詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
119:1 上主ê律法
行為完全koh遵thàn上主律法ê人，chit款人真有福氣！
119:2 遵守祂見證ê話，專心走chhōe祂ê人，chit款人真有福氣！
119:3 In無做不義ê tāichì，in遵thàn祂ê道路。
119:4 祢bat kā祢教示ê話吩咐阮，ài阮慇勤遵守。
119:5 願我ê方向定tio̍h，來遵守祢ê律例。
119:6 我尊重祢所有ê誡命，to̍h bē致到見笑。
119:7 我學習祢公義ê判斷，我beh用正直ê心感謝祢。
119:8 我beh遵守祢ê律例；求祢m̄ thang kā我全部放sak！
119:9 順服上主ê律法
少年人tio̍h用啥物來清氣伊ê所做？是tio̍h照祢ê話來細膩行。
119:10 我專心走chhōe祢；求祢hō͘我m̄ thang偏離祢ê誡命。
119:11 我kā祢ê言語khǹg tī心內，免得我得罪祢。
119:12 上主ah，祢應該受oló！求祢kā祢ê律例教示我！
119:13 祢所講一切ê律例，我用嘴唇來宣揚。
119:14 我意愛祢教示ê道路，親像人意愛一切ê財物。
119:15 我beh恬恬思想祢教示ê話，mā beh注重祢ê道路。
119:16 我beh tī祢ê律例中kakī 快樂；我無bē記得祢ê話。
119:17 遵守上主律法ê快樂
求祢施大恩hō͘祢ê奴僕，hō͘我ē tàng活leh來遵thàn祢ê話。
119:18 求祢開我ê目chiu ，Hō͘我看出祢律法中ê奇妙。
119:19 我tī地chiūⁿ是做寄腳ê出外人，求祢m̄ thang對我蓋密祢ê誡命！
119:20 我時常迫切欣慕祢ê規例，致使我ê心強beh爆裂。
119:21 祢責備驕傲受咒詛ê人，to̍h是迷路離開祢ê誡命ê人。
119:22 求祢kā我除去人對我ê凌辱kah看輕，因為我有遵守祢ê教示。
119:23 貴族坐teh lāmsám議論我，m̄ koh，祢ê奴僕恬恬思想祢ê律例。
119:24 祢ê教示是我所歡喜ê，是我ê謀士。
119:25 決意遵守上主ê律法
我ê性命kha̍h-tiâu tī土沙粉；求祢照祢ê應允來kā我拯救！
119:26 我講起我所行ê路，祢有應答我；求祢kā祢ê律例教示我！
119:27 求祢hō͘我明白祢教示ê路，我thang恬恬思想祢ê奇事。
119:28 我ê心神因為憂苦來消熔；求祢照祢ê應允hō͘我勇健。
119:29 求祢hō͘我離開奸詐ê路，kā祢ê律法恩賜hō͘我！
119:30 我有揀信實ê路，kā祢ê律例hē tī我ê面前。
119:31 我戀慕祢ê教示；上主ah，求祢m̄ thang hō͘我見笑。
119:32 祢開闊我ê心ê時，我to̍h ē行祢誡命ê路。
119:33 求主賜智慧
上主ah，求祢kā祢律例ê路指示我，我beh徹底遵守！
119:34 求祢hō͘我智慧，我to̍h ē遵守祢ê律法，mā beh專心來執守。
119:35 求祢hō͘我行祢誡命ê路，因為chitê路是我所意愛ê。
119:36 求祢hō͘我ê心歸ǹg祢ê教示，無ǹg不義ê錢財。
119:37 求祢hō͘我ê目chiu oa̍t走無看虛假，koh hō͘我ē tàng行祢ê路來生活。
119:38 祢ê奴僕敬畏祢，求祢為伊堅守祢ê應允！
119:39 求祢hō͘我所驚ê凌辱離開我，因為祢ê律例是好。
119:40 我欣慕祢教示ê話；求祢tī祢ê公義hō͘我來活！
119:41 信靠上主ê律法
上主ah，願祢照祢ê應允，hō͘祢ê慈愛，to̍h是祢ê救恩臨到我，
119:42 我to̍h thang應答hiahê凌辱我ê人，因為我óa靠祢ê話。
119:43 求祢hō͘真理ê話無全部離開我ê嘴，因為我仰望祢ê判斷。
119:44 我beh tiāⁿ-tiāⁿ 遵守祢ê律法，直到永遠。
119:45 我beh行tī開闊ê所在，因為我有講究祢教示ê話。
