詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
80:1 為復國祈禱
（亞撒ê詩，交hō͘樂官；調用「做見證ê百合花。」）Chhōa約瑟親像teh chhōa羊群ê以色列ê牧者ah，求祢àⁿ耳孔聽；坐tī ki-lō͘-peng ê頂面ê主ah，求祢發出祢ê光。
80:2 Tī以法連、便雅憫kah瑪拿西ê面前，求祢施展祢ê權能來救阮。
80:3 上帝ah，求祢hō͘阮倒tńg來，hō͘祢ê面發出光，阮to̍h ē得救。
80:4 萬軍ê上帝—上主ah，祢對祢子民ê祈禱發出受氣ē koh gōa久？
80:5 祢用目屎做食物hō͘ in食，koh用真chē目屎hō͘ in lim。
80:6 祢hō͘隔壁國因為阮來相爭，阮ê對敵做伙teh笑阮。
80:7 萬軍ê上帝ah，求祢hō͘阮倒tńg來，hō͘祢ê面發出光，阮to̍h得救。
80:8 祢tùi埃及徙出一欉葡萄樹，趕出列邦來kā它栽種。
80:9 祢tī它ê頭前piàⁿ空土地，它ê根釘深，to̍h生湠滿地。
80:10 它ê影遮密chiahê山，它ê枝親像真好ê柏香樹。
80:11 它發出它ê枝，伸到大海，它ê籐湠到大河。
80:12 祢ná ē拆毀它ê籬笆，chhut-chāi所有過路ê人來挽？
80:13 樹林內出來ê山豬kā它蹧躂；曠野ê走獸來kā它食。
80:14 萬軍ê上帝ah，求祢倒tńg來！求祢tùi天àⁿ落來看，照顧chit欉葡萄樹，
80:15 保護祢正手所栽ê樹，kah祢為kakī 所堅固ê枝。
80:16 葡萄樹已經受火燒，受刀剉；求祢對in發受氣，in to̍h滅亡。
80:17 願祢ê手hōaⁿ tī祢正pêng ê人，to̍h是祢為kakī 所堅固ê人子。
80:18 Án-ne，阮to̍h無倒退離開祢；求祢hō͘阮得tio̍h活，阮to̍h beh求叫祢ê名。
80:19 萬軍ê上帝—上主ah，求祢hō͘阮倒tńg來，hō͘祢ê面發出光，阮to̍h得救！
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。