列王紀下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 E-lí-siah kóng, " Lín tio̍h thiaⁿ Siōng-chú ê ōe, Siōng-chú ánne kóng, bîn-á-chài chha-put-to kàu chit sî, tī Sa-má-lī-a ê siâⁿ mn̂g-kháu, chi̍t sè-a ê iù-mī-hún ta̍t gîn chi̍t si-khel, nn̄g sè-a tōa-be̍h ta̍t gîn chi̍t si-khel. "
7:2 Ū chi̍t-ê kun-tiúⁿ, sī ông óa-khò i ê chhiú ê, ìn Siōng-tè ê lô͘-po̍k kóng, " Siat-sú Siōng-chú tùi thiⁿ khui thang-á, kám ē ánne? " E-lí-siah kóng, " Lí ē chhin-ba̍k khòaⁿ-.tio̍h, chóng-.sī, chia̍h bē tio̍h. "
7:3 A-lâm ê Kun-tūi Thiat-thè
Tī siâⁿ mn̂g hia ū sì-ê thái-ko ê, in chò-hóe kóng, " Lán ná ē chē tī chia teh thèng-hāu sí? "
7:4 Lán nā kóng, ji̍p-khì siâⁿ lāi, siâⁿ lāi ū ki-hng, lán ē sí tī hia; nā tiāⁿtiāⁿ chē tī chia, mā sī tio̍h sí. Lâi à, lán lâi-khì tâu-hâng A-lâm ê kun-tūi, in nā lâu lán ê oa̍h-miā, lán chiū ē oa̍h; nā kā lán thâi-sí, hoâiⁿ-ti̍t mā sī sí! "
7:5 Hông-hun ê sî, in khí-.lâi, beh khì A-lâm lâng ê iâⁿ; lâi-kàu A-lâm lâng ê iâⁿ ê piⁿ-kak liáu-āu, lí khòaⁿ, bô chi̍t-ê lâng tī hia.
7:6 In-ūi Chú hō͘ A-lâm ê kun-tūi thiaⁿ tio̍h chhia ê siaⁿ kah bé ê siaⁿ, to̍h-sī tōa kun-tūi ê siaⁿ. In chiū chò-hóe kóng, " Lí khòaⁿ, che sī I-su-la-el ông bé-siu Hiat lâng chiahê ông kah Ai-gi̍p lâng chiahê ông, lâi beh kong-kek lán. "
7:7 Só͘-í, tī hông-hun ê sî in khí-lâi tô-cháu, pàng-sak in ê pò͘-pêⁿ, in ê bé kah in ê lî-á, iâⁿ-pâng chiàu kū lâu-.leh, cháu-khì pó sèⁿ-miā.
7:8 Hiahê thái-ko ê lâi-kàu iâⁿ ê piⁿ-kak, ji̍p-khì chi̍t-ê pò͘-pêⁿ, mā chia̍h mā lim; tùi hia the̍h kim-gîn kah saⁿ-khò͘ khì siu-chông, koh lâi, koh ji̍p-khì chi̍t-ê pò͘-pêⁿ, tùi hia the̍h-chhut châi-bu̍t khì siu-chông.
7:9 Hit sî, in chò-hóe kóng, " Lán só͘ chò ê m̄-hó, kin-á-ji̍t sī ū hó siau-sit ê ji̍t, lán mā tiām-tiām; nā thèng-hāu kàu thiⁿ-kng, lán tio̍h siū chōe. Lâi, lán tio̍h khì pò hō͘ ông-ka chai. "
7:10 In chiū khì kiò kò͘ siâⁿ mn̂g ê lâi, kā in kóng, " Goán kàu A-lâm lâng ê iâⁿ, khòaⁿ tio̍h bô chi̍t-ê lâng tī hia, mā bô lâng ê siaⁿ-soeh, chí ū bé pa̍k-.leh, lî pa̍k-.leh, pò͘-pêⁿ lóng chiàu kū. "
7:11 I chiū khì kiò hiahê kò͘-mn̂g ê khì pò hō͘ ông-ka chai.
7:12 Ông thàu-mê khí-.lâi, kā i ê jîn-sîn kóng, " A-lâm lâng tùi lán só͘ chò ê, góa kā lín kóng. In chai lán iau-gō, só͘-í, chhut iâⁿ-pâng, bâi-ho̍k tī chhân-iá, kóng, ' In chhut siâⁿ ê sî, lán chiū oa̍h-oa̍h kā in lia̍h khí-.lâi, thang tit tio̍h ji̍p in ê siâⁿ. '"
7:13 I ê jîn-sîn ū chi̍t-ê ìn ông kóng, " Iáu chhun lo̍h-.lâi ê bé, to̍h-sī iáu lâu tī siâⁿ lāi ê, kiû lí chhe lâng khan gō͘ chiah lâi ( lí khòaⁿ, bé chhin-chhiūⁿ I-su-la-el jîn-bîn só͘ lâu tī siâⁿ lāi ê; lí khòaⁿ, bé chhin-chhiūⁿ I-su-la-el jîn-bîn siū bia̍t ê), lán thang chhe lâng khì khòaⁿ-māi. "
7:14 Chiū chhú nn̄g tâi chhia kah bé, ông chhe lâng khì jiok A-lâm ê kun-peng, kóng, " Lín khì khòaⁿ-māi leh. "
7:15 In chiū jiok in lâi-kàu Iol-tàn hô, khòaⁿ tio̍h móa lō͘ lóng sī A-lâm lâng kín cháu ê sî só͘ hiat-ka̍k ê saⁿ-khò͘ kah khì-kū, sù-chiá chiū tńg-lâi hôe-hok ông.
7:16 Jîn-bîn chiū chhut-khì chhiúⁿ A-lâm lâng ê iâⁿ-pâng. Chiū ánne, chi̍t sè-a ê iù mī-hún ta̍t gîn chi̍t si-khel, nn̄g sè-a tōa-be̍h mā ta̍t gîn chi̍t si-khel, chiàu Siōng-chú só͘ kóng ê.
7:17 Ông phài i só͘ óa-khò chhiú hit-ê kun-tiúⁿ koán-lí siâⁿ mn̂g, jîn-bîn tī siâⁿ mn̂g thún-ta̍h, i chiū sí-.khì, chiàu Siōng-tè ê lô͘-po̍k só͘ kóng ê, to̍h-sī ông lo̍h-lâi kìⁿ i ê sî só͘ kóng ê.
7:18 Jî-chhiáⁿ Siōng-tè ê lô͘-po̍k só͘ tùi ông kóng ê, bîn-á-chài chha-put-to kàu chit sî, tī Sa-má-lī-a ê siâⁿ mn̂g-kháu, nn̄g sè-a tōa-be̍h ta̍t gîn chi̍t si-khel, chi̍t sè-a ê iù mī-hún ta̍t gîn chi̍t si-khel. "
7:19 Hitê kun-tiúⁿ koh tùi Siōng-tè ê lô͘-po̍k kóng, " Siat-sú Siōng-chú tùi thiⁿ khui thang-á, kám ē ánne? " Siōng-tè ê lô͘-po̍k kóng, " Lí ē chhin-ba̍k khòaⁿ-.tio̍h, chóng-.sī, chia̍h bē tio̍h.
7:20 Chit-ê ōe kó-jiân èng-giām tī i ê sin chiūⁿ, in-ūi jîn-bîn tī siâⁿ mn̂g-kháu kā i thún-ta̍h, i chiū sí-.khì.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。