119:46 我beh tī君王ê面前講論祢ê教示，mā bē感覺見笑。
119:47 我beh tī祢ê誡命中kakī 快樂，chiahê誡命是我平時所意愛ê。
119:48 我意愛祢ê誡命，我beh對它gia̍h起我ê手；我mā beh恬恬思想祢ê律例。
119:49 確信上主ê律法
求祢ē記得對祢ê奴僕所應允ê話，因為祢bat hō͘我有ǹg望。
119:50 祢ê應允hō͘我得tio̍h活命；我tī患難中tùi這得tio̍h安慰。
119:51 驕傲ê人一直kā我侮辱恥笑，總是，我m̄ bat偏離祢ê律法。
119:52 上主ah，我記念祢自早以來ê律例，我to̍h得tio̍h安慰。
119:53 我因為hiahê棄sak祢ê律法ê pháiⁿ人大受氣，親像火teh to̍h。
119:54 我tī寄腳ê所在，平時lóng用祢ê律例做詩歌。
119:55 上主ah，我暗時記念祢ê名，遵守祢ê律法。
119:56 我得tio̍h chitê福份，是因為我有守祢ê教示。
119:57 意愛上主ê律法
上主是我ê基業；我bat講：我beh遵守祢ê教示。
119:58 我bat專心求祢ê恩；願祢照祢ê應允憐憫我！
119:59 我深深思想我所行ê路，to̍h oa̍t-tńg身歸ǹg祢ê律例。
119:60 我遵守祢ê誡命，趕緊無延chhiân。
119:61 Pháiⁿ人ê索á kā我綑縛，總是，我無bē記得祢ê律法。
119:62 我因為祢公義ê判斷，半暝起來感謝祢。
119:63 見若敬畏祢koh遵守祢ê教示ê人，我kah in做朋友。
119:64 上主ah，祢ê慈愛遍滿地面；求祢kā祢ê律例教示我！
119:65 上主寶貴ê律法
上主ah，祢bat好款待祢ê奴僕，是照祢ê應允。
119:66 求祢kā好ê智慧kah智識教示我，因為我信靠祢ê誡命。
119:67 我未受苦以前有行迷路，總是，我taⁿ遵守祢ê律例。
119:68 祢是好，祢ê所做mā是好；求祢kā祢ê律例教示我！
119:69 驕傲ê人造作算bē了ê白賊話來攻擊我，總是，我beh專心遵守祢ê教示。
119:70 In ê心鈍親像hō͘油包密，總是，我意愛祢ê律法。
119:71 我ê受苦對我來講是有利益，因為hō͘我ē tàng學習祢ê律例。
119:72 祢所講ê律法對我有利益，贏過千萬ê金銀。
119:73 上主律法ê公正
祢ê手創造我，成全我；求祢hō͘我智慧thang來學習祢ê誡命！
119:74 敬畏祢ê人看tio̍h我to̍h ē歡喜，因為我有仰望祢ê教示。
119:75 上主ah，我知祢ê判斷是公義；祢hō͘我受苦是照祢ê信實。
119:76 求祢用祢ê慈愛安慰我，是照祢對祢ê奴僕ê應允。
119:77 願祢ê慈悲臨到我，hō͘我有活命，因為祢ê律法是我所意愛。
119:78 願驕傲ê人tú tio̍h見笑，因為in無理由枉屈我；總是，我beh恬恬思想祢ê教示。
119:79 願敬畏祢ê人歸向我，into̍h ē知祢ê教示。
119:80 願我ê心完全遵守祢ê律例，hō͘我bē致到見笑。
119:81 求主救助
我ê心神欣慕祢ê救恩到暈去，總是，祢ê話hō͘我有ǹg望。
119:82 我因為仰望祢ê話致到目chiu 花，我講：祢tang時beh安慰我？
119:83 因為我親像tī火煙中ê皮袋，總是，我無bē記得祢ê律例。
119:84 祢ê奴僕ê日子有gōa chē？祢tang時chiah beh審判迫害我ê人？
119:85 驕傲無遵thàn祢律法ê人，掘陷坑beh害我。
119:86 祢ê誡命全部lóng信實；in無緣無故迫害我，求祢幫贊我。
119:87 In險險á kā我tùi世間除滅，總是，我無放sak祢ê教示。
119:88 求祢照祢ê慈愛hō͘我活落去，我beh遵守祢ê嘴講出ê教示。
119:89 相信上主ê律法
上主ah，祢ê話確立tī天裡，直到永遠。
119:90 祢ê信實存到萬代；祢建立地，地就久長存在。
