上主ê面前kah會幕ê門口，做lín ta̍k世代tiāⁿ-tiāⁿ 獻ê燒祭。我ētī hia kah lín相會，kah你講話。
29:43 我ētī hia kah以色列人相會，會幕to̍h ē因為我ê榮光成做聖。
29:44 我beh hō͘會幕kah壇做聖，mā beh hō͘亞倫kah伊hiahê kiáⁿ做聖，做祭司來服事我。
29:45 我beh tiàm tī以色列人ê中間，做in ê上帝。
29:46 In會知影我是上主—in ê上帝，是chhōa in出埃及地，thang hō͘我tiàm tī in中間。我是上主—in ê上帝。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。