列王紀下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
10:1 A-hap ê Kiáⁿ-sun Hông Thâi-Sí
A-hap ū chhit-cha̍p-ê kiáⁿ tī Sa-má-lī-a. E-hú siá phoe kià khì Sa-má-lī-a, hō͘ E-chu-le-el hiahê siú-léng, tiúⁿ-ló kah hiahê hû-ióng A-hap ê chèng kiáⁿ ê phoe,
10:2 kóng, " Lín ê chú-lâng hiahê kiáⁿ kah lín tī hia, lín koh ū chhia, bé kah kian-kò͘ ê siâⁿ, kah khì-hâi,
10:3 Chit tiuⁿ phoe kàu lín hia ê sî, chiū tio̍h tī lín chú-lâng hiahê kiáⁿ ê tiong-kan, kéng chi̍t-ê gâu koh thò-tòng ê, hō͘ i chē in lāu-pē ê ūi, lín mā thang ūi lín chú-lâng ê ke kau-chiàn. "
10:4 In chin kiaⁿ, chò-hóe kóng, " Lí khòaⁿ, nn̄g-ê ông tī i ê bīn-chêng siōng-chhiáⁿ khiā bē tiâu, lán ná khiā ē tiâu? "
10:5 Koán-ke ê kah siâⁿ-siú, í-ki̍p hiahê tiúⁿ-ló kah hû-ióng hiahê kiáⁿ ê, chhe lâng khì kìⁿ E-hú, kóng, " Goán sī lí ê lô͘-po̍k, kiàn-nā lí só͘ kā goán kóng ê, goán lóng ē khì kiâⁿ, goán bô beh siat-li̍p lâng chò ông, lí só͘ khòaⁿ-chò hó ê, thang chiàu ánne kiâⁿ. "
10:6 E-hú koh siá phoe hō͘ in kóng, " Lín nā ūi góa, chun-thàn góa ê ōe, tio̍h chhú lín ê chú-lâng hiahê kiáⁿ ê thâu-khak, bîn-á-chài chit sî lâi E-chu-le-el góa chia. " Ông ê kiáⁿ chhit-cha̍p lâng kah siâⁿ lāi chun-kùi ê lâng, to̍h-sī hû-ióng in ê, chò-hóe tòa.
10:7 Phoe chi̍t-ē kàu, in chiū lia̍h ông ê kiáⁿ chhit-cha̍p lâng, choân-pō͘ thâi-sí, kā thâu-khak hē tī kheng-.ni̍h, sàng kàu tī E-chu-le-el ê E-hú hia.
10:8 Ū chi̍t-ê sù-chiá lâi kā i kóng, " In tòa ông hiahê kiáⁿ ê thâu-khak lâi. " E-hú kóng, " Kā in thia̍p chò nn̄g tui, hē tī siâⁿ-mn̂g-kháu, ti̍t-kàu bîn-á chá-khí. "
10:9 Keh kang chá-khí, E-hú chhut-.lâi, khiā-.leh, kā chèng lâng kóng, " Lín lóng sī kong-gī ê, lí khòaⁿ, góa pōe-poān góa ê chú-lâng, thâi-sí i; chóng-.sī, thâi-sí chiahê kûn-chiòng ê sī siáⁿ lâng?
10:10 Taⁿ thang chai Siōng-chú ê ōe, to̍h-sī Siōng-chú koan-hē A-hap ê ke só͘ kóng ê, bô chi̍t kù phah ka-la̍uh, in-ūi Siōng-chú thok I ê lô͘-po̍k E-li-iah só͘ kóng ê ōe, lóng ū chò-chiâⁿ. "
10:11 Sio̍k A-hap ê ke, tī E-chu-le-el só͘ chhun lo̍h-.lâi ê lâng kah i ê tāi-sîn, chhin-bi̍t ê pêng-iú, chè-si, E-hú choân-pō͘ kā in thâi-sí, bô lâu kah pòaⁿ-ê.
