箴言 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
14:1 智慧ê chabó͘人ta̍k个建立kakī ê家；戇ê chabó͘人親手拆毀家庭。
14:2 照正直來行ê人敬畏上主；獨獨做tāichì橫逆ê人藐視上主。
14:3 戇人ê嘴內有驕傲ê柺á；獨獨智慧人ê嘴唇會保惜kakī 。
14:4 厝若無牛，牛稠就空空；牛若有氣力，生產收成to̍h ē真chē。
14:5 真實ê見證無講白賊；假ê見證講白賊話。
14:6 侮慢ê人beh chhōe智慧，mā chhōe bē tio̍h；聰明ê人ē真緊得tio̍h智識。
14:7 行到戇人ê面前，to̍h ē看tio̍h伊ê嘴唇無智識。
14:8 通達ê人有智慧thang明白伊ê路；戇人ê戇to̍h是詭詐。
14:9 戇人掠犯罪做滾笑；正直人ê中間有和平。
14:10 Ta̍k人ê心ē知kakī ê艱苦；伊ê歡喜，外人mā無份。
14:11 Pháiⁿ人ê厝ē倒壞；正直人ê布棚會興旺。
14:12 有一條路人看做是正直，到尾會成做死亡ê路。
14:13 人teh笑ê時，心mā有憂悶；快樂ê結局mā ē變做悲傷。
14:14 心悖逆ê人ētùi伊ê所行來得tio̍h報應；好人mā ētùi伊kakī ê所行來得tio̍h報賞。
14:15 戇直ê人無一句話m̄信；通達ê人ta̍k步謹慎。
14:16 智慧ê人謹慎koh離開pháiⁿ事；戇人óa靠kakī 來放縱。
14:17 快受氣ê人做tāichì愚戇；計謀pháiⁿ事ê人ētú tio̍h怨恨。
14:18 戇直ê人承接愚戇做產業；通達ê人得tio̍h智識做冕旒。
14:19 Pháiⁿ人仆tī好人ê面前；罪人仆tī義人ê門口。
14:20 Sàn-chhiah人連厝邊都怨恨伊；好額人朋友真chē。
14:21 看輕厝邊ê人有罪；憐憫sànchhiah ê人有福氣。
14:22 計謀pháiⁿ事kám bē行入迷路？計謀好事ē得tio̍h憐憫kah誠實。
14:23 Ta̍k款ê勞苦lóng有利益；嘴唇講真chē話ē致到sànchhiah。
14:24 智慧人ê錢財會做in ê冕旒；戇人ê戇到尾mā是戇。
14:25 真實ê見證救人ê性命；講白賊ê人是詭詐。
14:26 敬畏上主ê人有堅固ê óa靠；伊ê kiáⁿ兒有逃閃ê所在。
14:27 敬畏上主to̍h是活命ê水泉，ē hō͘人離開死亡ê羅網。
14:28 人民chē是國王ê榮光；人民少ê君王ē致到衰敗。
14:29 Bē快受氣ê人有大聰明；躁性ê人ē顯出大愚戇。
14:30 心內平靜是肉體ê活命；怨妒ē hō͘骨頭朽爛。
14:31 對sànchhiah人刻薄是teh褻瀆創造主；憐憫欠缺ê人是尊敬主。
14:32 Pháiⁿ人tī伊所行ê pháiⁿ會tú tio̍h滅亡；義人到死iáu有ǹg望。
14:33 智慧安然tiàm tī聰明人ê心內；戇人ê腹內hō͘人看現現。
14:34 公義hō͘邦國高升；罪惡hō͘人民受凌辱。
14:35 用智慧做tāichì ê差用ē得tio̍h王ê恩惠；只有敗家ê人ētú tio̍h受氣。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。