出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
19:1 以色列人tī西奈山
以色列人出埃及地了後，第三个月tútú hit日，in to̍h來到西奈ê曠野。
19:2 In離開利非訂，來到西奈ê曠野，to̍h tī曠野紮營，以色列人to̍h tī hitê山ê頭前紮營。
19:3 摩西上到上帝hia，上主tùi山裡叫伊講：「你tio̍h ánne kā雅各家講，通知hō͘以色列人知：
19:4 『我對埃及人所行ê tāichì，lín lóng有看tio̍h，koh有看tio̍h我án怎親像鷹鳥ê翼揹lín，chhōa lín來歸tī我。
19:5 Taⁿ lín若實在遵thàn我ê話，遵守我ê約，lín to̍h ētī列國中做我kakī ê寶貝，因為全地lóng是我ê。
19:6 Lín會歸tī我，做祭司ê國，做聖潔ê子民。』你tio̍h kā以色列人講chiahê話。」
19:7 摩西招集人民中間ê長老，kā上主所吩咐伊ê話，lóng排列tī in ê面前。
19:8 人民lóng齊聲應講：「見若上主所講ê，阮lóng beh遵thàn。」摩西to̍h kā人民ê話回覆上主。
19:9 上主kā摩西講：「你看，我beh tī密雲ê中間臨到你，hō͘人民聽tio̍h我kah你teh講話，thang hō͘ in永遠相信你。」摩西to̍h kā人民ê話對上主講。
19:10 上主koh kā摩西講：「你去人民hia，今á日、明á載kā in分別做聖，in mā tio̍h洗衫。
19:11 Tio̍h準備便去赴第三日，因為第三日上主beh tī眾人ê面前降臨tī西奈山。
19:12 你tio̍h tī山ê四箍圍kā人民設界限，講：『Lín tio̍h謹慎，m̄ thang上山，mā m̄ thang摸它ê交界；見若摸chitê山ê，一定tio̍h hō͘伊死。
19:13 M̄-thang用手kā伊摸，tio̍h用石頭kā伊tìm，á是用箭kā伊射；無論是人á是chengseⁿ去摸tio̍h lóng bē活。到哨角ê聲拖長ê時，in tio̍h來山腳。』」
19:14 摩西落山去到人民hia，kā in分別做聖，in to̍hkakī 洗衫。
19:15 摩西對人民講：「Lín tio̍h準備便thang赴第三日，m̄ thang親近chabó͘人。」
19:16 到第三日天光早起，tī山頂有雷tân，有sihnà kah密雲，哨角ê聲koh真大，營內ê人民lóng phi̍h-phi̍h chhoah。
19:17 摩西chhōa人民出營房去迎接上帝，in lóng khiā tī山腳。
19:18 Thong西奈山lóng是火煙，因為上主tī火中降臨tī山頂，山ê火煙 chhèng koân，親像磁窯ê煙，kui 个山大振動。
19:19 哨角ê聲ná tân ná大，摩西講話，上帝出聲kā伊應。
19:20 上主降臨tī西奈山，tī山尾溜，上主召摩西上山尾溜，摩西to̍h chiūⁿ去。
19:21 上主對摩西講：「你落去禁戒人民，恐驚in chông過界，到上主chia來看，致使in真chē人ē死；
19:22 連親近上主ê祭司，mā tio̍h kakī 分別做聖，恐驚上主忽然出來kā in phah。」
19:23 摩西對上主講：「人民bē tàng上西奈山，因為祢已經禁戒阮講，tio̍h tī山ê四箍圍設界限，kā它分別做聖。』」
19:24 上主kā伊講：「你去，落去，你tio̍h kah亞倫起來；獨獨祭司kah人民m̄ thang chông過界來到上主ê面前，恐驚祂忽然出來kā in phah。」
19:25 摩西to̍h落去，去到人民hia，kā in講：
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。