10:12 A-ha-chiah ê Chhin-cho̍k Hông Thâi-Sí
E-hú khí-.lâi, khì-kàu Sa-má-lī-a.
10:13 Tī lō͘-.ni̍h lâi-kàu bo̍k-chiá chián iûⁿ-mn̂g ê chhù, tú tio̍h Iô-tah ông A-ha-chiah ê hiaⁿ-tī, mn̄g in kóng, " Lín sī siáⁿ lâng? " In ìn kóng, " Goán sī A-ha-chiah ê hiaⁿ-tī, taⁿ beh lo̍h-khì kā ông ê kiáⁿ kah ông-hō͘ ê kiáⁿ chhéng-an. "
10:14 I kóng, " Kā in oa̍h-oa̍h lia̍h khí-.lâi! " In chiū kā in oa̍h-oa̍h lia̍h khí-.lâi, tī chián iûⁿ-mn̂g ê chhù ê kheⁿ-á piⁿ kā in thâi-sí, kiōng sì-cha̍p jī lâng, bô lâu kah pòaⁿ-ê.
10:15 A-hap Kî-tha Chhin-cho̍k Hông Thâi-Sí
E-hú tùi hia khì, tú tio̍h Le-kap ê kiáⁿ Io-Ná-tap lâi chiap i, E-hú kā i chhéng-an, tùi i kóng, " Lí ê sim chèng-ti̍t ǹg góa, chhin-chhiūⁿ góa ê sim ǹg lí ê sim á-bô? " Io-Ná-tap ìn kóng, " Sī. " E-hú kóng, " Nā-sī ánne, chhun lí ê chhiú hō͘ góa. " I chiū chhun chhiú hō͘ i, i chiū khan i chiūⁿ chhia.
10:16 E-hú kóng, " Lí kah góa chò-hóe khì, khòaⁿ góa ūi tio̍h Siōng-chú ê jia̍t-sim. " Chiū hō͘ i chē tī i ê chhia téng.
10:17 Lâi-kàu Sa-má-lī-a chiū thâi-sí kiàn-nā sio̍k A-hap só͘ chhun tī Sa-má-lī-a ê, choân-pō͘ kā i bia̍t-tiāu, chiàu Siōng-chú tùi E-li-iah só͘ kóng ê ōe.
10:18 Pài Ba-al ê Lâng Hông Thâi-Sí
E-hú chio-chi̍p chèng lâng, kā in kóng, " A-hap ho̍k-sāi Ba-al iáu-sī sió-khóa, E-hú ē tōa-tōa kā i ho̍k-sāi.
10:19 Só͘-í, tio̍h tiàu Ba-al ê chèng sian-ti kah só͘-ū ho̍k-sāi Ba-al ê, í-ki̍p i só͘-ū ê chè-si lâi góa chia, m̄ thang kiám chi̍t-ê lâng, in-ūi góa beh hiàn tōa ê chè-sū hō͘ Ba-al, kiàn-nā bô lâi ê lóng bē tàng oa̍h. " E-hú ánne kiâⁿ sī ēng kúi-kè, beh choân-pō͘ thâi-sí pài Ba-al ê lâng.
10:20 E-hú kóng, " Tio̍h ūi Ba-al soan-pò͘ giâm-siok-hōe. " In chiū soan-pò͘.
10:21 E-hú chhe lâng piàn kiâⁿ I-su-la-el tē, pài Ba-al ê lâng lóng chiâu kàu, bô kah chi̍t-ê bô lâi. In chiū ji̍p-khì Ba-al ê biō, tī Ba-al ê biō lāi, tùi chit pêng kàu hit pêng lâng móa-móa.
10:22 E-hú hoan-hù chiáng lé-ho̍k ê lâng kóng, " The̍h lé-ho̍k chhut-lâi hō͘ só͘-ū pài Ba-al ê lâng chhēng. " I chiū the̍h lé-ho̍k chhut-lâi hō͘ in.
