歷代志上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
21:1 大衛點算以色列人ê數額
(撒下24：1-25)
撒旦起來ài害以色列，引誘大衛算以色列人ê數額。
21:2 大衛kā約押kah人民中間ê首領講：「Lín去算以色列人，tùi別是巴到但，tńg來kā我講，hō͘我知in ê數額。」
21:3 約押講：「願上主hō͘祂ê子民比現今加添百倍，我ê主—我ê王，in kám無lóng是我ê主ê人民？我ê主án怎命令chitê tāichì？án怎hō͘以色列犯罪？」
21:4 總是，王ê話贏過約押。約押to̍h出去遍行以色列地，koh tńg來耶路撒冷。
21:5 約押to̍h kā所算人民ê總額報告大衛：以色列人ēgia̍h刀ê有一百十萬，偤大人ēgia̍h刀ê四十七萬。
21:6 獨獨利未人kah便雅憫人伊無算在內，因為約押討厭王chitê命令。
21:7 Chitê tāichì上帝看做m̄好，就phah以色列。
21:8 大衛對上帝講：「我行chitê tāichì，大大有罪，taⁿ求祢除去祢ê奴僕ê罪，因為我所做ê真戇。」
21:9 上主吩咐大衛ê先見迦得，講：
21:10 「你tio̍h去kā大衛講，上主ánne講：『Taⁿ我用三項排tī你面前，你揀一項，我thang行tī你ê身上。』」
21:11 迦得to̍h來見大衛，kā伊講：「上主ánne講：『你tio̍h kakī 揀，
21:12 看是三年ê飢荒，á是三月日tī你ê對敵ê面前tú tio̍h損害，hō͘仇敵ê刀劍jiok tio̍h你，á是三日上主ê劍，to̍h是瘟疫tī你ê國內，上主ê使者tī以色列ê全境teh毀滅。』Taⁿ你tio̍h想看，我thang用啥物話回覆差我ê。」
21:13 大衛kā迦得講：「我困迫到極，我願意陷落tī上主ê手，因為祂ê憐憫真大，我m̄願意陷落tī人ê手。」
21:14 就ánne，上主就降瘟疫tī以色列，以色列人死ê有七萬。
21:15 上主差一个使者來到耶路撒冷beh kā它滅掉，teh beh kā她滅掉ê時，上主看tio̍h，就改變主意，kā毀滅ê使者講：「夠額à，taⁿ thang停你ê手。」Hit時，上主ê使者khiā tī耶布斯人阿珥楠 ê稻埕。
21:16 大衛gia̍h頭看tio̍h上主ê使者khiā tī半空中，拔刀tī手裡，伸tī耶路撒冷ê頂面。大衛kah chiahê長老lóng穿麻衫，面仆tī土腳。
21:17 大衛對上帝講：「吩咐點算人民ê kám m̄是我？我犯罪行大pháiⁿ，總是，chiahê羊群kám有做啥物？求上主—我ê上帝，伸手tī我kah我ê父ê家，m̄ thang攻擊祢ê子民，降瘟疫hō͘ in。」
21:18 Hit當時，上主ê使者命令迦得去kā大衛講，大衛tio̍h上去，tī耶布斯人阿珥楠 ê稻埕，kā上主起一座壇。
21:19 大衛就照迦得奉上主ê名所講ê話上去。
21:20 Hit時，阿珥楠teh phah麥，oa̍t頭看tio̍h天使，kah伊做伙hit四個kiáⁿ走去bih。
21:21 大衛來到阿珥楠 hia，阿珥楠看tio̍h大衛，to̍h tùi稻埕出來，àⁿ頭拜大衛。
21:22 大衛對阿珥楠講：「你kā chitê稻埕ê地hō͘我，hō͘我tī hia thang kā上主起一座壇，你tio̍h照足額ê價錢賣我，hō͘瘟疫soah，無害tio̍h人民。」
21:23 阿珥楠 kā大衛講：「你thang the̍h去用，願我ê主—我ê王，照你所看做好ê去行。你看，我用牛hō͘你做燒祭，用phah五穀ê器具做柴，mā用麥á做素祭，chiahê我lóng hō͘你。」
21:24 大衛王kā 阿珥楠講：「M̄是ánne，我絕對beh用足額ê價錢來買，因為我無ài the̍h你ê物hō͘上主，無ài用無開費來獻燒祭。」
21:25 就ánne，大衛為tio̍h hit塊地秤六百舍客勒ê金hō͘ 阿珥楠。
21:26 大衛tī hia kā上主起一座壇，獻燒祭kah平安祭，koh求叫上主。上主tùi天降火tī祭壇頂來kā伊應答 。
21:27 上主命令使者，伊to̍hka7刀收入去鞘內。
21:28 Hit時，大衛看tio̍h上主tī耶布斯人阿珥楠 ê稻埕kā伊應答，to̍h tī hia獻祭。
21:29 因為摩西tī曠野所造上主ê會幕kah燒祭ê壇，hit時lóng tī基遍koân ê所在。
21:30 總是，大衛bē tàng上到祂ê面前來問上帝，因為伊驚上主ê使者ê刀。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。