箴言 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
10:1 所羅門ê箴言
所羅門ê箴言：智慧ê kiáⁿ hō͘老父歡喜；愚戇ê kiáⁿ hō͘老母憂悶。
10:2 不義ê錢財lóng無利益；只有公義ē救人脫離死亡。
10:3 上主無hō͘義人tú tio̍h iau餓；pháiⁿ人所欣慕ê tāichì，祂無hō͘它成功。
10:4 手pîntōaⁿ ê人ētú tio̍h sànchhiah；手骨力ê人ē得tio̍h好額。
10:5 熱天積聚米糧ê人是智慧ê kiáⁿ；收割ê時愛睏ê人是敗家ê kiáⁿ。
10:6 福氣臨到義人ê頭殼；強暴掩蓋pháiⁿ人ê嘴。
10:7 義人ê記念受oló；pháiⁿ人ê名一定是臭。
10:8 心內有智慧ê人ē聽受命令；嘴講戇話ê人ē失敗。
10:9 行正直路ê人行踏安穩；行彎曲路ê人露現原形。
10:10 使目尾來會意ê人hō͘人憂悶；嘴講戇話ê人ē失敗。
10:11 義人ê嘴是活命ê水泉；強暴掩蓋pháiⁿ人ê嘴。
10:12 怨恨會惹起相爭；疼心ē遮蓋所有ê過失。
10:13 Tī明理ê人嘴內chhōe tio̍h智慧；無知ê人ê尻脊骿有柺á便便。
10:14 智慧ê人積聚見識；戇人ê嘴會真緊失敗。
10:15 好額人ê財物是伊堅固ê城；sànchhiah人ê欠缺是伊失敗ê原因。
10:16 義人ê勞苦致使有活命；pháiⁿ人所thàn ê致使有罪。
10:17 聽受勸解是行tī活命ê路；棄sak責備to̍h是行迷路。
10:18 掩蓋怨恨ê人，嘴講白賊；譭謗人ê人是戇人。
10:19 厚話ê人bē免有過失；約束嘴舌ê人是有智慧。
10:20 義人ê舌親像紋銀；pháiⁿ人ê心無啥物價值。
10:21 義人ê嘴培養真chē人；戇人因為無知來死。
10:22 上主ê賜福hō͘人好額；內面無chham憂悶。
10:23 愚戇ê人掠行pháiⁿ做滾笑；總是，明理ê人掠智慧做歡喜。
10:24 Pháiⁿ人所驚ê tāichì會臨到伊；義人所意愛ê tāichìē得tio̍h允准。
10:25 狂風一下吹過，pháiⁿ人歸tī無；義人是永遠ê地基。
10:26 人差pîntōaⁿ人做tāichì，ná親像嘴齒tú tio̍h醋，目chiu tú tio̍h火煙。
10:27 敬畏上帝to̍h ē加添日子；總是，pháiⁿ人ê年歲會減少。
10:28 義人ê ǹg望是歡喜；pháiⁿ人ê欣慕是無chhái工。
10:29 上主ê路對正直ê人來講是城堡，對行pháiⁿ ê人來講是毀滅。
10:30 義人永遠無移徙；pháiⁿ人bē tàng tī地chiūⁿkhiā起。
10:31 義人ê嘴生出智慧；烏白講ê舌會hông割斷。
10:32 義人ê嘴唇知thang hō͘人歡喜；pháiⁿ人ê嘴烏白講話。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。