10:23 E-hú kah Le-kap ê kiáⁿ Io-Ná-tap, ji̍p-khì Ba-al ê biō, kā pài Ba-al ê lâng kóng, " Lín tio̍h cha-khòaⁿ, tī lín ê tiong-kan m̄ thang ū ho̍k-sāi Siōng-chú ê lâng, kantaⁿ pài Ba-al ê lâng niā-niā. "
10:24 In ji̍p-khì beh hiàn chè-sū sio-chè. E-hú tāi-seng an-tì peh-cha̍p lâng tī gōa-bīn, kóng, " Góa kā chiahê lâng kau tī lín ê chhiú, nā ū chi̍t-ê lâng cháu-.khì, pàng i cháu ê lâng, i ê miā tio̍h pôe miā! "
10:25 E-hú hiàn sio-chè liáu-āu, chiū kā hō͘-ōe-peng kah hiahê kun-tiúⁿ kóng, " Lín ji̍p-khì kā in thâi, m̄ thang iông-ín chi̍t-ê lâng chhut-.lâi! " In chiū ēng to kā in thâi, hō͘-ōe-peng kah kun-tiúⁿ hiat sin-si chhut-.khì, chiū khì-kàu Ba-al biō ê siâⁿ.
10:26 In kā Ba-al biō lāi ê thiāu-siōng the̍h chhut-lâi sio.
10:27 In húi-hoāi Ba-al ê thiāu-siōng, húi-hoāi Ba-al ê biō, ēng i chò chhek-tî kàu kin-á-ji̍t.
10:28 Án-ne, E-hú tī I-su-la-el tiong bia̍t-bông Ba-al.
10:29 Chóng-.sī, E-hú bô lī-khui Ne-bat ê kiáⁿ Ia-lô-ba-am ê chōe, to̍h-sī i só͘ hō͘ I-su-la-el hoān chōe ê, to̍h-sī pài Be-thel kah Tàn só͘-ū kim ê gû-á.
10:30 Siōng-chú kā E-hú kóng, " In-ūi lí kiâⁿ hó koh chiâⁿ góa só͘ khòaⁿ-chò hó ê, chiàu Góa ê sim-ì khoán-thāi A-hap ê ke, lí ê kiáⁿ-sun ē chē I-su-la-el ê kok-ūi keng-kòe sì tāi. "
10:31 Chóng-.sī, E-hú bô choan-sim chun-siú lâi kiâⁿ Siōng-chú — I-su-la-el ê Siōng-tè ê lu̍t-hoat, bô lī-khui Ia-lô-ba-am ê chōe, to̍h-sī só͘ ēng lâi hō͘ I-su-la-el lâng hoān chōe ê.
10:32 E-hú ê Sí-bông
Hit sî, Siōng-chú khai-sí hun-koah I-su-la-el kok, hō͘ i khah sè. Ha-cha-el kong-kek I-su-la-el ê sì-kho͘-ûi,
10:33 Tùi Iol-tàn hô tang pêng Gi-lia̍t ê choân tē, í-ki̍p Ga̍t lâng, Lū-biān lâng, Má-ná-se lâng ê tē, tùi kīn Al-nông soaⁿ-kok ê A-ló-el, to̍h-sī Gi-lia̍t kah Ba-siáng.
10:34 E-hú kî-tha ê tāichì, kiàn-nā i só͘ kiâⁿ ê kah i ê lêng-le̍k, kám bô lóng kì tī I-su-la-el chiahê ông ê kì-lio̍k?
10:35 E-hú kah i ê chó͘-sian tâng khùn, in kā i bâi-chòng tī Sa-má-lī-a. I ê kiáⁿ E-hoa-há-chuh sòa-chiap i chò ông.
10:36 E-hú tī Sa-má-lī-a chò I-su-la-el ông ê sî, le̍k-kòe jī-cha̍p peh nî.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。