詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
78:1 上帝kah祂ê子民
（亞撒教示ê詩。）我 ê子民，lín tio̍h聽我ê教示，àn耳孔聽我所講ê話。
78:2 我beh開嘴講譬喻；我beh講出古早ê奧秘，
78:3 to̍h是阮所聽tio̍h，所知ê，mā是阮ê祖先傳hō͘阮ê tāichì。
78:4 阮無beh kā chiahê tāichì對in ê kiáⁿ孫隱瞞，beh kā上帝ê名聲kah祂ê權能，以及祂所做奇妙ê tāichì傳hō͘後世代。
78:5 因為祂tī雅各立見證ê話，tī以色列設律法；祂命令咱ê祖先來傳hō͘ in ê kiáⁿ孫，
78:6 hō͘後代，to̍h是teh beh出世ê kiáⁿ孫知；然後koh傳hō͘ in ê kiáⁿ-kiáⁿ孫孫，
78:7 hō͘ in thang仰望上帝，無bē記得全能上帝ê作為，來遵守祂ê誡命。
78:8 免得in親像in ê祖先，是硬心悖逆ê世代，是存心無四正ê世代，in仰望上帝ê心無堅固。
78:9 以法連ê kiáⁿ孫gia̍h武器kah弓箭，臨陣ê日，oa̍t-tńg身逃走。
78:10 In無遵守上帝ê約，m̄肯照祂ê律法來行。
78:11 Koh bē記得祂ê作為kah祂所hō͘ in看ê奇妙tāichì。
78:12 祂tī埃及地，瑣安ê田，tī in祖先ê目chiu 前行奇異ê tāichì。
78:13 祂kā海分開hō͘ in過去，koh hō͘水親像土壁khiā起來。
78:14 祂日時用雲chhōa in，koh kui暝用火ê光chhōa in。
78:15 祂tī曠野hō͘石磐裂開，hō͘ in有真chē水thang lim，親像tùi深淵chhèng出來。
78:16 祂hō͘水tùi石磐chhèng出來，hō͘水親像江河流落來。
78:17 In猶原tiāⁿ-tiāⁿ 得罪祂，tī乾燥ê地悖逆至koân ·ê。
78:18 In心內試探上帝，照in kakī 所意愛ê求食物。
78:19 In lāmsám議論上帝，講：全能ê主tī曠野kám ē辦桌？
78:20 祂bat phah石磐hō͘水chhèng出來，江河滿出來；祂kám ē賞賜米糧？祂kámē kā祂ê子民準備肉？
78:21 所以，上帝聽tio̍h就受氣，用焰火燒雅各ê家，對以色列族發受氣；
78:22 因為in m̄信服上帝，m̄ óa靠祂ê救恩。
78:23 總是，祂命令tī頂面ê穹蒼，koh開天ê門；
78:24 祂親像落雨，降落嗎哪hō͘ in食，kā天ê米糧賞賜hō͘ in。
78:25 人食大權能ê ê食物；上帝賞賜米糧hō͘ in飽足。
78:26 祂tùi天起東風，用祂ê權能chhōa南風來。
78:27 祂降落肉tī in中間，chē kah親像土沙粉，koh有飛鳥chē kah親像海沙，
78:28 落tī in ê營中，tī in tòa ê布棚ê四箍圍。
78:29 In就食到飽飽；祂照in所意愛ê hō͘ in。
78:30 In ê所意愛ê iáu未飽足，食物iáu tī in ê嘴內ê時，
78:31 上帝to̍h對in發受氣，kā in中間勇壯ê人thâi死，phah倒以色列ê少年人。
78:32 雖然ánne，in猶原koh犯罪，無因為上帝奇妙ê作為來信祂。
78:33 所以，祂hō͘ in空空過日，hō͘ in年年tī驚惶中經過。
78:34 上帝thâṳn ê時，in chiah來求祂；in oa̍t倒tńg迫切求上帝。
78:35 In mā追念上帝是in ê石磐，至koân全能上帝是in ê救贖主。
78:36 總是，in用嘴kā祂扶挺，卻用舌對祂講白賊。
