列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
20:1 Kah A-lâm Ông Kau-chiàn
A-lâm ông Bian-ha-tat chū-chi̍p i ê kun-tūi, ū saⁿ-cha̍p-jī-ê ông kah i khì, ū bé, ū chiàn-chhia, chiūⁿ-khì ûi Sa-má-lī-a, lâi kā i kong-kek.
20:2 I koh chhe sù-chiá ji̍p siâⁿ khì kìⁿ I-su-la-el ông A-hap, kā i kóng,
20:3 " Bian-ha-tat ánne kóng: Lí ê gîn, lí ê kim, lóng sī góa ê, lí hiahê bó͘, lí hiahê kiáⁿ-jî, siōng súi ê, mā sī góa ê. "
20:4 I-su-la-el ông ìn kóng, " Góa ê chú, góa ê ông, chiàu lí ê ōe, góa kah góa só͘-ū ê lóng sī lí ê. "
20:5 Sù-chiá koh lâi kóng, " Bian-ha-tat ánne kóng: Góa ū chhe lâng khì kìⁿ lí, ài lí kā lí ê gîn, kim, bó͘ kah kiáⁿ-jî lóng kau hō͘ góa.
20:6 Chóng-.sī, bîn-á-chài chha-put-to chit sî, góa ē chhe góa ê sù-chiá kàu lí hia, chhiau-chhōe lí ê chhù kah lí ê lô͘-po̍k ê chhù, kiàn-nā lí só͘ khòaⁿ-chò hó ê, in ē chhin-chhiú tòa cháu. "
20:7 I-su-la-el ông tiàu kok lāi ê tiúⁿ-ló lóng lâi, kā in kóng, " Lín khòaⁿ, chit-ê lâng thiau-tî chhōe phāng beh hāi góa. I bat chhe lâng lâi góa chia, ài góa ê bó͘, kiáⁿ-jî kah kim-gîn, góa lóng bô kā i the-sî. "
20:8 Tiúⁿ-ló kah chèng lâng lóng kā ông kóng, " M̄-thang thiaⁿ i ê ōe, mā m̄ thang ín-chún i. "
20:9 Só͘-í, ông kā Bian-ha-tat ê sù-chiá kóng, " Lín kā góa ê chú — góa ê ông kóng: Lí thâu chi̍t pái chhe lâng lâi tùi lí ê lô͘-po̍k só͘ thó ê, góa ū ín-chún; chóng-.sī, chit pái góa chò bē kàu. " Sù-chiá chiū tńg-khì hôe-hok.
20:10 Bian-ha-tat koh chhe lâng khì kóng, " Sa-má-lī-a ê thô͘-soa hún, nā ū kàu-gia̍h hō͘ tòe góa ê lâng ta̍k lâng mi chi̍t pé, chiū goān hiahê sîn-bêng ka-pōe kā góa chek-hoa̍t! "
20:11 I-su-la-el ông ìn kóng, " Lín khì kā i kóng, chhēng khoe-kah ê m̄ thang chhin-chhiūⁿ thǹg khoe-kah ê lâi khoa-kháu. "
20:12 Bian-ha-tat kah hiahê ông tī pò͘-pêⁿ lāi lim chiú, thiaⁿ tio̍h chiahê ōe, chiū kā i ê jîn-sîn kóng, " Pâi-tīn kong-kek! " In chiū pâi tīn kong siâⁿ.
20:13 Ū chi̍t-ê sian-ti lâi kìⁿ I-su-la-el ông A-hap kóng, " Siōng-chú ánne kóng, ' Lí ū khòaⁿ tio̍h chi̍t tōa-tīn ê lâng bô? Lí khòaⁿ, kin-á-ji̍t góa ē kā in kau tī lí ê chhiú tiong, lí chiū chai Góa sī Siōng-chú. '"
20:14 A-hap kóng, " Beh ēng siáⁿ lâng? " I ìn kóng, " Siōng-chú ánne kóng: Ēng chiahê séng-tiúⁿ ê siàu-liân lâng. " A-hap kóng, " Siáⁿ lâng beh pâi tīn? " Sian-ti ìn kóng, " Chiū-sī lí. "
20:15 I chiū sǹg hiahê séng-tiúⁿ ê siàu-liân lâng, chóng-kiōng ū nn̄g-pah saⁿ-cha̍p-jī miâ; āu-lâi i koh sǹg chèng lâng, to̍h-sī I-su-la-el lâng, chóng-kiōng ū chhit chheng miâ.
