以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
24:1 上主beh責罰世界
你看，上主hō͘地空虛，變做拋荒，koh kā大地翻liàn-tńg，hō͘ tòa tī hia ê人民四散。
24:2 Hit時，人民án怎，祭司mā ē ánne；奴僕án怎，主人mā ē ánne；女婢án怎，主母mā ē ánne；買物ê人án怎，賣物ê人mā ē ánne；放債ê人án怎，借債ê人mā ē ánne；the̍h利息ê人án怎，出利息ê人mā ē ánne。
24:3 地會做一下空虛，lóng tú tio̍h搶劫。因為chitê話是上主講ê。
24:4 地chiūⁿ悲哀衰退，世界腐敗衰退，地chiūⁿtiàm tī高位ê人mā腐敗。
24:5 地hō͘ tòa tī hit頂面ê人民òe lahsap，因為in犯tio̍h hiahê律法，廢除律例，koh違背永遠ê約。
24:6 所以，地hō͘咒詛吞滅，tòa tī hit頂面ê人mā受擬罪。地chiūⁿê人民受燒毀，所chhun落來ê人少少。
24:7 新酒悲哀，葡萄樹毀壞；心內快樂ê人lóng吐氣。
24:8 Phah鼓ê快樂lóng無去；宴樂ê聲音lóng soah，彈琴ê快樂mā lóng消失去。
24:9 In bē tàng唱歌lim酒；厚酒對lim ê人ē成做苦。
24:10 拋荒ê城已經拆毀，ta̍k間厝lóng關門，人lóng bē tàng入去。
24:11 Tī街路因為無酒thang lim，有悲哀ê聲；所有ê歡喜變做烏暗，地chiūⁿê快樂lóng消失去。
24:12 城內已經拋荒，城門lóng毀壞。
24:13 因為tī地chiūⁿ，tī萬民ê中間，ē親像受phah過ê橄欖樹，koh親像葡萄挽了所chhun落來ê。
24:14 Chiahê人ē出大聲，會歡喜叫。In為tio̍h上主ê威嚴，tùi海裡來大聲hoah。
24:15 因為ánne，lín tio̍h tī東方榮光上主；tī chiahê島嶼榮光上主—以色列上帝ê名。
24:16 阮聽tio̍h tùi地極有人唱歌，講：「榮光歸tī義ê人。」總是，我講：我消滅à！我消滅à！我有災禍！詭詐ê行詭詐，詭詐ê人大行詭詐。
24:17 地chiūⁿê人民，驚惶、陷坑kah活tauh lóng ē臨到你。
24:18 閃避驚惶ê聲ê人ē跋落陷坑；tùi陷坑起來ê人ēhō͘活tauh tauh tio̍h；因為天頂ê窗á lóng開，地ê根基mā振動。
24:19 地做一下破壞，地全部崩裂，地大搖動。
24:20 地會顛顛倒倒，親像酒醉ê人，koh搖來搖去，親像吊床。罪過重重teh in，致使in一定ē倒落去，bē tàng koh起來。
24:21 到hit日，上主ētī天頂責罰天頂ê眾軍兵，tī地chiūⁿ會責罰地chiūⁿê列王。
24:22 Inē受聚集，親像犯人受聚集tī陷坑，mā ē受關tī監內。真chē日了後，就ē有處罰臨到in。
24:23 Hit時，月會見笑，日會漏氣；因為萬軍ê上主ētī錫安山，tī耶路撒冷做王，tī祂ê長老ê面前ē有榮光。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。