列王紀下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
8:1 Siu-ném ê Cha-bó͘ Lâng Tńg-.lâi
Ū chi̍t-ê chabó͘ lâng, E-lí-siah bat hō͘ i ê kiáⁿ koh-oa̍h ê, mā bat kā i kóng, " Khí-.lâi! Lí kah lí ê choân ke khì tòa lí só͘ thang tòa ê só͘-chāi, in-ūi Siōng-chú bēng-lēng ki-hng lîm-kàu, ē tī chit-ê só͘-chāi chhit nî. "
8:2 Cha-bó͘ lâng chiū khí-.lâi, chiàu Siōng-tè ê lô͘-po̍k ê ōe khì kiâⁿ, i kah i ê ke chiū khì Hui-lī-sū lâng ê tē, tī hia tòa chhit nî.
8:3 Chhit nî móa, hit-ê chabó͘ lâng tùi Hui-lī-sū tē tńg-.lâi, chiū chhut-.khì, beh ūi kakī ê chhù-the̍h kah chhân-hn̂g kiû-kiò ông.
8:4 Hit sî, ông kah Siōng-tè ê lô͘-po̍k ê chhe-ēng Ge-ha-chih kóng-ōe, kóng, " Chhiáⁿ lí kā E-lí-siah só͘ kiâⁿ it-chhè ê tōa sū kā góa kóng. "
8:5 Ge-ha-chih teh kā ông kóng E-lí-siah án-chóaⁿ hō͘ sí-lâng koh-oa̍h, tú-hó hit-ê chabó͘ lâng, to̍h-sī i hō͘ i ê kiáⁿ koh-oa̍h ê, ūi tio̍h i ê chhù-the̍h kah chhân-hn̂g lâi kiû kiò ông. Ge-ha-chih kóng, " Góa ê chú, góa ê ông, chit-ê sī hit-ê chabó͘ lâng, chit-ê sī i ê kiáⁿ, to̍h-sī E-lí-siah hō͘ i koh-oa̍h ê. "
8:6 Ông mn̄g hit-ê chabó͘ lâng, i chiū kā i kóng. Ông chiū ūi tio̍h i phài chi̍t-ê koaⁿ-oân kóng, " Kiàn-nā sio̍k chit-ê chabó͘ lâng ê, lóng tio̍h hêng i, tùi i lī-khui pún só͘-chāi kàu kin-á-ji̍t, i ê chhân-hn̂g só͘ chhut-sán ê, mā lóng tio̍h hêng i. "
8:7 E-lí-siah kah A-lâm Ông Bian-ha-tat
E-lí-siah lâi-kàu Ta-má-su-ko, A-lâm ông teh phòa-pēⁿ, ū lâng kā ông kóng, " Siōng-tè ê lô͘-po̍k lâi-kàu lán chia. "
8:8 Ông chiū kā Ha-cha-el kóng, " Lí tòa lé-mi̍h khì kìⁿ Siōng-tè ê lô͘-po̍k, pài-thok i mn̄g Siōng-chú khòaⁿ góa chit-ê pēⁿ ē oa̍h á-bē? "
8:9 Ha-cha-el chiū khì kìⁿ i, ēng sì-cha̍p chiah lo̍k-tô chài Ta-má-su-ko ta̍k chióng ê hó mi̍h chò lé-mi̍h, khì khiā tī i ê bīn-chêng, kóng, " Lí ê kiáⁿ A-lâm ông chhe góa lâi lí chia, kóng, ' Góa chit-ê pēⁿ ē oa̍h á-bē? '"
8:10 E-lí-siah kā i kóng, lí khì kā i hôe-hok, kóng, " Lí it-tēng ē oa̍h; chóng-.sī, Siōng-chú chí-sī góa, i it-tēng ē sí. "
8:11 E-lí-siah chù-ba̍k kā i khòaⁿ, tì-sú i kiàn-siàu. Siōng-tè ê lô͘-po̍k chiū lâu ba̍k-sái.
8:12 Ha-cha-el kóng, " Góa ê chú ná ē teh lâu ba̍k-sái? " E-lí-siah ìn kóng, " In-ūi góa chai lí só͘ beh khó͘-to̍k I-su-la-el lâng ê, ēng hóe sio in hiám-iàu ê só͘-chāi, ēng to kā in thâi-sí ê chòng-teng, siak-sí in ê eⁿ-á, phòa-khui in ū sin-īn ê chabó͘ lâng. "
8:13 Ha-cha-el kóng, " Lí ê lô͘-po̍k sī siáⁿ-mi̍h, chí-put-kò sī chi̍t chiah káu, ná ē kiâⁿ chit-ê tōa sū? " E-lí-siah ìn kóng : " Siōng-chú ū kā góa chí-sī, lí ē chò A-lâm ông. "
8:14 I lī-khui E-lí-siah, tńg-khì i ê chú-lâng hia, chú-lâng mn̄g i kóng, " E-lí-siah kā lí kóng siáⁿ-mi̍h? " Ha-cha-el ìn kóng, " I kā góa kóng, lí it-tēng ē oa̍h. "
8:15 Keh tńg kang, i the̍h kāu ê pò͘ ùn chúi, khàm ông ê bīn, ông chiū sí. Ha-cha-el chiū sòa-chiap i chò ông.
