列王紀下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
4:1 E-lí-siah Pang-chō͘ Sàn-chhiah Kóaⁿ-hū
Ū chi̍t-ê kóaⁿ-hū, sī sian-ti ê ha̍k-seng ê bó͘, kiò E-lí-siah lâi, kóng, " Lí ê lô͘-po̍k — góa ê tiōng-hu í-keng sí, lí ê lô͘-po̍k pêng-sî kèng-ùi Siōng-tè, sī lí só͘ chai ê. Taⁿ chè-chú lâi beh lia̍h góa nn̄g-ê kiáⁿ khì chò lô͘-lē. "
4:2 E-lí-siah mn̄g i kóng, " Góa ē-tàng kā lí chò siáⁿ-mi̍h? Lí kā góa kóng; lí chhù lāi ū siáⁿ-mi̍h? " kóaⁿ-hū kóng, " Lí ê lú-pī chhù lāi chhun chi̍t pân iû, í-gōa lóng bô pòaⁿ-hāng. "
4:3 E-lí-siah kóng, " Lí khì, tī gōa-bīn tùi lí hiahê chhù-piⁿ chioh khì-kū, to̍h-sī khang ê khì-kū, chioh jú chē jú hó.
4:4 Tio̍h ji̍p-khì chhù lāi, kā mn̂g koaiⁿ khí-.lâi, lí kah lí ê kiáⁿ tiàm lāi-bīn, thîn iû tī só͘-ū ê khì-kū, thîn móa ê tio̍h lēng-gōa hē. "
4:5 Kóaⁿ-hū chiū lī-khui E-lí-siah, tńg-khì chhù-.ni̍h, kā mn̂g koaiⁿ khí-.lâi, i kah i ê kiáⁿ tiàm lāi-bīn; kiáⁿ tòa khì-kū lâi hō͘ i, i chiū thîn iû.
4:6 Hiahê khì-kū lóng móa, i kā i ê kiáⁿ kóng, " Koh the̍h khì-kū lâi hō͘ góa. " Kiáⁿ kóng, " Bô koh ū khì-kū à. " Chiū thêng-chí thîn iû.
4:7 Kóaⁿ-hū khì kā Siōng-tè ê lô͘-po̍k kóng, E-lí-siah kóng, " Lí khì bē iû lâi hêng-chè, só͘ chhun lo̍h-.lâi ê, lí kah lí ê kiáⁿ thang tō͘ seng-oa̍h. "
4:8 Siu-ném ê Cha-bó͘ lâng Chiap-thāi E-lí-siah
Ū chi̍t ji̍t, E-lí-siah kiâⁿ kàu Siu-ném, tī hia ū chi̍t-ê hó-gia̍h ê chabó͘ lâng, kiông-kiông lâu i tiàm hia chia̍h. Āu-lâi, E-lí-siah ta̍k pái tùi hia keng-kòe, chiū ji̍p-khì chia̍h.
4:9 Cha-bó͘ lâng tùi i ê tiōng-hu kóng, " Lí khòaⁿ, hit-ê tiāⁿtiāⁿ tùi lán chia keng-kòe ê, góa khòaⁿ i sī Siōng-tè ê sèng ê lô͘-po̍k.
4:10 Kiû lí ín-chún, lán thang tī chhiûⁿ téng khí chi̍t keng sè-keng pâng, tī hia kā i an-tì bîn-chhn̂g, toh, í kah teng-tâi, hō͘ i lâi lán chia, thang ji̍p-khì hioh-khùn. "
4:11 Ū chi̍t ji̍t, E-lí-siah lâi-kàu hia, chiū ji̍p-khì hit keng pâng hioh-khùn.
4:12 E-lí-siah kā i ê lô͘-po̍k Ge-ha-chih kóng, " Lí khì kiò chit-ê Siu-ném ê chabó͘ lâng lâi. " I chiū khì kiò i lâi, chabó͘ lâng khiā tī i ê bīn-chêng.
4:13 E-lí-siah kā i ê lô͘-po̍k kóng, " Lí thang kā i kóng, lí khòaⁿ, lí ūi goán hùi chin chē sim-su, taⁿ tio̍h kā lí chò siáⁿ-mi̍h? Lí ài góa thè lí kā ông á-.sī kun-tiúⁿ kóng siáⁿ-mi̍h? " Cha-bó͘ lâng ìn kóng, " Góa tòa tī góa ê jîn-bîn ê tiong-kan. "
4:14 E-lí-siah kóng, " Án-ne tio̍h ūi i án-chóaⁿ chò neh? " Ge-ha-chih kóng, " I bô kiáⁿ, i ê tiōng-hu mā lāu à. "
4:15 E-lí-siah koh kóng, " Kiò i lâi. " Chiū khì kiò i lâi. Cha-bó͘ lâng chiū khiā tī mn̂g-kháu.
