列王紀下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
17:1 I-su-la-el Ông Hô-sè-a
Iô-tah ông A-khà-chuh cha̍p-jī nî, E-la̍h ê kiáⁿ Hô-sè-a tī Sa-má-lī-a chē-ūi, chò I-su-la-el ông kiōng káu nî.
17:2 I kiâⁿ Siōng-chú só͘ khòaⁿ-chò pháiⁿ ê tāichì, chóng-.sī, bô chhin-chhiūⁿ i í-chêng ê I-su-la-el chiahê ông.
17:3 A-siul ông Sial-man-sel khí-lâi kā i kong-kek. Hô-sè-a chiū khut-ho̍k, kā i chìn-kòng.
17:4 A-siul ông chai Hô-sè-a ū kè-bô͘ pōe-poān, in-ūi i bat chhe sù-chiá khì kìⁿ Ai-gi̍p ông So, koh bô chìn-kòng A-siul ông, chhin-chhiūⁿ í-chêng nî-nî ê só͘ chò. Só͘-í, A-siul ông kā i koaiⁿ-kìm, kā i pa̍k tī kaⁿ-.ni̍h.
17:5 Sa-má-lī-a Hām-lo̍h
A-siul ông khí-lâi piàn kiâⁿ hit-ê tē, koh khí-lâi ûi-kong Sa-má-lī-a saⁿ nî.
17:6 Hô-sè-a tē-káu nî, A-siul ông cheng-ho̍k Sa-má-lī-a, kā I-su-la-el lâng lia̍h kàu A-siul, kā in an-tì tī Ha-la̍h kah Ha-bo͘l, tī Go-chán hô piⁿ ê kah Ma-tái lâng hiahê siâⁿ.
17:7 Che sī in-ūi I-su-la-el lâng tek-chōe Siōng-chú — in ê Siōng-tè, to̍h-sī chhōa in chhut Ai-gi̍p tē, thoat-lī Ai-gi̍p ông Hôa-láu ê chhiú ê, in khì kèng-ùi pa̍t-ê sîn-bêng,
17:8 chun-thàn Siōng-chú tī I-su-la-el ê thâu-chêng só͘ kóaⁿ-chhut ê gōa-pang lâng kah I-su-la-el lia̍t ông só͘ siat ê kui-lē.
17:9 I-su-la-el lâng thau-thau-á kiâⁿ put-gī ê tāichì, tek-chōe Siōng-chú — in ê Siōng-tè, tī in hiahê siâⁿ, tùi chiú-keⁿ lâu kàu kian-kò͘ ê siâⁿ, khí soaⁿ-thâu tôaⁿ.
17:10 Tī ta̍k-ê koân soaⁿ ê téng-bīn, ta̍k châng chheⁿ-chhùi ê chhiū kha, khiā thiāu-siōng kah hiahê A-si-lah;
17:11 koh tī hia ê ta̍k-ê soaⁿ-thâu tôaⁿ sio hiuⁿ, chhin-chhiūⁿ Siōng-chú tī in ê thâu-chêng só͘ kóaⁿ-chhut ê gōa-pang lâng ê só͘ kiâⁿ, koh kiâⁿ hiahê pháiⁿ tāi lâi kek Siōng-chú ê siū-khì.
17:12 In koh ho̍k-sāi ngó͘-siōng, to̍h-sī Siōng-chú só͘ kā in hoan-hù kóng m̄ thang ánne chò ê.
17:13 Chóng-.sī, Siōng-chú thok chèng sian-ti kah sian-kiàn, tùi I-su-la-el kah Iô-tah chò kiàn-chèng, kóng, " Tio̍h lī-khui lín ê pháiⁿ só͘ kiâⁿ, chip-siú Góa ê kài-bēng kah lu̍t-lē, chiàu Góa hoan-hù lín ê chó͘-sian kah thok Góa ê lô͘-po̍k chèng sian-ti só͘ thoân hō͘ lín oân-choân ê lu̍t-hoat. "
17:14 Chóng-.sī, in m̄-thiaⁿ, ngē in ê ām-kún, chhin-chhiūⁿ in ê chó͘-sian ngē in ê ām-kún, m̄ sìn-ho̍k Siōng-chú — in ê Siōng-tè ê.
