以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
44:1 東門ê使用
伊koh chhōa我倒tńg來到聖所ê外面ǹg東ê門；hitê門關teh。
44:2 上主kā我講：「Chitê門一定tio̍h關，m̄ thang開；無論啥人m̄ thang tùi hia出入，因為上主—以色列ê上帝，已經tùi hia入來，所以tio̍h久長關teh。
44:3 講tio̍h君王，因為伊是君王，thang坐tī hit內面，tī上主ê面前食餅；伊tio̍h tùi chitê門ê廊入來，mā tio̍h tùi hia出去。」
44:4 進入聖殿ê規定
伊koh chhōa我tùi北門來到殿ê頭前。我to̍h看，看tio̍h上主ê榮光充滿上主ê殿，我to̍h仆落地。
44:5 上主kā我講：「人子，我對你所講起上主殿內所有ê禮儀法度，你tio̍h注意，用目chiu 看，用耳孔聽，mā tio̍h注意聖殿入來ê所在kah聖所一切出去ê所在。
44:6 「你mā tio̍h對hiahê悖逆ê以色列ê子民講，至koân上主ánne講：以色列ê子民，lín行一切可惡ê tāichì，tio̍h掠做已經夠額！
44:7 lín獻餅、油kah血hō͘我ê時，lín chhōa hiahê心無受割禮，身軀mā無受割禮ê外邦人入來我ê聖所，來kā我ê殿òe lahsap，koh違背我ê約，加添lín一切可惡ê tāichì。
44:8 Lín mā無盡忠tī顧守我聖物ê職份，是為tio̍h lín本身派別人tī我ê聖所顧守我交帶lín ê職份。
44:9 「至koân上主ánne講：以色列族中ê外邦人，to̍h是心無受割禮、身軀無受割禮ê外邦人，lóng m̄ thang入來我ê聖所。」
44:10 Bē tàng做祭司ê利未人
當以色列行迷路ê時，有利未人離開我遠遠，to̍h是行迷路離開我去tòe in ê偶像，in tio̍h擔當in ê罪過。
44:11 總是，inē tī我ê聖所做差用，管理聖殿ê門，tī殿內做差用；為tio̍h人民thâi燒祭kah祭祀ê chengseⁿ，會 khiā tī in ê面前來kā in服事。
44:12 既然tī in ê偶像ê面前做人民ê差用，koh做阻礙hō͘以色列ê子民陷落罪過，所以我gia̍h起手kā in攻擊，in ē擔當in ê罪過。這是至koân上主講ê。
44:13 In bē tàng親近我，對我行祭司ê職份，mā m̄ thang親近我一件聖物，to̍h是至聖ê物；in tio̍h擔當in ê見笑kah in所行可惡ê tāichì。
44:14 總是，我beh hō͘ in擔當顧守殿ê職份，辦理其中所有ê tāichì kah hit內面所tio̍h做ê工。
44:15 Ē-tàng做祭司ê 利未人
以色列族行迷路離開我ê時，祭司利未人撒督ê kiáⁿ孫，猶原顧守我ê聖所，in ē親近我，kā我服事，koh khiā tī我ê面前，用油kah血獻hō͘我。這是至koân上主講ê。
44:16 In beh入來我ê聖所，來到我ê桌，kā我服事，守我所交帶in做ê。
44:17 In入來內院ê門ê時，tio̍h穿幼苧衫；in tī內院ê門kah tī殿內行職份ê時，lóng m̄ thang穿羊毛ê衫褲。
44:18 In ê頭殼頂tio̍h戴幼苧布ê帽，腳腿tio̍h穿幼苧布ê褲；hitê ē流汗ê lóng m̄ thang穿。
44:19 In出去到外院，to̍h是來到外院ê人民hia，tio̍h thǹg伊行職份ê衫褲，hē tī聖ê房間，穿別種ê衫褲，免得用in ê衫hō͘人民成聖。
44:20 「In m̄ thang剃頭，mā m̄ thang hō͘頭毛發長長，總是，tio̍h剪頭毛。
44:21 祭司入來內院ê時，lóng m̄ thang lim酒。
44:22 Mā m̄ thang娶寡婦á是離婚ê chabó͘人做bó͘，獨獨tio̍h娶以色列族中ê在室女á是祭司ê寡婦。
44:23 「In tio̍h hō͘我ê人民知聖ê kah平常ê ê差別，koh hō͘ in分別清氣ê kah無清氣ê。
44:24 若有相告ê tāichì，in tio̍h khiā-teh判斷，tio̍h照我ê判斷來判斷。Tī我一切ê節期，tio̍h守我chiahê法度律例，mā tio̍h守我chiahê安息日做聖。
44:25 「In m̄ thang近óa死人，kā kakī òe lahsap，獨獨thang為tio̍h老父、老母、kiáⁿ兒、兄弟kah iáu未出嫁ê 姊妹，kā kakī òe lahsap。
44:26 伊已經清氣了後，tio̍h kā伊koh算七日。
44:27 當伊入去聖所到內院ê日，tio̍h tī聖所服事，tio̍h為本身獻贖罪祭。這是至koân上主講ê。
44:28 「In一定ē有產業，我是in ê產業。M̄-thang tī以色列中hō͘ in基業，我是in ê基業。
44:29 素祭、贖罪祭、補過失祭，in lóng thang食hiahê祭物；以色列中所獻一切ê物lóng歸tī in。
44:30 見若起頭熟ê物ê第一个kah一切禮物中ê禮物，lóng歸tī祭司；lín mā tio̍h用起頭出產ê麵粉hō͘祭司，thang hō͘福氣臨到你ê家。
44:31 無論鳥á是獸，見若kakī 死ê á是受擘裂ê，祭司lóng m̄ thang食。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。