4:16 I kóng, " Mê-nî kàu chit sî, lí ē phō chi̍t-ê kiáⁿ. " I kóng, " Bô lah, Siōng-tè ê lô͘-po̍k, góa ê chú ah, m̄ thang phiàn lí ê lú-pī. "
4:17 Cha-bó͘ lâng kó-jiân hoâi-īn, kàu mê-nî hit sî seⁿ chi̍t-ê kiáⁿ, chiàu E-lí-siah só͘ kóng ê.
4:18 Gín-á tōa-hàn, ū chi̍t ji̍t chhut-khì kàu i ê lāu-pē, kàu siu-koah ê lâng hia.
4:19 I kā lāu-pē kóng, " Góa ê thâu-khak, góa ê thâu-khak! " I ê lāu-pē kā lô͘-po̍k kóng, " Kā i phō khì i ê lāu-bú hia. "
4:20 I kā gín'á phō kàu i ê lāu-bú hia, gín'á chē tī lāu-bú ê kha-thâu-u, kàu tiong-tàu chiū sí.
4:21 Lāu-bú chiūⁿ-khì lâu-téng, kā i ê kiáⁿ hē tī Siōng-tè ê lô͘-po̍k ê bîn-chhn̂g, koaiⁿ mn̂g liáu-āu chiū chhut-.lâi,
4:22 kiò i ê tiōng-hu kóng, " Chhiáⁿ chhe chi̍t-ê lô͘-po̍k khan chi̍t chiah lî lâi góa chia, góa beh cháu khì Siōng-tè ê lô͘-po̍k hia, chiah tńg-.lâi. "
4:23 Tiōng-hu kóng, " Kin-á-ji̍t m̄-sī goe̍h ê chhe-it, mā m̄-sī an-hioh, lí án-chóaⁿ beh khì i hia? " Cha-bó͘ lâng kóng, " Pêng-an. "
4:24 Chiū chún-pī lî-á, kā lô͘-po̍k kóng, " Lí kóaⁿ lî chìn-chêng khì, góa nā bô kā lí kóng, chiū m̄ thang khah bān. "
4:25 Cha-bó͘ lâng chiū khì Kal-mel soaⁿ, khì Siōng-tè ê lô͘-po̍k hia. Siōng-tè ê lô͘-po̍k hn̄g-hn̄g khòaⁿ tio̍h i, kā i ê lô͘-po̍k Ge-ha-chih kóng, " Lí khòaⁿ, Siu-ném ê chabó͘ lâng lâi ā,
4:26 lí kín khì kā i gêng-chiap, mn̄g i kóng, " Lí ū pêng-an bô? Lí ê tiōng-hu pêng-an bô? Gín-á pêng-an bô? " Cha-bó͘ lâng kóng, " Pêng-an. "
4:27 Cha-bó͘ lâng lâi-kàu hit-ê soaⁿ, kàu Siōng-tè ê lô͘-po̍k hia, chiū lám i ê kha. Ge-ha-chih chìn-chêng lâi beh kā i chhia-khui, Siōng-tè ê lô͘-po̍k kóng, " Chhut-chāi i, in-ūi i sim-lāi thòng-khó͘, Siōng-chú tùi góa am-khàm, bô kā góa kóng. "
4:28 Cha-bó͘ lâng kóng, " Góa kám bat tùi góa ê Chú kiû kiáⁿ? Góa kám bô kóng, m̄ thang phiàn góa? "
4:29 E-lí-siah kā Ge-ha-chih kóng, " Lí hâ io, chhiú gia̍h góa ê koái, chìn-chêng khì; nā tú tio̍h lâng, m̄ thang kā in chhéng-an, lâng nā kā lí chhéng-an, mā m̄ thang ìn i; tio̍h kā góa ê koái-á hē tī gín'á ê bīn. "
4:30 Gín-á ê lāu-bú kóng, " Góa kí éng-oán oa̍h ê Siōng-chú kah lí ê oa̍h-miā lâi kóng, góa it-tēng m̄ lī-khui lí. " E-lí-siah chiū khí-.lâi, tòe i khì.
