列王紀下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
13:1 I-su-la-el Ông E-hoa-há-chuh
Iô-tah ông A-ha-chiah ê kiáⁿ Io-a-si jī-cha̍p saⁿ nî, E-hú ê kiáⁿ E-hoa-há-chuh tī Sa-má-lī-a chē-ūi, chò I-su-la-el ông, kiōng cha̍p-chhit nî.
13:2 I kiâⁿ Siōng-chú só͘ khòaⁿ-chò pháiⁿ ê tāichì, chun-thàn Ne-bat ê kiáⁿ Ia-lô-ba-am, hō͘ I-su-la-el lâng hoān hit-ê chōe, lóng bô lī-khui hit-ê chōe.
13:3 Siōng-chú chiū siū-khì I-su-la-el lâng, tiāⁿtiāⁿ kā in kau tī A-lâm ông Ha-cha-el ê chhiú kah Ha-cha-el ê kiáⁿ ê chhiú.
13:4 E-hoa-há-chuh khún-kiû Siōng-chú, Siōng-chú thiaⁿ i, in-ūi I khòaⁿ tio̍h I-su-la-el lâng siū chè-ap, to̍h-sī A-lâm ông kā in chè-ap.
13:5 Siōng-chú siúⁿ-sù I-su-la-el chi̍t-ê chín-kiù-chiá, hō͘ in thoat-lī A-lâm lâng ê chhiú. I-su-la-el lâng chiū chiàu kū tòa tī in ê pò͘-pêⁿ.
13:6 Chóng-.sī, in bô lī-khui Ia-lô-ba-am ê ke ê chōe, to̍h-sī hō͘ I-su-la-el lâng hoān chōe ê, iû-goân ánne khì kiâⁿ; Sa-má-lī-a ê A-si-lah iáu lâu-.leh.
13:7 I tī jîn-bîn tiong chí ū lâu bé-peng gō͘-cha̍p, chiàn-chhia cha̍p tâi, pō͘-peng chi̍t bān, in-ūi A-lâm ông ū kā in châu-bia̍t, kā in thún-ta̍h, chhin-chhiūⁿ tiūⁿ-tiâⁿ ê thô͘-soa.
13:8 E-hoa-há-chuh kî-tha ê tāichì, kiàn-nā i só͘ kiâⁿ ê kah i ê lêng-le̍k, kám bô lóng kì tī I-su-la-el chiahê ông ê kì-lio̍k?
13:9 E-hoa-há-chuh kah i ê chó͘-sian tâng khùn, lâng kā i bâi-chòng tī Sa-má-lī-a. I ê kiáⁿ Io-a-si sòa-chiap i chò ông.
13:10 I-su-la-el Ông Io-hoa-si
Iô-tah ông Io-a-si saⁿ-cha̍p chhit nî, E-hoa-há-chuh ê kiáⁿ Io-hoa-si tī Sa-má-lī-a chē-ūi, chò I-su-la-el ông, kiōng cha̍p-la̍k nî.
13:11 I kiâⁿ Siōng-chú só͘ khòaⁿ-chò pháiⁿ ê tāichì, bô lī-khui Ne-bat ê kiáⁿ Ia-lô-ba-am ê chōe, to̍h-sī i hō͘ I-su-la-el lâng hoān chōe ê, iû-goân ánne kiâⁿ.
13:12 Io-a-si kî-tha ê tāichì, kiàn-nā i só͘ kiâⁿ ê, í-ki̍p i kah Iô-tah ông A-má-chiah kau-chiàn ê lêng-le̍k, kám bô lóng kì tī I-su-la-el chiahê ông ê kì-lio̍k?
13:13 Io-a-si kah i ê chó͘-sian tâng khùn, Ia-lô-ba-am chē i ê ūi. Io-a-si kah I-su-la-el chiahê ông chò-hóe bâi-chòng tī Sa-má-lī-a.
13:14 E-lí-siah ê Sí-bông
E-lí-siah phòa-pēⁿ, to̍h-sī teh beh sí ê pēⁿ, I-su-la-el ông Io-a-si lo̍h-lâi khòaⁿ i, àⁿ tī i ê bīn thî-khàu, kóng, " Góa ê pē! Góa ê pē! I-su-la-el ê chiàn-chhia kah i ê bé-peng! "
13:15 E-lí-siah kā i kóng, " Lí gia̍h kiong-chìⁿ. " I chiū gia̍h kiong kah chìⁿ.
13:16 Koh kā I-su-la-el ông kóng, " Lí ēng chhiú poe̍h kiong. " I chiū ēng chhiú poe̍h kiong.
13:17 E-lí-siah hōaⁿ-chhiú tī ông ê chhiú, kóng, " Lí khui ǹg tang ê thang-á. " I chiū khui. E-lí-siah kóng, " Siā chìⁿ. " I chiū siā chìⁿ. E-lí-siah kóng, " Che sī Siōng-chú thâi-iâⁿ ê chìⁿ, to̍h-sī thâi-iâⁿ A-lâm lâng ê chìⁿ, in-ūi lí ē tī A-hek kong-kek A-lâm lâng, ti̍t-kàu kā in choân-pō͘ siau-bia̍t. "
13:18 Koh kóng, " Gia̍h hiahê chìⁿ. " I chiū gia̍h hiahê chìⁿ. I koh kā I-su-la-el ông kóng, " Phah tē! " I phah saⁿ pái chiū soah.
13:19 Siōng-tè ê lô͘-po̍k tùi i siū-khì kóng, " Hit sî, lí tio̍h phah gō͘-la̍k pái, chiū ē kong-kek A-lâm, ti̍t-kàu i choân-pō͘ siau-bia̍t; taⁿ chí ū ē phah-pāi A-lâm lâng saⁿ pái. "
13:20 E-lí-siah sí liáu-āu, lâng kā i bâi-chòng. Kàu sin-nî, ū Mô͘-ap kui tīn lâng chhim-hoān kéng-kài.
13:21 Ū lâng tú-á teh bâi-chòng sí-lâng, hut-jiân khòaⁿ tio̍h kui tīn lâng, chiū kā sí-lâng hiat tī E-lí-siah ê bōng, sí-lâng chi̍t-ē kha̍p tio̍h E-lí-siah ê kut-thâu, chiū koh-oa̍h khiā khí-.lâi.
13:22 I-su-la-el kah A-lâm Ông Kau-chiàn
E-hoa-há-chuh ê nî-kan, A-lâm ông Ha-cha-el tiāⁿtiāⁿ chè-ap I-su-la-el lâng.
13:23 Chóng-.sī, Siōng-chú in-ūi I kah A-bu-la-hàm, Í-sak, Iâ-kop só͘ li̍p ê iok, iû-goân si un hō͘ I-su-la-el, kā in liân-bín, kā in chiàu-kò͘, m̄-kam kā in châu-bia̍t, iáu-bōe kā in kóaⁿ-tio̍k lī-khui I ê bīn-chêng.
13:24 A-lâm ông Ha-cha-el sí, i ê kiáⁿ sòa-chiap i chò ông.
13:25 Chá-chêng Ha-cha-el kah Io-a-si ê lāu-pē E-hoa-há-chuh kau-chiàn, tùi i ê chhiú the̍h-khì kúi-nā-ê siâⁿ, taⁿ E-hoa-há-chuh ê kiáⁿ Io-a-si tùi Ha-cha-el ê kiáⁿ ê chhiú the̍h tò tńg-.lâi. Io-a-si kā i phah saⁿ pái, cheng-ho̍k I-su-la-el hiahê siâⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。