耶利米哀歌 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
3:1 懲罰、悔改、Ǹg望
因為主受氣ê柺á來tú tio̍h艱苦ê，我to̍h是hitê人。
3:2 祂chhōa我，hō͘我行tī烏暗，無行tī光明中。
3:3 祂真正tiāⁿ-tiāⁿ 出手攻擊我，kui日無停。
3:4 祂hō͘我ê肉kah皮乾乾去；祂at斷我ê骨頭。
3:5 祂起土堆來攻擊我，用苦毒ê物kah艱難kā我圍困。
3:6 祂hō͘我tòa tī烏暗ê所在，親像死了真久ê人。
3:7 祂用籬笆圍我，hō͘我走bē出去，祂hō͘我ê鐵鏈ná重。
3:8 我哀叫求幫贊ê時，祂hō͘我ê祈禱bē tàng聽tio̍h。
3:9 祂用過phah ê石頭塞密我ê路，祂hō͘我ê路彎曲。
3:10 祂對我親像熊teh埋伏，親像獅tiàm tī暗密ê所在。
3:11 祂hō͘我迷路，kā我拆碎，hō͘我稀微。
3:12 祂開弓，用我做箭靶。
3:13 祂用箭袋ê箭射入我ê腹內。
3:14 我成做我ê人民ê笑柄；in kui日用我做歌曲。
3:15 祂用苦毒ê物充滿我，用茵蔯kā我灌到驚。
3:16 祂用粗砂石phah斷我ê嘴齒，用火灰sám我ê身軀。
3:17 祢hō͘我ê心離開平安遠遠，hō͘我bē記得福氣。
3:18 我to̍h講：我ê氣力衰敗；而且我tī上主hia lóng無ǹg望！
3:19 求你ē記得我ê困苦、我ê艱難，親像茵蔯、苦膽。
3:20 我ê心若想起chiahê，tī我ê腹內就鬱悶。
3:21 我ê心倒tńg來想chitê tāichì，所以我有ǹg望，
3:22 阮無致使滅亡，是tùi上主chiahê慈愛；因為祂ê憐憫無窮盡。
3:23 主ê仁慈ta̍k早起換新；祢ê誠實非常闊大！
3:24 我ê心講：上主是我ê基業，因為ánne我beh ǹg望祂。
3:25 見若thèng候上主，走chhōe祂ê，祂ē施恩hō͘伊。
3:26 Ǹg望上主ê拯救，恬恬thèng候，這是好。
3:27 人少年ê時揹伊ê枷擔，這是好。
3:28 伊tio̍h kakī 坐，無出聲，因為chitê枷擔是上主hē tī伊ê身上ê。
3:29 伊ê嘴tio̍h àⁿ tī塵埃，kiámchhái有ǹg望。
3:30 伊tio̍h chhut-chāi人phah嘴phóe，滿滿受凌辱。
3:31 因為主ê慈愛滿滿，一定bē永遠棄sak人。
3:32 主雖然hō͘人憂悶，iáu kohē照祂百般ê慈愛發出憐憫。
3:33 祂hō͘人受苦、憂悶，m̄是祂所甘心情願ê。
3:34 人kā世上受關監ê踏tī腳前，這是主所無歡喜ê。
3:35 Á是tī至koân ·ê ê面前冤枉人，這是主所無歡喜ê。
3:36 á是冤枉人ê案件，這是主所無歡喜ê。
3:37 若m̄是主所命令ê，啥人有法度講了to̍h成？
3:38 好pháiⁿ事，kám m̄是lóng出tī至koân ·ê ê嘴？
3:39 人活tī世間，因為kakī ê罪過受刑罰，ná tio̍h哀怨？
3:40 咱tio̍h省察koh查考咱ê路，tio̍h oa̍t tńg來歸上主。
3:41 咱tio̍h獻心gia̍h手，ǹg天頂ê上主。
3:42 阮犯罪悖逆，祢無赦免。
3:43 祢用受氣罩阮，jiok阮；祢行剿滅，mā無憐憫。
3:44 祢用密雲遮蓋kakī ，致使祈禱bē tàng透過。
3:45 祢hō͘阮tī萬民ê中間，成做污穢受棄sak ê物。
3:46 阮ê對敵，lóng ǹg阮大大開嘴。
3:47 驚惶kah陷坑，殘害kah毀滅，lóng臨到tī阮。
3:48 我ê人民ê chabó͘ kiáⁿ tú tio̍h毀滅，因為ánne，我流目屎親像溪流。
3:49 我ê目chiu 流目屎，無停無soah，
3:50 直直thèng候上主àⁿ落來看，tùi天kā我鑒察。
3:51 因為我ê城chiahê chabó͘ kiáⁿ，hō͘我看tio̍h to̍h傷心。
3:52 無緣無故kah我做仇敵ê jiok我，親像teh jiok鳥á。
3:53 In hō͘我ê性命死tī陷坑，用一塊石頭thūn tī我ê頂面。
3:54 真chē水淹過我ê頭殼；我講：我無命à。
3:55 上主ah，我tùi深ê陷坑，求叫祢ê名。
3:56 祢bat聽我ê聲；我ê吐氣求叫，求祢m̄ thang掩耳孔m̄聽。
3:57 我求叫祢ê日，祢近óa我，講：m̄免驚！
3:58 主ah，求祢替我申冤，求祢救贖我ê性命。
3:59 上主ah，祢看tio̍h我所受ê冤枉，求祢kā我判斷。
3:60 In怨恨我，謀害我，祢lóng有看tio̍h。
3:61 上主ah，in chhoh罵我，謀害我，祢lóng有聽tio̍h；
3:62 mā聽tio̍h hiahê起來攻擊我ê人所講ê，以及kui日所設beh害我ê計謀。
3:63 求祢觀看，in坐teh á是起來，lóng用我做in ê歌曲。
3:64 上主ah，祢tio̍h照in ê手所做ê，來kā in報應。
3:65 祢tio̍h hō͘ in ê心變硬，hō͘祢ê咒詛臨到tī in。
3:66 祢tio̍h發出受氣來jiok in，tùi上主ê天下來kā in剿滅。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。