20:16 Ji̍t-tiong-tàu ê sî, in chiū chhut-.khì; Bian-ha-tat kah hiahê ông, to̍h-sī kā i pang-chān ê saⁿ-cha̍p-jī-ê ông, tī pò͘-pêⁿ lāi chia̍h-chiú-chùi.
20:17 Hiahê séng-tiúⁿ ê siàu-liân lâng chò thâu chhut-.khì. Bian-ha-tat chhe lâng khì thàm-cha, in tńg-lâi hôe-hok kóng, " Ū lâng tùi Sa-má-lī-a chhut-.lâi. "
20:18 I kóng, " In nā ūi tio̍h kóng-hô chhut-.lâi, tio̍h oa̍h-oa̍h kā in lia̍h khí-.lâi; nā ūi tio̍h kau-chiàn chhut-.lâi, mā tio̍h oa̍h-oa̍h kā in lia̍h khí-.lâi. "
20:19 Hiahê séng-tiúⁿ ê siàu-liân lâng chhut siâⁿ, kun-peng mā tòe in khì,
20:20 ta̍k lâng thâi i ê tùi-te̍k. A-lâm lâng tô-cháu, I-su-la-el lâng jiok in; A-lâm ông khiâ bé kah hiahê bé-peng tô-thoat.
20:21 I-su-la-el ông chhut siâⁿ, phah hiahê chiàn-chhia kah bé, thâi-sí chin chē A-lâm lâng.
20:22 Hitê sian-ti lâi kìⁿ I-su-la-el ông, kā i kóng, " Lí tio̍h kakī kiông-chòng khí-.lâi, tio̍h kín-sīn án-chóaⁿ chò, in-ūi mê-nî chit sî, A-lâm ông ē khí-lâi kā lí kong-kek. "
20:23 A-lâm Lâng Tē-jī pái Lâi Kong-kek
A-lâm ông ê jîn-sîn kā i kóng, " I-su-la-el lâng ê Siōng-tè sī soaⁿ-thâu ê Siōng-tè, só͘-í, in khah iâⁿ lán; chóng-.sī, lán nā tī pêng-goân kah in kau-chiàn, chiū ē khah iâⁿ in.
20:24 Ông tio̍h ánne kiâⁿ: Hiahê ông ta̍k-ê tio̍h kā i bián chit, li̍p kun-tiúⁿ lâi tāi-thè in,
20:25 koh chiàu lí só͘ sit-lo̍h ê kun-peng lâi chio-bō͘ chi̍t tūi kun-peng, ēng bé pó͘ bé, ēng chiàn-chhia pó͘ chiàn-chhia; lán tī pêng-goân kah in kau-chiàn, ún-tàng ē iâⁿ. " Ông chiū thiaⁿ in ê ōe khì kiâⁿ.
20:26 Keh nî, Bian-ha-tat tiám-sǹg A-lâm lâng, chiūⁿ-khì A-hek, beh kah I-su-la-el lâng kau-chiàn.
20:27 I-su-la-el lâng mā tiám-sǹg in ê jîn-sò͘, chún-pī kun-niû, chhut-khì kā in tí-te̍k, chat iâⁿ tī in ê tùi-bīn, chhin-chhiūⁿ nn̄g sió-kûn ê soaⁿ-iûⁿ-á; chóng-.sī, A-lâm lâng móa tē-bīn.
20:28 Ū Siōng-tè ê lô͘-po̍k lâi kìⁿ I-su-la-el ông, kóng, " Siōng-chú ánne kóng, ' In-ūi A-lâm lâng kóng: Siōng-chú sī soaⁿ-thâu ê Siōng-tè, m̄-sī soaⁿ-kok ê Siōng-tè, só͘-í, góa beh kā chit tōa-tīn ê lâng lóng kau tī lí ê chhiú tiong, lín chiū chai Góa sī Siōng-chú. '"
20:29 In chiū chat iâⁿ, tāi-ke sio tùi-bīn chhit ji̍t, kàu tē-chhit ji̍t siang pêng kun-peng kau-chiàn; tī chit ji̍t, I-su-la-el lâng thâi-sí A-lâm lâng pō͘-peng cha̍p bān lâng.
20:30 Kî-tha ê lâng tô-cháu khì A-hek siâⁿ, hit-ê siâⁿ ê siâⁿ chhiûⁿ tó, teh-sí só͘ chhun lo̍h-.lâi ê nn̄g-bān chhit-chheng lâng. Bian-ha-tat mā cháu ji̍p siâⁿ, bih tī lāi-pâng.