78:37 因為in對祂無忠實，無盡忠守祂ê約。
78:38 總是，祂有憐憫；祂赦免in ê罪過，祂無kā in消滅，koh tiāⁿ-tiāⁿ 消祂ê受氣，無全部發出祂ê受氣。
78:39 祂帶念in只不過是血氣ê人，是吹過去無koh倒tńg來ê風。
78:40 In tī曠野悖逆祂，tī拋荒ê所在hō͘祂憂悶，到hiah chē pái！
78:41 In再三試探上帝，不斷抵觸以色列ê聖ê。
78:42 In bē記得祂ê權能，mā bē記得救贖in脫離對敵ê日。
78:43 祂tī埃及án怎顯出祂ê神跡；tī瑣安田án怎顯出奇事；
78:44 祂kā in ê江河變做血，in ê港mā是ánne，致到lóng bē lim得。
78:45 祂hō͘胡蠅kui陣到in中間來kā in沾，koh hō͘田蛤á來kā in損害。
78:46 祂kā in ê農產物交hō͘蟲thōa，kā in勞苦得tio̍h ê物交hō͘草蜢。
78:47 祂落雹來毀壞in ê葡萄樹，落霜來毀壞in ê桑材樹。
78:48 祂koh kā in ê chengseⁿ交hō͘雹，kā in kui群ê chengseⁿ交hō͘ sihnà。
78:49 祂發出大受氣、受氣、痛恨kah苦難，kui陣降災禍ê使者lóng來到in中間。
78:50 祂為tio̍h kakī ê受氣鋪平祂ê路，hō͘ in ê性命bē免得死，祂kā in ê活命交hō͘瘟疫。
78:51 Tī埃及phah死所有ê大kiáⁿ，tī含ê布棚內phah死in ê大kiáⁿ。
78:52 總是，祂親像teh chhōa羊kā kakī ê子民chhōa出來，tī曠野chhōa in親像teh chhōa羊群。
78:53 祂chhōa in，hō͘ in安穩，hō͘ in無驚惶，hō͘海淹死in ê對敵。
78:54 祂koh chhōa in來到聖地ê交界，來到祂用正手所得tio̍h ê山。
78:55 祂tī in ê面前kā列邦ê人趕出去；用索á kā外邦人ê地量hō͘ in做產業；hō͘以色列ê支族tòa外邦人ê布棚。
78:56 In猶原koh teh試探至koân上帝，koh teh悖逆祂，無守祂見證ê話。
78:57 In kah in ê祖先仝款失信悖逆，親像弓péng liàn-tńg ánne變款。
78:58 In用山頭ê祭壇惹起祂ê受氣；拜in雕刻ê偶像來hō͘祂痛恨。
78:59 上帝聽tio̍h就受氣，大大討厭以色列。
78:60 祂甚至棄sak示羅ê會幕，to̍h是祂tī人ê中間所搭ê布棚。
78:61 祂koh kā祂ê約櫃（註：原譯本是氣力）交hō͘人搶去，kā祂ê榮光交tī對敵ê手。
78:62 祂mā kā祂ê子民交hō͘刀劍，對祂ê家業發受氣。
78:63 In ê少年人hō͘火燒滅；in ê在室女無得tio̍h人ê賀喜。
78:64 祭司倒tī刀下，守寡ê人mā無啼哭。
78:65 Hit時，主親像人睏精神，親像勇猛ê人lim酒了後teh hoah。
78:66 祂phah退祂ê對敵，hō͘ in永遠受凌辱；
78:67 而且祂棄sak約瑟ê布棚，無揀選以法連ê支族，
78:68 總是，祂揀選偤大ê支族，祂所意愛ê錫安山；
78:69 Koh起造祂ê聖所，高kah親像天，koh親像祂建立永遠存在ê地；
78:70 祂koh揀選祂ê奴僕—大衛，chhōa伊tùi羊椆出來。
78:71 祂hō͘大衛無koh tòe hiahê羊母，beh hō͘伊養飼上帝ê子民—雅各kah祂ê家業以色列。
78:72 大衛就照伊心內ê正直kā in養飼，koh用伊老練ê手引chhōa in。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。