17:15 In mā khì-sak I ê lu̍t-lē, í-ki̍p I kah in ê chó͘-sian só͘ li̍p ê iok kah tùi in só͘ kiàn-chèng ê kiàn-chèng, khì chun-thàn hi-ké, lâi kakī chò hi-ké, o̍h sì-kho͘-ûi ê gōa-pang lâng, hiahê lâng to̍h-sī Siōng-chú bat bēng-lēng in m̄ thang o̍h in ê só͘ kiâⁿ ê.
17:16 In lī-khui Siōng-chú — in ê Siōng-tè só͘-ū ê kài-bēng, ūi pún-sin chù siōng, to̍h-sī nn̄g chiah gû-á chò A-si-lah, kèng-pài thiⁿ-téng ê bān-siōng, ho̍k-sāi Ba-al.
17:17 Koh hō͘ in ê kiáⁿ-jî keng-kòe hóe, mā ēng chiam-pok kah siâ-su̍t, chhut-bē kakī khì kiâⁿ Siōng-chú só͘ khòaⁿ-chò pháiⁿ ê tāichì, kek I ê siū-khì.
17:18 Só͘-í, Siōng-chú tùi I-su-la-el lâng tōa siū-khì, kóaⁿ in lī-khui I ê bīn-chêng, to̍k-to̍k chhun Iô-tah chi̍t chi-cho̍k niā-niā.
17:19 Iô-tah mā bô chun-thàn Siōng-chú — in ê Siōng-tè ê kài-bēng, to̍h-sī chun-thàn I-su-la-el só͘ li̍p ê kui-lē.
17:20 Siōng-chú khì-sak I-su-la-el ê chèng kiáⁿ sun, kā in khó͘-to̍k, kā in kau tī chhiúⁿ-lia̍h in ê lâng ê chhiú, kàu bóe kā in kóaⁿ-chhut, hō͘ in lī-khui I ê bīn-chêng.
17:21 In-ūi thiah I-su-la-el hō͘ i lī-khui Ta-bi̍t ê ke, in chiū siat-li̍p Ne-bat ê kiáⁿ Ia-lô-ba-am chò ông. Ia-lô-ba-am pek I-su-la-el hō͘ in bô chun-thàn Siōng-chú, hō͘ in hoān tōa chōe.
17:22 I-su-la-el lâng kiâⁿ Ia-lô-ba-am só͘ hoān it-chhè ê chōe, bô lī-khui hiahê chōe.
17:23 Tì-sú Siōng-chú chhian-sóa I-su-la-el lī-khui I ê bīn-chêng, chiàu I thok I ê lô͘-po̍k chèng sian-ti só͘ kóng ê. Án-ne I-su-la-el siū lia̍h, lī-khui pún-tē khì-kàu A-siul, ti̍t-kàu kin-á-ji̍t.
17:24 A-siul Lâng Chhian lâi I-su-la-el
A-siul ông tùi Ba-bú-lông, Ku-t, A-boah, Ha-mat kah Se-hoa-ba-im, chhian-sóa lâng lâi Sa-má-lī-a, kā in an-tì tī hiahê siâⁿ, tāi-thè I-su-la-el lâng; in chiū tit tio̍h Sa-má-lī-a, lâi tòa hiahê siâⁿ.
17:25 In khí-thâu tòa tī hia ê sî, bô kèng-ùi Siōng-chú, só͘-í, Siōng-chú hō͘ sai ji̍p-khì in tiong-kan, kā-sí kúi-nā-ê lâng.
17:26 Ū lâng pò A-siul ông, kóng, " Lí só͘ chhian-sóa an-tì tī Sa-má-lī-a hiahê siâⁿ ê lia̍t pang lâng, m̄-chai hit só͘-chāi ê Siōng-chú ê kui-lē, só͘-í, I hō͘ sai ji̍p-lâi in tiong-kan, kā in kā-sí. " In-ūi in m̄-chai hit só͘-chāi ê Siōng-tè ê kui-lē.