4:31 Ge-ha-chih hiòng thâu-chêng khì, ēng koái-á hē tī gín'á ê bīn, chóng-.sī, bô siaⁿ-soeh, mā m̄-chai lâng. Ge-ha-chih tò tńg-lâi tú tio̍h i, kā i kóng, " Gín- á-bô chhéⁿ. "
4:32 E-lí-siah lâi-kàu-ūi, ji̍p-khì chhù lāi, khòaⁿ tio̍h gín'á í-keng sí, hē tī i ê bîn-chhn̂g.
4:33 I ji̍p-.khì, chiū koaiⁿ mn̂g, chí ū in nn̄g-ê tī lāi-bīn, i chiū tùi Siōng-chú kî-tó.
4:34 I chiū khì phak tī gín'á ê seng-khu, chhùi tùi chhùi, ba̍k-chiu tùi ba̍k-chiu, chhiú tùi chhiú, kui-sin àⁿ tī gín'á ê seng-khu, gín'á ê bah chiū chiām-chiām sio-lō khí-.lâi.
4:35 I lo̍h-.lâi, tī chhù lāi kiâⁿ lâi kiâⁿ khì chi̍t pái, koh chiūⁿ-.khì, kui-sin àⁿ tī gín'á; gín'á phah-ka-chhiùⁿ chhit pái, ba̍k-chiu chiū thí-khui.
4:36 E-lí-siah kiò Ge-ha-chih kóng, " Khì kiò hit-ê Siu-ném ê chabó͘ lâng lâi. " I chiū khì kiò i, i ji̍p-lâi i hia. E-lí-siah kóng, " Phō lí ê gín'á khí-.lâi. "
4:37 Cha-bó͘ lâng chiū ji̍p-.lâi, àⁿ tī i ê kha chêng, phak tī thô͘-kha, phō i ê kiáⁿ chhut-.khì.
4:38 Nn̄g-ê Sîn-jiah
E-lí-siah koh lâi-kàu Gil-gal, hit sî kok lāi ki-hng, sian-ti ê ha̍k-seng chē tī i ê bīn-chêng, i hoan-hù lô͘-po̍k, kóng, " Lí kā tōa tiáⁿ hē tī hóe-.ni̍h, kā sian-ti ê ha̍k-seng chú chhài-thng. "
4:39 Ū chi̍t-ê lâng khì chhân-.ni̍h bán chhài, tú tio̍h chi̍t châng iá-tîn, chiū bán i ê koe móa phè tńg-.lâi, chhiat-chhiat leh chiū lok lo̍h-khì chú chhài-thng ê tiáⁿ, in-ūi in m̄ bat he sī siáⁿ-mi̍h mi̍h.
4:40 Piàⁿ chhut-lâi hō͘ in chia̍h; chia̍h chhài-thng ê sî, in lóng tōa-siaⁿ hoah, " Siōng-tè ê lô͘-po̍k, tiáⁿ lāi ū tì-kàu sí ê to̍k, in lóng bē chia̍h-tit. "
4:41 E-lí-siah kóng, " The̍h tām-po̍h-á mī-hún lâi. " Chiū kā mī-hún sám tī tiáⁿ-.ni̍h, kóng, " Piàⁿ chhut-lâi hō͘ in chia̍h! " Tiáⁿ lāi chiū bô to̍k.
4:42 Ū chi̍t-ê lâng tùi Ba-al-sia-li-siah lâi, tòa khí-thâu se̍k ê be̍h só͘ chò ê piáⁿ kah tōa-be̍h piáⁿ jī-cha̍p-ê, koh ū sin ê sūi té tī tē-.ni̍h, sàng hō͘ Siōng-tè ê lô͘-po̍k. I chiū kóng, " Kā chiahê hō͘ jîn-bîn chia̍h. "
4:43 I ê chhe-ēng kóng, " Cháiⁿ-iūⁿ, góa kám thang kā chiahê pâi tī chi̍t pah lâng ê bīn-chêng? " E-lí-siah ìn kóng, " Chò lí hō͘ jîn-bîn chia̍h, in-ūi Siōng-chú ánne kóng: In ē chia̍h, chia̍h-liáu iáu ū chhun. "
4:44 I chiū pâi tī in ê bīn-chêng, in chia̍h-liáu mā ū chhun, chiàu Siōng-chú só͘ kóng ê.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。