列王紀下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
5:1 Ná-mān Tit tio̍h I-tī
A-lâm ông ê kun-tiúⁿ Ná-mān, tī i ê chú-lâng ê bīn-chêng chò tōa, chò chun-kùi, in-ūi Siōng-chú bat ēng i hō͘ A-lâm tek-sèng, i mā sī tōa koân-lêng ê ióng-sū, chóng-.sī, i hoān thái-ko.
5:2 Chá-chêng A-lâm lâng kui tīn chhut-.khì, tùi I-su-la-el tē lia̍h chi̍t-ê chabó͘ gín'á, i chiū lâi sū-hāu Ná-mān ê bó͘.
5:3 I kā i ê chú-bó kóng, " Khó͘ bē tàng góa ê chú kah Sa-má-lī-a ê sian-ti tông-chāi, i it-tēng ē i hó i ê thái-ko. "
5:4 Ū lâng ji̍p-khì kā i ê chú kóng, " Sio̍k I-su-la-el tē ê chabó͘ gín'á ánne ánne kóng. "
5:5 A-lâm ông kóng, " Lí khì, góa mā beh kià chi̍t tiuⁿ phoe hō͘ I-su-la-el ông. " Ná-mān chiū khì, tòa gîn cha̍p tha-lan-t, kim la̍k chheng, saⁿ-khò͘ cha̍p thò;
5:6 tòa phoe khì-kàu I-su-la-el ông hia. Phoe lāi kóng, " Phoe kàu lí hia ê sî, lí khòaⁿ, góa chhe jîn-sîn Ná-mān khì kìⁿ lí, lí tio̍h kā i ê thái-ko i hó. "
5:7 I-su-la-el ông khòaⁿ phoe liáu-āu, chiū thiah-li̍h i ê saⁿ, kóng, " Góa kám sī Siōng-chú, ē-tàng hō͘ lâng sí, hō͘ lâng oa̍h? Chit-ê lâng kèng-jiân chhe lâng lâi góa chia kah góa i hó i ê thái-ko. Chhiáⁿ lín chim-chiok siūⁿ, khòaⁿ chit-ê lâng án-chóaⁿ chhōe phāng beh lâi kong-kek góa. "
5:8 Siōng-tè ê lô͘-po̍k E-lí-siah thiaⁿ tio̍h I-su-la-el ông thiah-li̍h i ê saⁿ, chiū chhe lâng khì kìⁿ ông kóng, " Lí ná ē thiah-li̍h saⁿ? Thang hō͘ hit-ê lâng lâi góa chia, i chiah chai I-su-la-el tiong ū sian-ti. "
5:9 Ná-mān chiū kah i ê bé, i ê chhia lâi, khiā tī E-lí-siah ê chhù mn̂g-kháu.
5:10 E-lí-siah chhe chi̍t-ê sù-chiá, kā Ná-mān kóng, " Lí khì Iol-tàn hô sé seng-khu chhit pái, lí ê bah chiū ē ho̍k-goân, lí ē tit tio̍h chheng-khì. "
5:11 Ná-mān chiū siū-khì, thè-.khì, kóng, " Góa pún siūⁿ kóng i it-tēng ē chhut-lâi kìⁿ góa, khiā-teh kiû-kiò Siōng-chú — i ê Siōng-tè ê miâ, tī hoān-.tio̍h ê só͘-chāi iô chhiú, lâi i hó thái-ko ê. "
5:12 Ta-má-su-ko ê hô, A-má-nah kah Phal-phal, kám bô pí I-su-la-el só͘-ū ê chúi khah hó? Góa kám bē tàng tī hia sé seng-khu lâi chheng-khì? " Chiū oa̍t tńg-sin siū-khì, chò i khì.
5:13 Ná-mān ê lô͘-po̍k chìn-chêng lâi, kā i kóng, " Góa ê pē, sian-ti nā kiò lí khì chò chi̍t kiāⁿ tōa sū, lí kám bô beh chò? Hô-hòng i kantaⁿ kā lí kóng, khì sé chiū ē chheng-khì? "
5:14 Ná-mān chiū lo̍h-.khì, chiàu Siōng-chú lô͘-po̍k ê ōe, tī Iol-tàn hô sé seng-khu chhit pái; i ê bah chiū ho̍k-goân, chhin-chhiūⁿ gín'á bah, i chiū chheng-khì.
