以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
34:1 以色列ê牧者
上主ê話臨到我，講：
34:2 「人子，你tio̍h宣布攻擊以色列chiahê牧者，你tio̍h宣布來對in講，至koân上主對chiahê牧者ánne講：有災厄ah！以色列chiahê牧者因為in養飼kakī 。牧者kám無應該養飼羊群？
34:3 Lín食牠ê油，穿牠ê毛，thâi牠ê肥肉ê mā無teh養飼羊群。
34:4 軟弱ê，lín無顧hō͘牠勇；破病ê，lín無kā牠醫治；受傷ê，lín無kā牠包；受趕逐ê，lín無kā牠chhōa倒tńg來；失落ê，lín無去chhōe牠；獨獨用強暴kah嚴嚴ê管轄。
34:5 因為無牧者，羊to̍h四散；四散了後，to̍h成做所有野獸ê食物。
34:6 我ê羊四界行tī chiahê山裡，tī ta̍k个koân ê山頂，四散tī全地，無人去jiok，無人去chhōe。
34:7 「所以，lín chiahê牧者tio̍h聽上主ê話。
34:8 至koân上主講：我kí我ê永遠活命來chiùchōa，我ê羊因為無牧者，to̍h成做受搶ê物，羊mā做所有野獸ê食物。我ê牧者mā無去chhōe我ê羊；chiahê牧者因為in養飼kakī ，無teh養飼我ê羊。
34:9 所以，lín chiahê牧者tio̍h聽上主ê話。
34:10 至koân上主ánne講：我kah牧者做對敵，beh tùi in ê手追討我ê羊，hō͘ in無koh養飼羊群；牧者mā無koh養飼kakī 。我beh救我ê羊脫離in ê嘴，無koh做in ê食物。」
34:11 好牧者
「因為至koân上主ánne講：你看，我beh本身去chhōe我ê羊，來chhōe kah tio̍h。
34:12 牧者tī羊群四散ê日，án怎chhōe伊ê羊，我mā beh親像ánne來chhōe我ê羊。Chiahê羊tī密雲烏暗ê日，四散到ta̍k所在，我beh tùi hia kā in救倒tńg來。
34:13 我beh tùi列國中kā in chhōa出來，tùi ta̍k國ê內面kā in聚集，chhōa in tńg來in ê本所在，mā beh tī以色列山chiahê溪邊，境內所有thang tòa ê所在來kā in養飼。
34:14 我beh tī好好ê草場kā in養飼，in ê羊椆會設tī以色列高位ê山，inē tī好好ê羊椆內倒teh睏，mā ētī以色列山肥koh súi ê草場食草。
34:15 至koân上主講：我beh親身養飼我ê羊，hō͘ in倒teh睏。
34:16 「失落ê，我beh去chhōe牠；受趕逐ê，我beh chhōa牠tńg來；受傷ê，我beh kā牠包；破病ê，我beh kā牠醫治；總是，肥ê、勇ê，我beh kā牠除滅，mā beh秉（péng）公kā in養飼。
34:17 「我ê羊群，講tio̍h lín，至koân上主ánne講：我beh tī羊kah羊ê中間，公ê綿羊kah公ê山羊ê中間行判斷。
34:18 你tī好好ê草場食草，kám iáu掠做是小khóa tāichì？chhun落來ê草，lín竟然用腳thún踏？Lín lim清ê水，chhun落來ê水，lín竟然用腳phah hō͘它濁？
34:19 講tio̍h我ê羊，in是食lín用腳踏ê，lim lín用腳phah濁ê。
34:20 「所以，至koân上主對in ánne講：你看，我本身tī肥ê羊kah sán ê羊ê中間行判斷。
34:21 因為lín用身軀，用肩胛頭kheh in，用lín ê角觸（tak）破病ê，致使hō͘ in四散tī外面。
34:22 所以，我beh拯救我ê羊群，無koh hō͘ in做受搶ê物；我mā beh tī羊kah羊ê中間行判斷。
34:23 我beh設立一个牧者來照顧in，伊ē kā in養飼，to̍h是我ê奴僕—大衛。伊ē kā in養飼，做in ê牧者。
34:24 我—上主beh做in ê上帝，我ê奴僕—大衛ē tī in ê中間做首領。這是上主講ê。
34:25 「我beh kah in立平安ê約，hō͘惡獸tùi境內斷絕，into̍h ē安然tòa tī曠野，睏tī樹林內。
34:26 我beh hō͘ in kah我ê山ê四箍圍ê所在成做福氣ê源頭，我mā beh照時落雨，beh有施福氣ê大雨。
34:27 田野ê樹會結果子，地mā ē有出產；in ē安然tòa tī本所在。我at斷in所揹ê枷擔（ka-taⁿ），救in脫離hitê掠in做奴隸ê人ê手；hit時，into̍h ē知我是上主。
34:28 In無koh做外邦人所搶ê物，地chiūⁿê野獸mā無koh kā in吞食；是beh hō͘ in安然生活，無人ēkoh hō͘ in驚惶。
34:29 我beh kā in興起一个出名ê栽種所在；in tī境內無koh hō͘飢荒所滅，mā無koh受tio̍h外邦人ê凌辱。
34:30 Into̍h ē知我—上主—in ê上帝是kah in同在，mā ē知in以色列ê人民是我ê子民。這是至koân上主講ê。
34:31 「Lín是我ê羊，是我草場ê羊；lín是人，我mā是lín ê上帝。這是至koân上主講ê。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。