列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
18:1 E-li-iah kah Ba-al ê Chèng Sian-ti
Kòe chin chē goe̍h-ji̍t, tī tē-saⁿ nî, Siōng-chú ê ōe lîm-kàu E-li-iah kóng, " Lí khì, hō͘ A-hap khòaⁿ tio̍h lí; Góa ē lo̍h hō͘ tī tē-chiūⁿ. "
18:2 E-li-iah chiū khì, beh hō͘ A-hap khòaⁿ-.tio̍h. Hit sî, Sa-má-lī-a ki-hng chin lī-hāi.
18:3 A-hap chiū kiò i ê koán-ke O-ba-tiah lâi. ( O-ba-tiah put-chí kèng-ùi Siōng-chú,
18:4 in-ūi I-é-che-bel bia̍t Siōng-chú chiahê sian-ti ê sî, O-ba-tiah kā sian-ti chi̍t pah lâng chhàng tī tōng lāi, gō͘-cha̍p lâng chò chi̍t cho͘, ēng piáⁿ kah chúi kā in iúⁿ-chhī. )
18:5 A-hap kā O-ba-tiah kóng, " Lí khì piàn kiâⁿ chit-ê tē, khì-kàu só͘-ū ê chúi-chôaⁿ piⁿ kah só͘-ū ê khe piⁿ; kiámchhái lán ē tit tio̍h chheⁿ-chháu, thang hō͘ bé kah lô oa̍h lo̍h-.khì, bián-tit chengseⁿ choân-pō͘ sit-lo̍h. "
18:6 Chiū ánne, in hun-khui beh piàn kiâⁿ choân tē. A-hap kakī kiâⁿ chi̍t tiâu lō͘, O-ba-tiah mā kakī kiâⁿ chi̍t tiâu lō͘.
18:7 O-ba-tiah tī lō͘-.ni̍h, E-li-iah tú tio̍h i, O-ba-tiah jīn-tit i, chiū phak lo̍h-.khì, kóng, " Lí kám sī góa ê chú E-li-iah? "
18:8 I ìn kóng, " Sī, lí khì kā lí ê chú kóng, E-li-iah tī chia. "
18:9 O-ba-tiah kóng, " Góa ū hoān siáⁿ-mi̍h chōe? Lí kèng-jiân beh kā lí ê lô͘-po̍k kau tī A-hap ê chhiú, lâi hāi-sí góa.
18:10 Góa kí éng-oán oa̍h ê Siōng-chú — lí ê Siōng-tè lâi kóng, bô chi̍t cho̍k, bô chi̍t kok, góa ê chú bô chhe lâng kàu hia chhōe lí. In nā kóng, i bô tī chia, chiū kiò hit kok hit cho̍k ê lâng chiùchōa kóng in si̍t-chāi bô tú tio̍h lí.
18:11 Taⁿ lí kóng, khì kā lí ê chú kóng, E-li-iah tī chia;
18:12 góa chi̍t ē lī-khui lí, Siōng-chú ê Sèng Sîn ē chhōa lí kàu góa só͘ m̄-chai ê só͘-chāi. Góa khì kā A-hap kóng, i mā chhōe lí bē tio̍h, chiū ē kā góa thâi-sí. Chóng-.sī, lí ê lô͘-po̍k tùi siàu-liân to̍h sī kèng-ùi Siōng-chú ê.
18:13 Tng I-é-che-bel thâi Siōng-chú chèng sian-ti ê sî, góa só͘ chò ê kám bô lâng kā góa ê chú kóng? Chiū-sī góa kā Siōng-chú ê sian-ti chi̍t pah lâng chhàng tī tōng-.ni̍h, gō͘-cha̍p lâng chò chi̍t cho͘, ēng piáⁿ kah chúi kā in iúⁿ-chhī.
18:14 Taⁿ lí kóng, khì kā lí ê chú kóng, ' E-li-iah tī chia', i it-tēng ē kā góa thâi-sí. "
18:15 E-li-iah kóng, " Góa kí éng-oán oa̍h ê bān-kun ê Siōng-chú, to̍h-sī góa khiā tī I ê bīn-chêng ê, kóng, kin-á-ji̍t góa it-tēng ē hō͘ A-hap khòaⁿ tio̍h góa. "
18:16 O-ba-tiah chiū khì kìⁿ A-hap, kā i kóng, A-hap chiū lâi kìⁿ E-li-iah.