5:15 Ná-mān kah só͘-ū tòe i ê lâng tò tńg-lâi Siōng-tè ê lô͘-po̍k hia, khiā tī i ê bīn-chêng kóng, " Lí khòaⁿ, góa taⁿ chai, tû I-su-la-el í-gōa, phó͘-thiⁿ-ē bô ū Siōng-tè. Taⁿ kiû lí siu lí ê lô͘-po̍k ê lé-mi̍h. "
5:16 E-lí-siah kóng, " Góa kí éng-oán oa̍h ê Siōng-chú, to̍h-sī góa khiā tī I ê bīn-chêng ê, lâi chiùchōa, góa it-tēng m̄ siu. " Ná-mān kiông-pek i siu, m̄ koh i choa̍t-tùi m̄ siu.
5:17 Ná-mān kóng, " Nā m̄ siu, kiû lí kā nn̄g chiah lô só͘ ē-tàng chài ê thô͘ hō͘ lí ê lô͘-po̍k, in-ūi tùi taⁿ í-āu, lí ê lô͘-po̍k bô koh ēng sio-chè á-.sī pa̍t chióng ê chè hō͘ pa̍t-ê sîn-bêng, chí ū beh hiàn hō͘ Siōng-chú.
5:18 To̍k-to̍k ū chi̍t hāng sū, goān Siōng-chú sià-bián lí ê lô͘-po̍k, to̍h-sī góa ê chú ji̍p Lim-móng ê biō, tī hia kèng-pài, óa tio̍h góa ê chhiú ê sî, góa koh tī Lim-móng ê biō àⁿ-io, to̍h-sī góa tī Lim-móng ê biō àⁿ-io ê sî, goān Siōng-chú tī chit kiāⁿ tāichì sià-bián lí ê lô͘-po̍k. "
5:19 Siōng-tè ê lô͘-po̍k chiū kā i kóng, " Lí thang pêng-an khì. " Ná-mān chiū lī-khui i khì,
5:20 Kiâⁿ chi̍t-chām-á liáu-āu, Siōng-tè ê lô͘-po̍k E-lí-siah ê chhe-ēng Ge-ha-chih, sim-lāi siūⁿ kóng: Góa ê chú-lâng thé-thiap chit-ê A-lâm lâng Ná-mān, bô beh tùi i ê chhiú siu i só͘ tòa-.lâi ê, góa kí éng-oán oa̍h ê Siōng-chú lâi kóng, góa beh cháu-khì jiok i, tùi i the̍h tām-po̍h.
5:21 Ge-ha-chih chiū khì jiok Ná-mān. Ná-mān khòaⁿ tio̍h ū lâng cháu-lâi jiok i, chiū lo̍h-chhia kā i gêng-chiap, kóng, " Lóng pêng-an? "
5:22 Ge-ha-chih kóng, " Lóng pêng-an. Góa ê chú chhe góa lâi kóng, ' Tú- chiah ū nn̄g-ê siàu-liân lâng, sī sian-ti ê ha̍k-seng, tùi E-hu-laim soaⁿ-tē lâi kìⁿ góa, chhiáⁿ lí ēng gîn chi̍t tha-lan-t kah saⁿ-khò͘ nn̄g thò hō͘ i. "
5:23 Ná-mān kóng, " M̄-thang the-sî, chhiáⁿ siu nn̄g tha-lan-t. " kiông-pek i, chiū kā nn̄g tha-lan-t gîn chng tī nn̄g-ê pò͘-tē kah nn̄g thò saⁿ-khò͘ kau hō͘ i ê nn̄g-ê lô͘-po̍k; nn̄g-ê lô͘-po̍k kā hiahê mi̍h phāiⁿ-.leh, kiâⁿ tī i ê thâu-chêng.
5:24 Lâi-kàu soaⁿ-.ni̍h ê sî, Ge-ha-chih tùi in ê chhiú chiap-.lâi, hē tī chhù lāi, chhe in khì, in chiū khì.
5:25 I chiū ji̍p-khì khiā tī i ê chú-lâng ê bīn-chêng. E-lí-siah mn̄g i kóng, " Ge-ha-chih, lí tùi tó-ūi lâi? " I ìn kóng, " Lí ê lô͘-po̍k bô khì tó-ūi. "
5:26 E-lí-siah kā i kóng, " Hitê lâng lo̍h-chhia tò tńg-lâi kā lí gêng-chiap ê sî, góa ê sim kám bô kah lí khì? Che kám sī chiap-siū gîn, chiap-siū saⁿ-khò͘, kaⁿ-ná hn̂g, phû-tô hn̂g, gû, iûⁿ, lô͘-po̍k, lú-pī ê sî? "
5:27 Chiū ánne, Ná-mān ê thái-ko beh thoân hō͘ lí kah lí ê kiáⁿ-sun, it-ti̍t kàu éng-oán. Ge-ha-chih tùi E-lí-siah ê bīn-chêng thè chhut-.khì, chiū khí thái-ko, pe̍h kah chhin-chhiūⁿ seh.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。