歷代志下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
20:1 以東ê戰爭
Chit時了後，摩押人kah亞捫人，koh有Mi-u-nî人做伙來，beh kah約沙法交戰。
20:2 有人來報約沙法講：「Tùi海外kah tùi亞南hia有大軍隊來攻擊你，taⁿ in tī Ha-cha-chóng-tha-mal。」Ha-cha-chóng-tha-mal to̍h是隱基底。
20:3 約沙法就驚，定tio̍h意思beh懇求上主，tī偤大全地宣布禁食。
20:4 就ánne，偤大人聚會，求上主幫贊。偤大ta̍k个城lóng有人出來走chhōe上主。
20:5 約沙法to̍h tī偤大kah耶路撒冷ê會中，khiā tī上主殿ê新院ê頭前，講：
20:6 「上主—阮ê祖先ê上帝ah，祢kám m̄是tī天裡ê上帝？祢kám m̄是列邦萬國ê主宰？Tī祢ê手有權能koh有氣力，無一个人ē tàng抵敵祢。
20:7 阮ê上帝ah，祢kám m̄是bat tī祢ê子民—以色列人ê面前趕逐tòa tī chit所在ê人民，kā伊賞賜hō͘祢ê朋友—亞伯拉罕ê kiáⁿ孫，直到永遠？
20:8 「In就tòa tī chitê所在，koh因為祢ê名tī chia kā祢起一間聖所，講：
20:9 『設使有災禍臨到阮，á是刀劍、譴責，á是瘟疫、飢荒，當患難ê時，阮會khiā tī chit間ê頭前，tī祢ê面前懇求祢，因為祢ê名是tiàm tī chit間殿，祢ē聽阮ê祈求來拯救。』
20:10 「早前以色列人出埃及地ê時，祢m̄准in侵犯亞捫人、摩押人kah 西珥山人，阮to̍h離開in，無kā in消滅。
20:11 你看，in taⁿ án怎kā阮報應，來kā阮趕出祢ê產業，to̍h是祢賞賜hō͘阮承接ê。
20:12 阮ê上帝ah，祢kám無beh kā in責罰？因為阮無力thang抵擋chitê來攻擊阮ê大軍隊，阮mā m̄知tio̍h án怎行，阮ê目chiu 硬硬beh ǹg祢。」
20:13 偤大群眾kah in ê細漢gín-á、in ê bó͘、in ê kiáⁿ兒，lóng khiā tī上主ê面前。
20:14 Hit時，上主ê聖神tī議會中臨到雅哈悉，伊是利未人亞撒ê kiáⁿ孫，瑪探雅ê玄孫，耶利ê干á孫，比拿亞ê孫，撒迦利雅ê kiáⁿ。
20:15 祂講：「偤大群眾，tòa tī耶路撒冷ê人民kah約沙法王—你，lóng tio̍h聽，上主對lín ánne講：『M̄-thang因為chitê大軍隊來驚，來懍，因為chitê交戰m̄是在tī lín，to̍h是在tī上帝。
20:16 明á載，lín tio̍h落去接陣，in tùi Sé-su山坪上來，línē tī E-lu-el曠野頭前ê山谷口tú tio̍h in。
20:17 Chit pái lín m̄免交戰，偤大kah耶路撒冷，lín tio̍h排陣khiā ·leh，看上主來拯救lín。M̄免驚，m̄免懍，明á載tio̍h出去in hia，因為上主kah lín同在。』」
20:18 約沙法就àⁿ頭仆tī土腳，偤大群眾kah tòa tī耶路撒冷ê人民，mā lóng仆tī上主ê面前，敬拜上主。
20:19 哥轄族kah可拉族ê利未人lóng khiā起來，出極大ê聲來oló上主—以色列ê上帝。
20:20 隔tńg工，in早早起來，出去提哥亞ê曠野。出去ê時，約沙法khiā-teh講：「偤大人kah tòa tī耶路撒冷ê人民，tio̍h聽我講，lín tio̍h信上主—lín ê上帝，to̍h khiā會在，信祂ê先知to̍h ē興通。」
20:21 伊kah人民議論了後，to̍h設立唱歌oló上主ê，hō͘ in穿聖koh súi ê衫，行tī軍隊ê頭前oló上主，講：「Tio̍h感謝上主，因為伊ê慈愛永遠tī ·leh。」
20:22 In tú-á唱歌oló ê時，上主to̍h派埋伏ê兵攻擊hiahê來攻擊偤大ê亞捫、摩押kah西珥山ê人，in to̍h受phah。
20:23 因為亞捫kah摩押人起來攻擊tòa tī西珥山ê人，kā in全部thâi死滅掉；kā tòa tī西珥ê人全部消滅了後，in ta̍k个分pêng互相剿滅。
20:24 偤大人到曠野ê守望樓，看tio̍h hiahê大軍隊，你看，身屍倒tī地裡，無kah一个走離。
20:25 約沙法kah伊ê人民來搶in ê財物，tī in中間chhōe tio̍h真chē財物、衫褲kah寶貝，in剝來變做kakī ê，chē kah帶bē去。In搶物到三日，因為真chē。
20:26 第四日，in聚集tī Be-la-ka ê山谷。因為in tī hia oló上主，所以，hit所在ê名叫做Be-la-ka山谷，到tī今á日。
20:27 Into̍h tńg去，to̍h是偤大kah耶路撒冷ê人，約沙法 tī in ê頭前，大家歡喜tńg去耶路撒冷，因為上主hō͘ inthâi贏對敵，來歡喜快樂。
20:28 In彈琴、彈瑟、pûn鼓吹，tńg來耶路撒冷，來到上主ê殿。
20:29 列邦chiahê國聽tio̍h上主thâi贏以色列ê對敵，就驚上帝。
20:30 Án-ne，約沙法ê國太平，因為伊ê上帝賞賜伊四箍圍平安。
20:31 約沙法統治結束
(王上22：41-50)
約沙法做偤大王，坐位ê時三十五歲，tī耶路撒冷做王歷過二十五年。伊ê老母ê名叫做A-chu-bah，to̍h是Sil-hí ê chabó͘ kiáⁿ。
20:32 約沙法照ánne行伊ê老父亞撒ê路，無偏歪，行上主所看做好ê tāichì。
20:33 總是，山頭壇iáu未廢除，而且人民mā iáu未定tio̍h心意beh歸向in祖先ê上帝。
20:34 約沙法其他ê tāichì，tùi頭到尾lóng記tī哈拿尼ê kiáⁿ耶戶ê冊，hitê冊mā列tī以色列列王ê冊。
20:35 Hit時了後，偤大王約沙法kah以色列王亞哈謝結交；亞哈謝行pháiⁿ到極。
20:36 兩 个王做伙造船beh去他施，to̍h tī以旬迦別造船。
20:37 Hit時，瑪利沙人To͘-ta-oah ê kiáⁿ以利以謝，用預言攻擊約沙法講：「因為你結交亞哈謝，上主破壞你ê所做。就ánne，船就破去，soah bē tàng去他施。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。