8:16 Iô-tah Kok ê Ông Io-lâm
( LTH 21: 1-20)
I-su-la-el ông A-hap ê kiáⁿ Io-lâm tē-gō͘ nî, Iô-sa-hoat chò Iô-tah ông ê sî, Iô-tah ông Iô-sa-hoat ê kiáⁿ Io-lâm khai-sí chē-ūi.
8:17 Io-lâm chē-ūi ê sî, saⁿ-cha̍p-jī hòe, tī Ê-lú-sa-lèm chò ông keng-kòe peh nî.
8:18 I kiâⁿ I-su-la-el ông ê lō͘ kah A-hap ê ke bô koh-iūⁿ, in-ūi i chhōa A-hap ê chabó͘ kiáⁿ chò bó͘, kiâⁿ Siōng-chú só͘ khòaⁿ-chò pháiⁿ ê tāichì.
8:19 Chóng-.sī, Siōng-chú in-ūi I ê lô͘-po̍k — Ta-bi̍t ê iân-kò͘, m̄-kam bia̍t Iô-tah, chiàu I só͘ èng-ín Ta-bi̍t ê ōe, éng-oán siúⁿ-sù chi̍t pha teng hō͘ i ê kiáⁿ-sun.
8:20 Tng Io-lâm ê nî-kan, E-tóm pōe-poān Iô-tah, thoat-lī i ê chhiú-thâu, kakī siat-li̍p ông.
8:21 Io-lâm tòa só͘-ū ê chiàn-chhia, kòe-khì Cha-il, thàu-mê khí-.lâi, phah kā i ûi-khùn ê E-tóm lâng kah hiahê chhia-tiúⁿ; jîn-bîn chiū tô-cháu, ta̍k-ê tńg-khì kakī ê pò͘-pêⁿ.
8:22 Án-ne, E-tóm lâng pōe-poān Iô-tah, thoat-lī i ê chhiú-thâu, kàu kin-á-ji̍t. Kâng hit sî, Lip-nah lâng mā pōe-poān.
8:23 Io-lâm kî-tha ê tāichì, kiàn-nā i só͘ kiâⁿ ê, kám bô lóng kì tī Iô-tah lia̍t ông ê kì-lio̍k?
8:24 Io-lâm kah i ê chó͘-sian tâng khùn, tī Ta-bi̍t siâⁿ kah i ê chó͘-sian tâng bâi-chòng. I ê kiáⁿ A-ha-chiah sòa-chiap i chò ông.
8:25 Iô-tah Ông A-ha-chiah
( LTH 22: 1-6)
I-su-la-el ông A-hap ê kiáⁿ Io-lâm cha̍p-jī nî, Iô-tah ông Io-lâm ê kiáⁿ A-ha-chiah khai-sí chē-ūi.
8:26 A-ha-chiah chē-ūi ê sî, jī-cha̍p jī hòe, tī Ê-lú-sa-lèm chò ông chi̍t nî; i ê lāu-bú ê miâ kiò-chò A-tha-lí-iah, sī I-su-la-el ông Om-lī ê chabó͘ sun.
8:27 I kiâⁿ A-hap ê ke ê lō͘, kiâⁿ Siōng-chú só͘ khòaⁿ-chò pháiⁿ ê tāichì, kah A-hap ê ke bô koh-iūⁿ, in-ūi i sī A-hap ê ke ê kiáⁿ-sài.
8:28 I kah A-hap ê kiáⁿ Io-lâm chò-hóe khì Gi-lia̍t ê La̍h-mot kah A-lâm ông Ha-cha-el kau-chiàn, A-lâm lâng phah-siong Io-lâm.
8:29 Io-lâm ông tńg-khì E-chu-le-el, beh i-tī i ê siong, to̍h-sī i tī La̍h-mot kah A-lâm ông Ha-cha-el kau-chiàn ê sî, A-lâm lâng kā i phah tio̍h ê. Iô-tah ông Io-lâm ê kiáⁿ A-ha-chiah lo̍h-khì E-chu-le-el, beh thàm-hóng A-hap ê kiáⁿ Io-lâm, in-ūi i ū phòa-pēⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。