18:17 A-hap khòaⁿ tio̍h E-li-iah ê sî, chiū kā i kóng, " Lí kám sī hām-hāi I-su-la-el ê? "
18:18 E-li-iah ìn kóng, " Hām-hāi I-su-la-el ê m̄-sī góa, sī lí kah lí ê lāu-pē ê ke, in-ūi lín khì-sak Siōng-chú ê kài-bēng, khì tòe hiahê Ba-al.
18:19 Taⁿ lí tio̍h chhe lâng, chū-chi̍p I-su-la-el jîn-bîn kah Ba-al ê sian-ti sì-pah gō͘-cha̍p lâng, í-ki̍p tī I-é-che-bel ê toh lim-chia̍h ê A-si-lah ê sian-ti sì-pah lâng, lóng khì Kal-mel soaⁿ lâi-kàu góa chia. "
18:20 A-hap chiū chhe lâng khì I-su-la-el jîn-bîn hia, chio-chi̍p chiahê sian-ti lâi-kàu Kal-mel soaⁿ.
18:21 E-li-iah lâi kìⁿ chèng lâng kóng, " Lín chûn nn̄g-iūⁿ sim bô koat-toān, ē kàu tang-sî? Nā Siōng-chú sī Siōng-tè, chiū tio̍h chun-thàn Siōng-chú; nā Ba-al sī Siōng-tè, chiū tio̍h chun-thàn Ba-al. " Jîn-bîn bô ìn kah chi̍t kù ōe.
18:22 E-li-iah kā jîn-bîn kóng, " Siōng-chú ê sian-ti kantaⁿ chhun góa chi̍t-ê lâng; chóng-.sī, Ba-al ê sian-ti, ū sì-pah gō͘-cha̍p lâng.
18:23 Taⁿ tio̍h ēng nn̄g chiah gû-káng-á hō͘ goán, Ba-al ê sian-ti thang ūi kakī kéng chi̍t chiah gû-á, chhiat-chò kui tè, hē tī chhâ téng, ē-bīn m̄ thang lok hóe; góa liāu-lí hit chiah gû-á, hē tī chhâ téng, ē-bīn mā bô lok hóe.
18:24 Lín kiû-kiò lín ê sîn-bêng ê miâ, góa kiû-kiò Siōng-chú ê miâ. Hitê ēng hóe hián-èng ê Siōng-tè to̍h-sī Siōng-chú. " Jîn-bîn ìn kóng, " Chit-ê ōe kóng liáu chin hó. "
18:25 E-li-iah tùi Ba-al ê sian-ti kóng, " Lín ūi kakī kéng chi̍t chiah gû-káng-á, tāi-seng kā i liāu-lí, in-ūi lín lâng-gia̍h khah chē; lín kiû-kiò lín sîn-bêng ê miâ, chóng-.sī, m̄ thang lok hóe tī ē-bīn. "
18:26 In chiū kā só͘ hō͘ in ê gû-káng-á khan-khì liāu-lí, jiân-āu tùi chá-khí kàu ji̍t-tàu, kiû-kiò Ba-al ê miâ, kóng, " Ba-al ah, tio̍h thiaⁿ goán! " Chóng-.sī, bô siaⁿ-soeh, mā bô ìn-tap. In tī só͘ khí ê tôaⁿ sì-kho͘-ûi tiô-thiàu.
18:27 Kàu tiong-tàu, E-li-iah khau-sé in kóng, " Tōa siaⁿ kiû-kiò à! In-ūi i sī sîn-bêng, i kiámchhái tiām-tiām teh siūⁿ, á-.sī thè-khì phian-phiah ê só͘-chāi, á-.sī kiâⁿ lō͘, á-.sī teh khùn, lín tio̍h kā i kiò-chhéⁿ. "
18:28 In tōa-siaⁿ kiû-kiò, chiàu in ê lē, ēng to, ēng chhiuⁿ koah kakī, tì-sú in ê seng-khu lâu hoeh.
18:29 Tùi ji̍t kòe-tàu kàu hiàn ê-hng-chè ê sî, in teh kóng in ê sian-ti ōe; chóng-.sī, bô siaⁿ-soeh, bô ìn-tap, mā bô chhap in ê.
18:30 E-li-iah kā chèng lâng kóng, " Lín lâi kīn-óa góa. " Chèng lâng chiū khì kīn-óa i, i chiū koh siu-lí tó-hoāi ê Siōng-chú ê tôaⁿ.