119:91 天地照祢ê定例到taⁿ iáu存在，因為萬物lóng是祢ê差用。
119:92 我若m̄是意愛祢ê律法，早to̍h tī我ê苦難中滅亡à！
119:93 我永遠無bē記得祢ê教示，因為祢用這hō͘我活落去。
119:94 我是祢ê，求祢救我，因為我有teh 走chhōe祢ê教示。
119:95 Pháiⁿ人teh當等我，beh kā我除滅，總是，我beh講究祢ê教示。
119:96 我看所有完全ê lóng是有限，只有祢ê誡命非常開闊。
119:97 愛慕上主ê律法
我意愛祢ê律法到án怎！我kui日恬恬teh思想。
119:98 祢ê誡命tiāⁿ-tiāⁿ kah我同在，hō͘我比我ê對敵khah有智慧。
119:99 我比所有ê老師khah通達，因為我恬恬teh思想祢ê律例。
119:100 我比老人khah明白，因為我有teh遵守祢ê教示。
119:101 我禁我ê腳，無行一切ê pháiⁿ路，hō͘我thang遵守祢ê教示。
119:102 我無偏離祢ê判斷，因為祢有教示我。
119:103 祢ê話tī我ê嘴內有gōa甜，tī我ê嘴內比蜜khah甜！
119:104 我tùi祢ê教示得tio̍h明白，所以，我怨恨所有ê斜路。
119:105 上主律法ê光
祢ê話做我腳前ê燈，做我路上ê光。
119:106 祢公義ê判斷，我bat chiùchōa beh遵守，我一定beh ánne行。
119:107 我受苦到極；上主ah，求祢照祢ê應允hō͘我活落去！
119:108 上主ah，求祢鑒納我ê嘴所歡喜獻ê oló，koh kā祢ê律例教示我。
119:109 我ê性命tiāⁿ-tiāⁿ tú tio̍h危險，我iáu koh無bē記得祢ê律法。
119:110 Pháiⁿ人設羅網beh害我，總是，我無偏離祢ê教示。
119:111 我用祢ê教示做永遠ê基業，因為這是我心所意愛ê。
119:112 我專心歸ǹg祢ê律例，永遠遵thàn，直到人生ê路尾。
119:113 上主律法ê安全
兩樣心ê人是我所痛恨；只有祢ê律法是我所意愛。
119:114 祢是我閃bih ê所在，koh是我ê藤牌；我仰望祢ê應允。
119:115 做pháiⁿ ê人，lín tio̍h離開我！ Hō͘我thang遵守我ê上主ê誡命。
119:116 求祢照祢ê應允扶持我，hō͘我活落去，mā無hō͘我因為所仰望ê來見笑。
119:117 求祢扶持我，我to̍h得救，我beh tiāⁿ-tiāⁿ 尊重祢ê律例。
119:118 見若行叉路離開祢ê律例ê人，祢看輕in；因為in ê詭詐是虛假。
119:119 世間ê pháiⁿ人，祢lóng親像糞埽kā in除去；因為ánne，我意愛祢ê教示。
119:120 我因為驚畏祢，kui身軀phi̍h-phi̍h chhoah；祢ê審判mā hō͘我驚惶。
119:121 遵守上主ê律法
我秉公行義，求祢m̄ thang kā我放hō͘壓制我ê人！
119:122 求祢保證祢ê奴僕thang得tio̍h好境遇，m̄ thang hō͘驕傲ê人kā我壓制！
119:123 我因為仰望祢ê救恩，kah祢公義ê應允，致到目chiu 花。
119:124 求祢照祢ê慈愛款待祢ê奴僕，kā祢ê律例教示我。
119:125 我是祢ê奴僕，求祢賜hō͘我智慧，hō͘我ēbat祢ê教示。
119:126 Chit-má是上主teh做tāichì ê時，因為有人beh廢除祢ê律法。
119:127 所以，我意愛祢ê誡命贏過金，mā贏過純金。
119:128 所以，祢所有ê教示我lóng掠做是正直；而且我怨恨一切ê斜路。
119:129 渴望遵守上主ê律法
祢ê教示真奇妙，所以，我ê心謹慎teh執守。
119:130 祢ê話一下開拆就發出光，hō͘戇人通達。
119:131 我開嘴直直喘，因為我迫切欣慕祢ê誡命。
119:132 求祢oa̍t tńg來看我，憐憫我，親像祢平常teh款待hiahê敬畏祢ê名ê人。
