以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
18:1 上主ê話koh臨到我，講：
18:2 「Lín tī以色列地ná ē用chitê俗語講：『老父食酸ê葡萄，kiáⁿ ê嘴齒會酸軟。」
18:3 至koân上主講：「我kí我ê永遠活命chiùchōa講，lín tī以色列中bē tàng koh使用chitê俗語。
18:4 你看，所有ê神魂是屬tī我；親像老父ê神魂屬tī我，kiáⁿ ê神魂mā是ánne；犯罪ê神魂，伊ē死。
18:5 「人若公義，行公平kah義理，
18:6 m̄ bat上山頂食祭物，m̄ bat仰望以色列ê子民ê偶像，m̄ bat kā厝邊ê bó͘ òe lahsap，m̄ bat親近經期內ê chabó͘人，
18:7 m̄ bat辜負人，是kā欠債ê人ê當（tǹg）頭還伊；m̄ bat強搶人ê物，是用食物hō͘ iau餓ê人食，用衫褲hō͘ thǹgpaktheh ê人穿；
18:8 m̄ bat kā借錢ê人討利息，mā無the̍h利息錢，kiu手無做pháiⁿ，tī兩pêng ê人中間照公道判決；
18:9 順服我ê律例，執守我ê法度，照誠實做tāichì，這是義人，一定ē得tio̍h活命。這是至koân上主講ê。
18:10 「設使伊生一个kiáⁿ，去做強盜、做thâi人ê，á是行hiahê pháiⁿ ê一項，無行頂面所講ê好，
18:11 顛倒上山頂去食祭物，koh kā厝邊ê bó͘ òe lahsap，
18:12 辜負困苦kah sànchhiah ê人，強搶人ê物，m̄ bat kā當頭還人，仰望偶像，行可惡ê tāichì，
18:13 kā借錢ê人討利息，the̍h利息錢；chitê人kám ē tàng活落去？伊一定bē活。伊行hiahê一切可惡ê tāichì，一定tio̍h死，伊ê罪beh歸tī伊。
18:14 「你看，設使伊生一个kiáⁿ，看tio̍h老父所行一切ê罪就驚惶，無ánne去行；
18:15 m̄ bat上山去食祭物，m̄ bat仰望以色列ê子民ê偶像，m̄ bat kā厝邊ê bó͘ òe lahsap，
18:16 m̄ bat辜負人，m̄ bat the̍h人ê當頭，m̄ bat強搶人ê物，是用食物hō͘ iau餓ê人食，用衫褲hō͘ thǹgpaktheh ê人穿，
18:17 kiu手無害sànchhiah人，無討利息錢，無the̍h利息，伊順服我ê法度，執守我ê律例，伊to̍h無因為老父ê罪過來死亡，一定ē活落去。
18:18 講tio̍h伊ê老父，因為伊欺負人真傷重，強搶兄弟ê物，tī本族中無做好；你看，伊ē因為kakī ê罪來死。
18:19 「Lín iáu teh講：『Kiáⁿ ná ē無擔當老父ê罪？』Kiáⁿ若行正直kah合理ê tāichì，守我一切ê律例來行，伊一定ē活落去。
18:20 犯罪ê神魂，伊ē死。Kiáⁿ一定無擔當老父ê罪，老父mā無擔當kiáⁿ ê罪。義人ê義會歸tī伊kakī ；pháiⁿ人ê pháiⁿ mā ē歸tī伊kakī 。
18:21 「Pháiⁿ人若回頭離開所做一切ê罪惡，執守我所有ê律例，行正直kah合理ê tāichì，伊一定ē活，bē死。
18:22 伊所犯一切ê罪過無koh kā它ē記得，tī伊所行ê義，伊ē活落去。
18:23 至koân上主講：Pháiⁿ人死亡，kám是我所歡喜？我kám m̄是歡喜伊回頭，離開伊所行ê路，來得tio̍h活命？
18:24 「總是，義人若oa̍t頭，離開伊ê義來犯罪，照pháiⁿ人所行一切可惡ê tāichì來行，伊kám ē活落去？伊所行一切ê義lóng無koh受記念，伊ētī伊所犯ê罪、所行ê pháiⁿ，死tī hit中間。
18:25 「Lín iáu teh講：『主ê路無公平！』以色列ê子民，lín tio̍h聽！我ê路kám無公平？Kám m̄是lín ê路無公平？
18:26 義人若oa̍t頭離開伊ê義來行罪惡，致使為tio̍h ánne來死，伊to̍h ē因為所行ê罪惡來死。
18:27 而且pháiⁿ人若回頭，離開伊所行ê pháiⁿ，來行正直kah合理ê tāichì，伊ēhō͘伊ê神魂得tio̍h活命。
18:28 因為伊有思考，回頭離開伊所犯一切ê罪過，伊一定ē活，bē死。
18:29 以色列ê子民iáu teh講：『主ê路無公平！』以色列ê子民，我ê路kám無公平？Kám m̄是lín ê路無公平？
18:30 所以，至koân上主講：「以色列ê子民，我beh照lín ta̍k人所行ê 來kā lín審判。Lín tio̍h回頭，離開所犯一切ê罪過；ánne，罪過to̍h bē hō͘ lín滅亡。
18:31 Lín tio̍h kā所犯一切ê罪過hiat-ka̍k離開lín，為kakī 成（chiâⁿ）一个新ê心kah新ê心神。以色列ê子民，lín kám一定tio̍h死？
18:32 至koân上主講：人ê死，我無歡喜伊ê死；所以，lín tio̍h回頭，來得tio̍h活命。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。