詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
106:1 用仁慈對待祂ê子民
Lín tio̍h oló上主！Lín tio̍h感謝上主，因為祂是好；祂ê慈愛永遠存在。
106:2 啥人ē曉講起上主ê大權能？啥人ē tàng講出祂一切ê名聲？
106:3 見若遵守公平，tiāⁿ-tiāⁿ 行公義ê，chit種人to̍hē有福氣！
106:4 上主ah，祢用恩惠款待祢ê子民；求祢mā用這記念我，求祢hō͘救恩臨到我，
106:5 hō͘我看tio̍h祢揀選ê子民ê福氣，kah祢ê國做伙歡喜快樂，kah祢ê子民做伙榮光。
106:6 阮kah阮ê祖先仝款犯罪，阮作孽、行pháiⁿ。
106:7 阮ê祖先tī埃及無明白祢所做ê奇事，bē記得祢豐盛ê慈愛，反tńg tī紅海行悖逆。
106:8 M̄ koh，祂為tio̍h kakī ê名kā in拯救，來顯明祂ê大權能。
106:9 Koh hoah紅海，海就乾；祂chhōa in經過深ê所在，ná親像teh經過曠野。
106:10 祂救in脫離怨恨in ê人ê手，tùi對敵ê手中kā in救贖。
106:11 水淹死in ê對敵，無留kah半個。
106:12 Hit時，in chiah信祂ê話，唱歌oló祂。
106:13 In真緊to̍h bē記得祂ê所做，無thèng候祂ê指示。
106:14 反tńg tī曠野大起貪慾，tī拋荒ê所在試探上帝。
106:15 祂kā in所求ê lóng hō͘ in，M̄ koh，hō͘ in ê神魂衰lám。
106:16 In koh tī營中怨妒摩西kah上主聖別个亞倫。
106:17 地to̍h裂開，吞滅大坍，掩密亞比蘭hit陣人。
106:18 有火tī hit陣人中間發起；有火焰燒滅hiahê pháiⁿ人。
106:19 In tī何烈山造牛á，仆拜in所鑄ê偶像。
106:20 Án-ne，kā in ê榮光換做食草ê牛á像。
106:21 In bē記得拯救in ê上帝；祂bat tī埃及對in做大tāichì，
106:22 tī含ê地行奇事，tī紅海行thang驚ê tāichì。
106:23 所以，祂講beh kā in消滅；若m̄是有祂所揀選ê摩西khiā tī祂ê面前來挽回祂ê受氣，祂早to̍h kā in滅亡à。
106:24 In koh看輕hitê好ê地，m̄信祂ê話。
106:25 In tī in布棚內發出怨恨ê話，m̄聽thàn上主ê話。
106:26 所以，祂對in gia̍h手chiùchōa：beh hō͘ in死tī曠野，
106:27 Hō͘ in ê kiáⁿ孫死tī列國ê中間，四散tī ta̍k所在。
106:28 In koh去拜毗珥ê巴力，食祭獻hō͘無活命ê神明ê祭物。
106:29 In ánne做惹起祂ê受氣，to̍h有瘟疫tī in中間流行。
106:30 Hit時，非尼哈出來為in排解，瘟疫chiah soah。
106:31 Chitê tāichì上帝kā它算做是義，世世代代，一直到永遠。
106:32 In tī米利巴ê水泉koh hō͘上主受氣，甚至摩西為tio̍h in ê緣故mā受連累；
106:33 是因為in忤逆in ê上帝，致使摩西講出躁性倉pōng ê話。
106:34 上主kā in吩咐tio̍h剿滅hiahê人民，in無遵thàn上主，
106:35 反tńg kah外邦人混雜通婚，學in ê所做，
106:36 服事in ê偶像，結果成做害in ê陷阱。
106:37 In kā in ê kiáⁿ兒做祭物，來獻hō͘鬼神，
106:38 in流無罪ê人ê血，to̍h是in ê kiáⁿ兒ê血，kā in做祭物獻hō͘迦南ê偶像，hitê地to̍h hō͘血òe lahsap。
106:39 Án-ne，in hō͘ kakī ê行為òe lahsap，tī in ê所做犯tio̍h淫行。
106:40 所以，上主對祂ê子民發出受氣，討厭祂ê產業—以色列。
106:41 祂kā in交hō͘外邦人ê手；怨恨in ê人to̍h kā in管轄。
106:42 In ê對敵mā kā in壓制，in to̍h屈服tī對敵ê手下。
106:43 上主真chē pái kā in拯救，m̄ koh，in tī in ê計謀中悖逆祂；因為kakī ê罪惡soah致到墮落。
106:44 祂聽tio̍h in teh哀叫ê時，iáu koh體貼in ê危急。
106:45 祂為tio̍h in來記念祂ê約，照祂豐盛ê慈愛回心轉意，
106:46 祂mā hō͘ in tī所有掠in ê人ê面前得tio̍h憐憫。
106:47 上主—阮ê上帝ah，求祢拯救阮，tùi外邦中kā阮聚集；thang hō͘阮感謝祢ê聖名，掠祢ê受oló做大歡喜。
106:48 Tio̍h oló上主—以色列ê上帝，tùi永遠到永遠。願眾人lóng講：阿們！Lín tio̍h oló上主！
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。