詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
18:1 大衛ê凱旋
（撒下22：1-51）
（上帝ê奴僕—大衛ê詩；交hō͘樂官。當上主救伊脫離所有ê對敵kah掃羅ê手ê日，伊對上主吟chit首詩ê話，講：）上主—我ê氣力ah，我疼祢。
18:2 上主是我ê山巖，我ê山寨，我ê救主；我ê上帝，我ê石磐，我beh óa靠祂；祂是我ê藤牌，是救我ê號角，是我ê城堡。
18:3 我beh求叫應該tio̍h oló ê上主，我to̍h ē得tio̍h救，來脫離我ê對敵。
18:4 死亡ê索á纏我，匪類ê大水hō͘我驚。
18:5 陰間ê索á圍困我，死亡ê羅網臨到我。
18:6 我tī苦難中祈求上主，對我ê上帝求叫；祂tùi祂ê殿內聽tio̍h我ê聲，我tī祂面前ê懇求有入去祂ê耳孔。
18:7 因為祂受氣，地就搖choah；山ê地基mā振動搖choah。
18:8 Tùi祂ê鼻孔chhèng出煙；tùi祂ê嘴內發出火，土炭就ánne to̍h起來。
18:9 祂tùi天頂降落來，親身臨到，祂ê腳前暗bong-bong。
18:10 祂騎ki-lō͘-peng teh飛；祂用風ê翼飛落來。
18:11 祂用烏暗做bih身ê所在，祂用水kah密雲圍起來做帳房。
18:12 有雹kah teh to̍h ê火炭tùi祂頭前ê光射出來，突破烏暗ê密雲。
18:13 上主tī天裡起雷，至koân ·ê出祂ê聲，koh有雹kah teh to̍h ê火炭。
18:14 祂射出祂ê箭，hō͘對敵四散；發出真chē sihnà hō͘ in混亂。
18:15 上主ah，祢ê責備一下發，祢ê鼻孔ê氣一下出，海底to̍h出現，大地ê根基mā露現。
18:16 祂tùi頂面伸手khiú我，tùi大水ê中間kā我救出來。
18:17 祂救我脫離兇猛ê對敵，以及hiahê怨恨我ê人，因為in比我khah強。
18:18 我tú tio̍h災難ê日，in來攻擊我；總是，上主是我ê靠山。
18:19 祂mā chhōa我來到開闊ê所在；祂救我，因為祂意愛我。
18:20 上主照我ê義報答我，照我手ê清氣報賞我。
18:21 因為我遵守上主ê道路，m̄ bat做pháiⁿ來離開我ê上帝。
18:22 祂ê律例lóng tī我ê面前；祂ê禮儀，我m̄ bat棄sak。
18:23 我tī祂ê面前成做完全，我mā保守kakī ，離開我ê罪惡。
18:24 所以，上主報賞我，是照我ê義，mā是照我tī祂ê目chiu 前所做ê清氣。
18:25 慈愛ê人，祢用慈愛對待伊；完全ê人，祢用完全對待伊。
18:26 清氣ê人，祢用清氣對待伊；乖僻ê人，祢用彎曲對待伊。
18:27 困苦ê人，祢kā伊救；自高ê目chiu ，祢kā它降低。
18:28 祢會點to̍h我ê燈；上主—我ê上帝ē照光我ê烏暗。
18:29 因為我óa靠祢，ē tàng攻破對敵；óa靠我ê上帝，ē tàng跳過牆。
18:30 Chit位上帝，祂ê道路完全；上主ê話有經過鍛鍊；見若óa靠祂ê，祂to̍h做in ê藤牌。
18:31 上主以外，啥人是上帝？阮ê上帝以外，啥人是石磐？
18:32 to̍h是hit位用氣力縖我ê腰，hō͘我ê路完全ê上帝。
18:33 祂hō͘我ê腳親像鹿母ê腳，koh kā我安置tī koân ê所在。
18:34 祂教練我ê手gâu交戰，hō͘我ê手骨會開銅ê弓。
18:35 祢kā救恩ê藤牌hō͘我，祢用正手扶持我，祢ê溫和hō͘我做大。
18:36 祢hō͘我所踏ê地開闊；我ê腳m̄ bat踏chhū去。
18:37 我beh jiok我ê對敵，mā ējiok tio̍h in；in iáu未滅亡 chìn前，我無beh倒tńg去。
18:38 我beh kā in phah kah thiám-thiám，致使in peh bē起來；in ē倒tī我ê腳前。
18:39 祢bat用氣力縖我ê腰，hō͘我gâu交戰；祢hō͘ hiahê起來攻擊我ê lóng屈服tī我ê下面。
18:40 祢mā hō͘我ê對敵oa̍t-tńg身逃走；hō͘我ē tàng剿滅hiahê怨恨我ê人。
18:41 In求叫，mā無人救in；to̍h是求叫上主，祂mā無應。
18:42 我kā in搥kah碎碎，親像土沙粉hō͘風吹散去；kā in piàⁿ出去，親像teh piàⁿ街路ê土糜。
18:43 祢救我脫離人民ê鬥爭，祢設立我做列邦ê頭；我本來m̄ bat ê人民ē服事我。
18:44 In一下聽tio̍h我ê名to̍h順服我；異邦ê人ē來投降。
18:45 異邦ê人ē衰退，驚kah phi̍h-phi̍h chhoah，行出in ê營寨。
18:46 上主是永遠活ê。願我ê石磐得tio̍h oló；願救我ê上帝得tio̍h高升。
18:47 為我申冤ê hit位上帝，祂hō͘眾人屈服tī我ê腳下。
18:48 上主ah，祢救我脫離我ê對敵，祢kā我提升到比來攻擊我ê人khah koân；祢救我脫離強暴ê人。
18:49 上主ah，因為ánne，我beh tī列邦中感謝祢，唱歌oló祢ê名。
18:50 上主賞賜極大ê救恩hō͘祂所設立ê王；施落慈愛hō͘受祂抹油ê人，to̍h是hō͘大衛kah伊ê kiáⁿ孫，直到永遠。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。