耶利米哀歌 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
2:1 上主懲罰耶路撒冷
Ai-ah！主受氣，祂hō͘烏雲遮蓋錫安ê chabó͘ kiáⁿ！祂kā以色列ê súi tùi天hiat落地；tī祂受氣ê日，mā無顧tio̍h祂kakī ê腳踏椅。
2:2 主thún踏雅各一切tòa ê所在，mā無憐憫；祂受氣chhia倒偤大chabó͘ kiáⁿ ê城堡，hō͘它倒到平地；祂凌辱chit國kah hit國ê貴族。
2:3 祂ê受氣真劇烈，kā以色列ê角全部斬斷，tī對敵ê面前kiu祂ê正手。祂親像四箍圍吞滅ê火焰，kā雅各燒燒去。
2:4 祂親像對敵開弓，祂khiā-teh gia̍h起正手親像仇敵，mā全部剿滅目chiu 所歡喜ê。Tī錫安chabó͘ kiáⁿ ê布棚，親像火piàⁿ出祂ê大受氣。
2:5 主soah變做親像對敵，吞滅以色列，祂吞滅她所有ê宮殿，祂毀壞她hiahê城堡；tī偤大chabó͘ kiáⁿ ê中間，加添真chē悲傷kah悲哀。
2:6 祂出力拆毀伊ê籬笆，親像花園，祂毀壞伊聚會ê所在。所定tio̍h ê節期kah安息日，tī錫安lóng bē記得；上主hō͘伊ánne，koh tī祂ê受氣痛恨中，看輕君王kah祭司。
2:7 主棄sak祂ê祭壇，討厭祂ê聖所，kā祂ê宮殿ê牆交tī對敵ê手中。In tī上主ê殿hōa-hōa哮，ná親像tī節期ê日。
2:8 錫安chabó͘ kiáⁿ ê城牆，上主決意beh拆毀；祂牽準繩ê線，直直毀滅，手無kiu倒tńg。祂hō͘外牆kah城牆lóng悲哀，做一下衰敗。
2:9 她ê門沉落地，主毀壞at斷她ê門閂。她ê君王kah貴族tòa tī無律法ê列國中；她ê先知無得tio̍h上主ê啟示。
2:10 錫安chabó͘ kiáⁿ ê長老坐tī土腳，恬恬無聲；用土沙粉sám頭殼，用麻布縖腰；耶路撒冷ê在室女頭殼chhih落地。
2:11 我ê目chiu 流目屎致使目眩，我ê心腸攪絞。我ê肝、膽墜落地，因為我ê人民ê chabó͘ kiáⁿ tú tio̍h毀滅，koh因為gín-á kah食奶ê tī城內ê街路暈去。
2:12 In tī城內ê街路暈去，親像受傷ê tī老母ê心懷teh beh斷氣；hit時，in對老母講：五穀kah酒tī tó位？
2:13 耶路撒冷ê chabó͘ kiáⁿ，我tio̍h án怎為你做見證？我tio̍h用啥物譬喻你？錫安ê在室女，我tio̍h用啥物比並你，thang hō͘你得tio̍h安慰？因為你ê傷嘴大kah親像海，啥人ē kā你醫好？
2:14 你ê先知替你看虛假kah愚戇ê異象，無顯出你ê罪過，thang hō͘你受掠ê倒tńg來；獨獨替你看虛假ê啟示kah受遷徙ê原因niā-niā。
2:15 見若tùi chia過路ê人lóngē kā你phah pho̍k-á。In ǹg耶路撒冷ê chabó͘ kiáⁿ恥笑搖頭，講： Chitê城kám是人所稱做十足súi，稱做全地所歡喜ê？
2:16 你ê對敵lóng ǹg你大大開伊ê嘴；in恥笑koh咬齒，講：阮有kā伊吞滅掉。這真正是阮所ǹg望ê日，taⁿ阮有tú tio̍h，阮有看tio̍h！
2:17 上主有成祂所定tio̍h ê，應驗祂早時所命令ê話。祂chhia倒，mā無保惜；hō͘對敵對你大歡喜；hō͘你ê對敵ê角gia̍h koân。
2:18 In ê心求叫主。錫安chabó͘ kiáⁿ ê牆，你tio̍h暝日流目屎親像溪流，你m̄ thang歇睏，你ê目chiu 仁tio̍h流目屎無soah。
2:19 暗暝換更ê時，你tio̍h起來求叫；，tī主ê面前piàⁿ出你ê心親像teh piàⁿ水；你ê gín-á tī街路口因為iau暈去；你tio̍h為tio̍h in ê性命，ǹg主gia̍h手來祈禱。
2:20 上主ah，求祢鑒察，看祢ǹg啥人ánne行？chabó͘人kám thang食in所生ê、手所抱ê嬰á？祭司kah先知kám thang tī主ê聖所受殺害？
2:21 Gín-á kah老人倒tī街路ê土腳；我chiahê在室女kah壯丁倒tī刀下；祢受氣ê日kā inthâi死。祢kā inthâi死，mā無憐憫。
2:22 祢叫四箍圍thang驚惶ê臨到tī我，親像tī節期ê日。Tī上主受氣ê日，無人有脫離，mā無人留teh。我所抱、所io ê，對敵kā伊thâi死了了。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。