箴言 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
3:1 Hō͘少年人ê忠告
我ê kiáⁿ，m̄ thang bē記得我ê教示，你ê心tio̍h執守我ê誡命。
3:2 因為hiahê誡命ē kā久長ê日子、長ê歲壽kah平安加添hō͘你。
3:3 M̄-thang hō͘慈愛kah信實離開你；tio̍h縛tī你ê頷頸，刻tī你ê心碑。
3:4 Án-ne，你ētī上帝kah人ê面前得tio̍h恩典kah好名聲。
3:5 你tio̍h專心óa靠上主，m̄ thang óa靠你kakī ê gâu。
3:6 Tī你一切所做ê tāichì lóng tio̍h尊重祂，祂to̍h ē指示你ê路。
3:7 M̄-thang kakī 看做有智慧，tio̍h敬畏上主，離開pháiⁿ事。
3:8 這ē hō͘你ê身軀勇健，會滋潤你ê筋骨。
3:9 Tio̍h用你ê財物，kah你所有起頭熟ê農產物獻hō͘上主。
3:10 Án-ne，你ê粟倉會tīⁿ kah滿出來，你ê酒窟有新酒會滿出來。
3:11 我ê kiáⁿ，m̄ thang看輕上主ê警戒，mā m̄ thang討厭、看輕祂ê責備。
3:12 因為上主責備祂所疼ê人，親像老父teh責備伊所意愛ê kiáⁿ。
3:13 得tio̍h智慧kah聰明ê人，chit款人真有福氣。
3:14 因為得tio̍h智慧贏過得tio̍h銀，比得tio̍h純金khah有利益。
3:15 智慧比紅寶石khah貴氣，人所欣慕ê無一項kah她（註：「箴言」ê作者kā「智慧」人格化做女性）ē比得。
3:16 她ê正手有長歲壽，它ê倒手有好額kah尊貴。
3:17 她ê路是有快樂ê路，她ê道路lóng平安。
3:18 持守智慧ê人tùi它來得tio̍h活命，擒tiâu它ê人lóng有福氣。
3:19 上主用智慧建立地，用聰明安置天。
3:20 祂用祂ê智識hō͘深淵裂開，hō͘穹蒼滴露水。
3:21 我ê kiáⁿ，你tio̍h執守真ê智慧kah計畫；m̄ thang hō͘ in離開你ê目chiu 。
3:22 Án-ne chiah ēhō͘你ê靈魂得tio̍h活命，tī你ê頷頸成做súi ê打扮。
3:23 你to̍h ē tàng安然行你ê路，你ê腳mā bē踢tio̍h物件跋倒。
3:24 你倒leh，一定bē驚；你倒落去眠床，會真好睏。
3:25 忽然來ê驚惶，你m̄免驚；tú tio̍h pháiⁿ人beh kā你敗壞，你mā m̄免驚。
3:26 因為上主ē做你ê靠山；祂ē保守你ê腳步bē陷落羅網。
3:27 你ê手若有行好ê氣力，m̄ thang推辭，tio̍h the̍h hō͘需要幫贊ê人。
3:28 你若方便，m̄ thang對你ê厝邊講：「請tńg去，明á載 koh來，我chiah hō͘你。」
3:29 你ê厝邊安然tòa tī你ê附近，你m̄ thang設計來害伊。
3:30 人若m̄ bat陷害你，你m̄ thang無緣無故kah伊冤家。
3:31 M̄-thang欣羨強暴ê人，Mā m̄ thang揀伊所行ê路。
3:32 因為橫逆ê人是上主所討厭；正直ê人上主kah伊親密。
3:33 上主ê咒詛到tī pháiⁿ人ê厝；m̄ koh，好人ê厝上主賞賜福氣hō͘它。
3:34 侮慢人ê人，上主kā伊侮慢；上主施恩hō͘謙卑ê人。
3:35 智慧ê人ē承接榮光；愚戇ê人高升會成做見笑。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。