以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
37:1 枯焦骨ê Koh活
上主ê手hē tī我ê身上，上主用祂ê神靈chhōa我出去，kā我hē tī山谷中；hitê山谷有骨頭滿滿。
37:2 祂hō͘我tùi骨頭ê四箍圍經過；你看，tī山谷ê面上有骨頭真chē，你看，in真枯焦。
37:3 祂對我講：「人子，chiahê骨kám ē活？」我應講：「至koân上主ah，祢kakī 知。」
37:4 祂koh對我講：「你tio̍h對chiahê骨頭宣布，來kā in講：Lín枯焦ê骨，tio̍h聽上主ê話。
37:5 至koân上主kā chiahê骨ánne講：『你看，我beh hō͘活氣入去lín ê內面，lín to̍h ē活起來。
37:6 我beh hō͘ lín ê頂面有筋，koh hō͘ lín有肉，koh用皮kā lín包，用活氣入去tī lín內面，lín to̍h ē活起來。Lin2to̍h ē知我是上主。』」
37:7 就ánne，我遵thàn命令來宣布。當我teh宣布ê時，有聲發出，忽然地動，chiahê骨相聯合，ta̍k支歸它ê本位。
37:8 我kā它看，看tio̍h骨ê頂面有筋，mā有肉，koh有皮包tī它ê頂面，總是，內面無活氣。
37:9 祂to̍h對我講：「你tio̍h ǹg風來宣布；人子，你tio̍h宣布，來對風講，至koân上主ánne講：活氣，tio̍h tùi hiahê風來，pûn tī chiahê受thâiê，hō͘ in ē活起來。」
37:10 就ánne，我照祂所命令我ê來宣布，活氣to̍h來，入去tī in內面；in to̍h活起來khiā ·leh，成做極大ê軍隊。
37:11 祂to̍h kā我講：「人子，chiahê骨to̍h是以色列ê全家；你看，in講：『阮ê骨lóng枯焦，阮ê ǹg望lóng失落；阮全部受剿滅。』
37:12 所以，你tio̍h宣布，來對in講，至koân上主ánne講：『我ê子民，你看，我beh開lín ê墓，hō͘ lín tùi lín ê墓起來，chhōa lín入去以色列地。
37:13 我ê子民，我開lín ê墓，hō͘ lín tùi lín ê墓起來，lín to̍h ē知我是上主。
37:14 我beh kā我ê神靈hē tī lín ê內面，lín to̍h ē活起來。我kā lín安置tī lín ê本所在，lín to̍h ē知我—上主有ánne講，mā有ánne來成。這是上主講ê。』」
37:15 偤大kah以色列組成聯合王國
上主ê話koh臨到我，講：
37:16 「人子，你tio̍h the̍h一塊柴板，tī它ê頂面寫『為偤大kah伊ê同伴以色列族』，koh the̍h一塊柴板，tī它ê頂面寫『為tio̍h約瑟、以法連kah它ê同伴以色列全家』ê柴板。
37:17 你tio̍h hō͘ in相óa，連做一塊柴板；to̍h tī你ê手中beh成做一塊。
37:18 設使你ê人民問你講『你做chitê是啥物意思，你ná m̄ kā阮指示？』
37:19 你to̍h tio̍h對in講：『至koân上主ánne講：你看，我beh the̍h以法連ê手所gia̍h約瑟ê柴板，kah它ê同伴以色列chiahê支族，我beh kā它hē tī óa偤大ê柴板，hō͘它成做一塊ê柴板，它to̍h ē成做一塊tī我ê手。』
37:20 「你所寫ê hit兩塊柴板，tio̍h tī in ê目chiu 前gia̍h tī你ê手。
37:21 你tio̍h對in講，至koân上主ánne講：你看，我beh取以色列族tùi in所去到ê ta̍k國出來，koh tùi四箍圍kā in聚集，chhōa in tńg來本所在。
37:22 我beh hō͘ in tī hitê地，tī以色列ê山，合做一个人民；有一个王做in眾人ê王。In無koh分做兩pêng ê人民，mā無koh分做兩國；
37:23 mā無koh因為偶像kah可惡ê物，以及一切ê罪過，kā本身òe lahsap。我beh救in脫出in所有tòa ê所在，to̍h是in犯罪hia；我beh kā in清氣；ánne，in ē做我ê子民；我beh做in ê上帝。
37:24 「我ê奴僕—大衛會做in ê王；in lóng ē歸tī一个牧者。In會順服我ê法度，守我ê律例來行。
37:25 In會tòa tī我賞賜hō͘我ê奴僕—雅各ê地，to̍h是lín ê祖先所tòa ê。In kah in ê kiáⁿ孫，以及kiáⁿ-kiáⁿ孫孫lóng永遠tòa tī hia。我ê奴僕—大衛會做in ê君王，一直到永遠。
37:26 而且我beh kah in立平安ê約，kah in做永遠ê約；我mā beh kā in建設，hō͘ in ê人額加添，koh tī in ê中間設立我ê聖所，直到永遠。
37:27 我tòa ê所在ē tī in中間；我beh做in ê上帝，in ē做我ê子民。
37:28 我ê聖所tī in中間，一直到永遠；外邦人to̍h ē知我是上主，hō͘以色列成做聖ê。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。