20:31 I ê jîn-sîn kā i kóng, " Lí khòaⁿ, goán thiaⁿ tio̍h I-su-la-el jîn-bîn ê lia̍t ông sī jîn-chû ê ông, kiû lí chún goán hâ môa-pò͘ tī goán ê io, thâu-khak phoa̍h soh-á, chhut-khì tâu-hâng I-su-la-el ông, kiámchhái i ē jiâu lí ê sèⁿ-miā. "
20:32 In chiū io hâ môa-pò͘, thâu-khak phoa̍h soh-á, khì kìⁿ I-su-la-el ông, kóng, " Lí ê lô͘-po̍k Bian-ha-tat kóng: Kiû lí jiâu góa ê sèⁿ-miā. " A-hap kóng, " I kám iáu oa̍h-.leh? I sī góa ê hiaⁿ-tī. "
20:33 Hiahê lâng chim-chiok thiaⁿ i ê kháu-khì, sûi-sî sūn i ê ōe-bóe, kóng, " Sī lah! Sī lí ê hiaⁿ-tī Bian-ha-tat! " I kóng, " Lín khì kā i chhōa-.lâi. " Bian-ha-tat chhut-lâi kìⁿ ông, ông chiū hō͘ i chē chhia.
20:34 Bian-ha-tat kā i kóng, " Góa ê lāu-pē tùi lí ê lāu-pē só͘ chhiúⁿ hiahê siâⁿ, góa ē hêng lí. Jî-chhiáⁿ lí thang tī Ta-má-su-ko siat ke-lō͘, chhin-chhiūⁿ góa ê lāu-pē tī Sa-má-lī-a só͘ siat ê ánne. " A-hap kóng, " Góa chiàu chit-ê iok, pàng lí tńg-.khì. " Chiū kah i li̍p-iok, pàng i tńg-.khì.
20:35 Sian-ti Chek-pī A-hap
Ū sian-ti ê chi̍t-ê ha̍k-seng, ēng Siōng-chú ê ōe kā i ê tâng-phōaⁿ kóng, " Chhiáⁿ lí phah góa. " Hitê lâng m̄-khéng kā i phah.
20:36 I chiū kā i kóng, " In-ūi lí m̄ chun-thàn Siōng-chú ê ōe, lí chi̍t-ē lī-khui góa, ē ū sai kā lí kā-sí. " I chi̍t-ē lī-khui, kó-jiân ū tú tio̍h sai lâi kā i kā-sí.
20:37 I koh tú tio̍h chi̍t-ê lâng, kā i kóng, " Chhiáⁿ lí phah góa. " I chiū kā i phah, phah kàu tio̍h-siong.
20:38 Sian-ti chiū khì, tī lō͘-.ni̍h thèng-hāu ông; i kái-chong i ê iông-māu, ēng kin-á tà ba̍k-chiu.
20:39 Ông tùi hia keng-kòe ê sî, i kiò ông kóng, " Lí ê lô͘-po̍k chhut-tīn, ū chi̍t-ê lâng oat-lâi piⁿ-á, koh chhōa chi̍t-ê lâng lâi kau hō͘ góa, kóng, ' Lí kò͘-siú chit-ê lâng, i nā sit-lo̍h, lí ê sèⁿ-miā tio̍h tāi-thè i ê sèⁿ-miā; nā bô, lí tio̍h kau chhut chi̍t tha-lan-t ê gîn. '
20:40 Lí ê lô͘-po̍k kò͘ chit-hāng hit-hāng ê sî, hit-ê lâng soah cháu bô-.khì. " I-su-la-el ông kā i kóng, " Lí ê àn-kiāⁿ ánne, lí í-keng kakī phòaⁿ-toàn. "
20:41 I kóaⁿ-kín tû-khì tà ba̍k-chiu ê kin-á, I-su-la-el ông chiū jīn-chhut i sī sian-ti ê chi̍t-ê.
20:42 I kā ông kóng, " Siōng-chú ánne kóng, ' In-ūi lí kā góa só͘ tiāⁿ tio̍h beh bia̍t ê lâng pàng cháu, só͘-í lí ê sèⁿ-miā chiū tio̍h tāi-thè i ê sèⁿ-miā, lí ê jîn-bîn chiū tio̍h tāi-thè i ê jîn-bîn. '"
20:43 I-su-la-el ông chiū ut-būn bô hoaⁿ-hí, tńg-khì Sa-má-lī-a i ê chhù.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。