119:133 求祢用祢ê教示hō͘我ê腳步穩當，無容允啥物罪惡來管轄我。
119:134 求祢救贖我脫離人ê壓制，我to̍h ē tàng遵守祢ê教示。
119:135 願祢hō͘祢面ê光照祢ê奴僕，koh kā祢ê律例教示我。
119:136 我ê目屎親像溪水teh流，因為人無遵守祢ê律法。
119:137 上主律法ê公正
上主，祢是公義；祢ê判斷mā是公正。
119:138 祢所命令ê教示是照公義，非常信實。
119:139 我ê心tio̍h急親像火teh kā我燒死，因為我ê對敵bē記得祢ê話。
119:140 祢ê話鍛鍊到真精，所以，祢ê奴僕真意愛。
119:141 我卑微soah hō͘人看輕，總是，我無bē記得祢ê教示。
119:142 祢ê公義直到永遠；祢ê律法真實。
119:143 我tú tio̍h患難憂苦，總是，祢ê誡命是我所意愛。
119:144 祢ê教示永遠是公義；求祢賜hō͘我智慧，我to̍h ē tàng活落去。
119:145 求主解救
上主ah，我專心求叫祢，求祢應答我；我beh謹慎遵守祢ê律例。
119:146 我對祢求叫，求祢救我！我beh遵守祢ê教示。
119:147 我趁天iáu未光求叫祢；我仰望祢ê話。
119:148 暗時更iáu未深，我ê目chiu 已經nih開，因為我beh恬恬思想祢ê話。
119:149 求祢照祢ê慈愛聽我ê聲；上主ah，求祢用祢ê判斷來hō͘我ē活落去！
119:150 慣練行pháiⁿ ê人逼óa來；in離開祢ê律法遠遠。
119:151 上主ah，祢kah我同在；祢ê誡命lóng是真實！
119:152 我早to̍h講究祢ê教示，祢確立hiahê教示到永遠。
119:153 求主幫贊
求祢看顧我ê苦難來牽救我，因為我無bē記得祢ê律法。
119:154 求祢替我申冤，救贖我，照祢ê應允hō͘我活落去。
119:155 救恩離開pháiⁿ人遠遠，因為in無走chhōe祢ê律例。
119:156 上主ah，祢有大慈悲；求祢照祢ê判斷hō͘我活落去。
119:157 迫害我ê，抵敵我ê人真chē，總是，我無偏離祢ê教示。
119:158 我看tio̍h奸惡ê人to̍h真討厭，因為in無遵守祢ê教示。
119:159 祢看我án怎意愛祢ê教示！上主ah，求祢照祢ê慈愛 hō͘我活落去！
119:160 祢ê話ê總根頭是真實；祢一切公義ê判斷是永遠存在。
119:161 意愛上主ê律法
貴族無緣無故迫害我，總是，我ê心驚畏祢ê教示。
119:162 我意愛祢ê話，親像人得tio̍h真che7thâi贏ê物。
119:163 白賊話是我所痛恨，所討厭ê；祢ê律法是我所意愛ê。
119:164 我因為祢公義ê判斷，ta̍k日七pái oló祢。
119:165 疼惜祢ê律法ê人有大平安，無一項會纏絆in ê腳。
119:166 上主ah，我有teh仰望祢ê救恩，有遵行祢ê誡命。
119:167 我ê心有遵守祢ê教示；chiahê話，我非常意愛。
119:168 我有遵守祢ê教示kah祢ê律例，因為我一切ê所行lóng tī祢ê面前。
119:169 求助ê祈禱
上主ah，願我求叫ê聲透到祢ê面前，求祢照祢ê應允賞賜我智慧。
119:170 願我懇求ê話達到祢ê面前，求祢照祢ê應允牽救我。
119:171 願我ê嘴唇發出oló ê話，因為祢有kā祢ê律例教示我。
119:172 願我ê舌唱歌oló祢ê應允，因為祢所有ê誡命lóng是公義。
119:173 願祢伸手幫贊我，因為我有選擇祢ê教示。
119:174 上主ah，我迫切欣慕祢ê救恩！祢ê律法mā是我所意愛。
119:175 願我活leh thang hō͘我ê心神oló祢！願祢ê判斷幫贊我！
119:176 我迷路親像phah-m̄見ê羊，求祢kā祢ê奴僕chhōe倒tńg來，因為我無bē記得祢ê誡命。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。