以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
39:1 歌革被Phah敗
至koân上主講：「人子，你tio̍h ǹg歌革來宣布攻擊伊講，至koân上主ánne講：米設、土巴ê chhōa頭ê王—歌革，我kah你做對敵。
39:2 我beh hō͘你oa̍t tńg來，我beh chhōa你進前，hō͘你tùi北方ê極頭來，chhōa你到以色列ê山。
39:3 我beh tùi你ê倒手phah ka-la̍uh你ê弓，tùi你ê正手phah lak你ê箭。
39:4 你kah你ê軍隊以及kah你來ê列國人民ē倒tī以色列ê山。我beh kā你hō͘ ta̍k種ê鷹鳥kah田野ê野獸做食物。
39:5 你ē倒tī田野，因為我bat ánne講。這是至koân上主講ê。
39:6 我mā beh降落火tī瑪各kah島嶼安然生活ê人ê身上；into̍h ē知我to̍h是上主。
39:7 「我beh tī我ê子民—以色列中顯出我ê聖名，mā無容允我ê聖名koh受褻瀆；列國人to̍h ē知我to̍h是上主—以色列中ê聖ê。
39:8 「至koân上主講：你看，tāichì來ā，mā ē ánne hō͘它成，這是我所講ê日。
39:9 「Tòa tī以色列城ê人beh出去，起火燒伊ê ke-si，to̍h是大細ê藤牌、弓箭、槌á kah鎗，lóng beh用in來hiâⁿ火，經過七年；
39:10 甚至in無beh tùi田野拾柴，mā無beh tùi樹林剉樹；因為in ē 用ke-si hiâⁿ火，koh ē搶hiahê搶in ê人，劫hiahê劫in ê人。這to̍h是至koân上主講ê。」
39:11 歌革ê埋葬
上主講：「當hit日，我beh kā以色列地，海ê東pêng，人所經過ê山谷，賞賜hō͘歌革做墓地來阻擋經過ê人ê路。Tī hia，人ē埋葬歌革kah伊ê眾人；會 kā hit所在稱做『Ha-mong-go͘k（註：希伯來文ê音讀，意思是「Khǹg歌革軍屍體」）ê山谷』。
39:12 以色列ê子民ē kā in埋葬，經過七月日久，hō͘ hitê地清氣。
39:13 全國ê人民ē kā in埋葬。當我得tio̍h榮光ê日，chitê tāichìē hō͘ in得tio̍h名聲。這是至koân上主講ê。
39:14 In會派人tiāⁿ-tiāⁿ 巡邏全地，kah經過ê人做伙埋葬hiahê chhun落來tī地裡ê身屍，thang清氣hitê所在。到七月日滿，in ēkoh四界去chhōe。
39:15 巡邏全地ê人ē經過hia，若有人看tio̍h人ê骨骸，to̍h tī hia立一个記號，thèng候埋葬ê人kā伊埋葬tī Ha-mong-gok ê山谷。
39:16 Māē有一个城，名叫做Ha-mo͘-nah，inē ánne清氣hitê地。
39:17 「人子，至koân上主ánne講：你tio̍h對ta̍k種ê飛鳥以及田野ê野獸，講：Lín tio̍h聚集做陣來，tio̍h tùi四方聚集到我為tio̍h lín所獻ê祭，to̍h是以色列山ê大祭，hō͘ lín thang食肉、lim血。
39:18 Lín會食勇士ê肉，lim地chiūⁿ首領ê血，公ê綿羊、羊á、公ê山羊kah公ê牛，lóng是巴珊ê肥ê chengseⁿ。
39:19 Lín食我為tio̍h lín所獻ê祭，會食油食到飽，lim血lim到醉。
39:20 Línē tī我ê桌食馬匹kah坐車ê，以及勇士kah所有ê戰士食到飽飽。這是至koân上主講ê。」
39:21 以色列ê復興
上主講：「我beh tī列國中顯明我ê榮光，列國mā ē看tio̍h我所行ê審判kah我所hē tī in身上ê手。
39:22 Án-ne，tùi hit日以後，以色列ê子民to̍h ē知我是上主—in ê上帝。
39:23 列國mā ē知以色列ê子民受掠是因為in ê罪過。In得罪我，我對in掩我ê面，kā in交tī in ê對敵ê手，in to̍hlong2倒tī刀下。
39:24 我照in ê污穢，照in ê過失款待in，對in掩我ê面。」
39:25 所以，至koân上主ánne講：「我beh hō͘雅各受掠ê人倒tńg來，mā beh憐憫以色列全家，
39:26 mā beh為tio̍h我ê聖名熱心。
39:27 In tī本所在安然生活，無人hō͘ in驚，tī我kā in tùi列國中chhōa倒tńg來，tùi對敵ê地聚集óa來。我tī列國ê面前，tī in身上顯明做聖ê時，in ē擔當in ê見笑kah in悖逆我一切ê罪。
39:28 我hō͘ in受掠去tī列邦，koh kā in聚集倒tńg來本所在，無留kah一个人tī hia；into̍h ē知我是in ê上帝—上主。
39:29 我mā無koh對in掩（am）我ê面，因為我已經kā 我ê神靈降落tī以色列ê子民。這是至koân上主講ê。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。