17:27 A-siul ông chiū bēng-lēng kóng, " Tùi hia lia̍h-.lâi ê chè-si, thang hō͘ in chi̍t-ê tńg-.khì, hō͘ i tī hia tòa, ēng hit só͘-chāi ê Siōng-tè ê kui-lē kā in kà-sī. "
17:28 Chiū ánne, hiahê tùi Sa-má-lī-a só͘ lia̍h-.khì ê chè-si, chi̍t-ê tńg-lâi tòa tī Be-thel, kā in kà-sī tio̍h án-chóaⁿ lâi kèng-ùi Siōng-chú.
17:29 Chóng-.sī, ta̍k pang-kok ê lâng chō in kakī ê sîn-bêng, ta̍k kok ê lâng tī in só͘ tòa hiahê siâⁿ tī Sa-má-lī-a lâng chêng só͘ chō ê soaⁿ-thâu biō an-tì sîn-bêng ê siōng.
17:30 Ba-bú-lông lâng chō Su-ko͘t-be-no͘t, Ku-t lâng chō Nel-gal, Ha-mat lâng chō A-sī-má;
17:31 A-boah lâng chō Nip-ha-chuh kah Thal-thak, Se-hoa-ba-im lâng ēng hóe sio kiáⁿ-jî, hiàn hō͘ Se-hoa-ba-im ê sîn-bêng A-to-lam-me-le̍k kah A-nam-me-le̍k.
17:32 In ánne kèng-ùi Siōng-chú, tùi kûn-chiòng tiong siat-li̍p lâng chò soaⁿ-thâu tôaⁿ ê chè-si, thè in tī soaⁿ-thâu biō hiàn chè.
17:33 In kèng-ùi Siōng-chú, koh ho̍k-sāi kakī ê sîn-bêng, tùi siáⁿ-mi̍h kok sóa-.lâi, chiū chun-thàn hit kok ê kui-lē.
17:34 In kàu kin-á-ji̍t iáu koh chiàu chá-chêng ê hong-sio̍k khì kiâⁿ, bô kèng-ùi Siōng-chú, bô chun-thàn in ê lu̍t-lē kah in ê kui-lē, mā bô chiàu Siōng-chú bēng-lēng Iâ-kop kiáⁿ-sun ê lu̍t-hoat kah kài-bēng. Iâ-kop to̍h-sī I só͘ chheng-chò I-su-la-el ê.
17:35 Siōng-chú bat kah in li̍p-iok, kā in hoan-hù kóng, " M̄-thang kèng-ùi pa̍t-ê sîn-bêng, m̄ thang kūi-pài, m̄ thang kā i ho̍k-sāi, m̄ thang tùi i chè-hiàn.
17:36 To̍k-to̍k hit-ê ēng tōa koân-lêng kah chhun-chhut ê chhiú-kut chhōa lín chhut Ai-gi̍p tē ê Siōng-chú, lín tio̍h kèng-ùi I, kā I kūi-pài, kā I chè-hiàn.
17:37 I siá hō͘ lín ê lu̍t-lē, lé-gî, lu̍t-hoat kah kài-bēng, lín eng-kai éng-oán chip-siú chun-thàn, m̄ thang kèng-ùi pa̍t-ê sîn-bêng.
17:38 Góa kah lín só͘ li̍p ê iok, lín m̄ thang bē kì-.tit, mā m̄ thang kèng-ùi pa̍t-ê sîn-bêng.
17:39 Chóng-.sī, tio̍h kèng-ùi Siōng-chú — lín ê Siōng-tè, I ē kiù lín thoat-lī lín it-chhè tùi-te̍k ê chhiú. "
17:40 Chóng-.sī, in m̄ chun-thàn, iû-goân chiàu chá-chêng ê hong-sio̍k khì kiâⁿ.
17:41 Án-ne, chiahê lia̍t kok mā kèng-ùi Siōng-tè, mā ho̍k-sāi in ê ngó͘-siōng. In ê kiáⁿ, in ê sun, mā lóng sī ánne, in ê chó͘-sian só͘ kiâⁿ ê, kàu kin-á-ji̍t in mā chiàu ánne kiâⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。