詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
37:1 好人kah Pháiⁿ人ê命運
（大衛ê詩。) M̄-thang因為做pháiⁿ ê人來心內不平，mā m̄ thang怨妒行為不義ê人。
37:2 因為in親像草真緊hō͘人割掉，koh親像青翠ê菜lian去。
37:3 Tio̍h óa靠上主來做好，tiàm tī chitê土地用誠實做米糧。
37:4 Tio̍h掠上主做歡喜，祂ē kā你ê所求hō͘你。
37:5 Tio̍h kā你ê tāichì交帶上主，koh óa靠祂，祂ē kā你成全。
37:6 祂ēhō͘你ê義親像光發出，你ê判斷親像中晝ê光。
37:7 Tio̍h恬恬tī上主ê面前吞忍thèng候；m̄ thang因為pháiⁿ人ê計謀成功來不平。
37:8 Tio̍h soah受氣，離開大受氣；m̄ thang不平，恐驚ē因為ánne來做pháiⁿ。
37:9 因為做pháiⁿ ê人ē受剿滅；只有thèng候上主ê人ē tàng承接土地。
37:10 因為koh一時á，pháiⁿ人to̍h ē死去；你若beh詳細查伊ê所在，mā lóng chhōe bē tio̍h。
37:11 只有謙卑ê人ē tàng承接土地，享受平安kah豐盛ê喜樂。
37:12 Pháiⁿ人設計謀beh害義人，Koh對伊痛恨咬牙切齒。
37:13 主ē kā伊恥笑，因為看tio̍h伊受報應ê日子teh beh到。
37:14 Pháiⁿ人拔刀開弓，beh phah倒困苦sànchhiah ê人，behthâi死行為正直ê人。
37:15 In ê刀鑿入去kakī ê心，in ê弓會hông at斷。
37:16 義人所有ê雖然少少，卻贏過真chē pháiⁿ人ê富裕。
37:17 因為pháiⁿ人ê手會hông at斷，獨獨上主扶持義ê人。
37:18 上主看顧完全ê人ê日子；in ê產業ē永遠存在。
37:19 In tī患難ê時bē致到見笑，tī飢荒ê日子ē得tio̍h飽足。
37:20 總是，pháiⁿ人ē滅亡。上主ê對敵ē親像草埔ê一時茂盛；無久to̍h ē親像火煙消滅去。
37:21 Pháiⁿ人kā人借，無beh還；m̄ koh義人行憐憫，kā人施捨。
37:22 上主賜福ê人ē承接應允ê土地；Hō͘祂咒詛ê人ēhông滅亡。
37:23 義人ê腳步是上主所安置，而且上主意愛義人ê路。
37:24 伊雖然跋倒，mā無kah kui身siak落去，因為上主用手kā伊扶teh。
37:25 我前少年，taⁿ年老，總是，m̄ bat看tio̍h義人hông放sak，致使伊ê kiáⁿ孫做乞食。
37:26 伊kui日憐憫人，歡喜借人，伊ê kiáⁿ孫得tio̍h祝福。
37:27 你tio̍h離開pháiⁿ，做好事，chiah ē tàng永遠khiā在。
37:28 因為上主意愛公平，無放sak祂聖ê子民；in永遠受保護，只有pháiⁿ人ê kiáⁿ孫ē受剿滅。
37:29 義人ē承接應允ê土地，永遠tòa tī hia。
37:30 義人ê嘴講智慧；伊ê嘴舌談論公平。
37:31 伊tī伊ê心內有上帝ê律法；伊ê腳lóng bē踏thu̍t去。
37:32 Pháiⁿ人目chiu 金金teh siòng義人，siàu想beh kā伊thâi。
37:33 上主bē放伊落tī pháiⁿ人ê手；審判ê時mā無定伊ê罪。
37:34 你tio̍h thèng候上主，遵守祂ê道路，祂就ē kā你高升，hō͘你承接應允ê土地；你ē看tio̍h pháiⁿ人受剿滅。
37:35 我bat看tio̍h pháiⁿ人有大勢力，Koh tī伊ê本土地發達，親像茂盛ê樹。
37:36 有人tùi hia經過，你看，伊死去à；我chhōe mā lóng chhōe bē tio̍h。
37:37 你tio̍h詳細看hitê完全koh正直ê人，因為和平ê人有好ê結局。
37:38 若是犯法ê人ē做一下滅亡；pháiⁿ人ê結局是受剿滅。
37:39 總是，義人ētùi上主得tio̍h救；患難ê時，上主ē做in ê營寨。
37:40 上主kā in幫贊，kā in拯救；祂救in脫離pháiⁿ人，因為in有óa靠祂。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。