18:31 E-li-iah the̍h cha̍p-jī tè chio̍h, chiàu Iâ-kop ê kiáⁿ ê chi-cho̍k ê sò͘-gia̍h （Chit-ê Iâ-kop to̍h-sī chá-chêng Siōng-chú ê ōe bat lîm-kàu i kóng, " I-su-la-el ē chò lí ê miâ ê"）.
18:32 E-li-iah ēng chiahê chio̍h-thâu, hōng Siōng-chú ê miâ khí chi̍t chō tôaⁿ, tī tôaⁿ ê sì-kho͘-ûi khui kau, ē té-tit chéng-chí nn̄g sè-a.
18:33 I koh pâi-lia̍t chhâ, kā gû-á chhiat-chò kui tè, hē tī chhâ téng, kóng, " Lín ēng sì-ê tháng té chúi móa-móa, piàⁿ tī sio-chè kah chhâ-ê téng-bīn. "
18:34 Koh kóng, " Piàⁿ tē-jī pái. " In chiū piàⁿ tē-jī pái; koh kóng, " Piàⁿ tē-saⁿ pái. " In chiū piàⁿ tē-saⁿ pái.
18:35 Chúi lâu tī tôaⁿ ê sì-kho͘-ûi, kau mā ū chúi móa-móa.
18:36 Kàu hiàn ê-hng-chè ê sî, sian-ti E-li-iah kiâⁿ óa-.lâi, kóng, " A-bu-la-hàm, Í-sak, I-su-la-el ê Siōng-tè — Siōng-chú ah, kiû Lí kin-á-ji̍t hō͘ lâng chai Lí tī I-su-la-el chò Siōng-tè, mā chai góa sī Lí ê lô͘-po̍k, koh sī chiàu Lí ê ōe lâi kiâⁿ che it-chhè ê tāichì.
18:37 Siōng-chú ah, tio̍h thiaⁿ góa, tio̍h thiaⁿ góa! Hō͘ chit kok ê jîn-bîn chai Lí — Siōng-chú to̍h-sī Siōng-tè, Lí hō͘ in ê sim oa̍t tò-tńg. "
18:38 Siōng-chú ê hóe chiū kàng-lo̍h, sio i choân-pō͘ ê sio-chè kah chhâ, kah chio̍h, kah thô͘, koh kā kau lāi ê chúi sio ta-.khì.
18:39 Jîn-bîn khòaⁿ-.tio̍h, chiū phak tī thô͘-kha kóng, " Siōng-chú, I sī Siōng-tè! Siōng-chú, I sī Siōng-tè! "
18:40 E-li-iah kā in kóng, " Lia̍h Ba-al ê sian-ti, bô iông-ín chi̍t-ê tô-cháu. " In chiū lia̍h hiahê Ba-al ê sian-ti. E-li-iah chhōa in lo̍h-khì kàu Ki-sūn khe piⁿ, tī hia kā in thâi-sí.
18:41 Khòng-ōaⁿ Kiat-sok
E-li-iah kā A-hap kóng, " Lí taⁿ thang chiūⁿ-khì lim-chia̍h, in-ūi ū tōa hō͘ ê siaⁿ. "
18:42 A-hap chiū chiūⁿ-khì lim-chia̍h. E-li-iah tńg-khì Kal-mel soaⁿ téng, khut-sin tī tē-.ni̍h, bīn phak tī nn̄g-ê kha-thâu-u ê tiong-kan,
18:43 tùi i ê lô͘-po̍k kóng, " Lí khì, ǹg hái khòaⁿ. " Lô͘-po̍k chiū chiūⁿ-khì khòaⁿ, kóng, " Lóng bô siáⁿ-mi̍h. " I kóng, " Lí koh khì, tio̍h khì chhit pái. "
18:44 Kàu tē chhit pái, i kóng, " Khòaⁿ-kìⁿ nā ū hûn tùi hái-.ni̍h khí-.lâi, sè-sè chhin-chhiūⁿ lâng ê chhiú." E-li-iah kóng, " Lí chiūⁿ-.khì, kā A-hap kóng, tio̍h chún-pī chhia lo̍h-.khì, bián-tit hō͘ hō͘ chó͘-tòng. "
18:45 Bô gōa kú ê tiong-kan chiū piàn thiⁿ, in-ūi hong kah hûn o͘-àm, lo̍h tōa hō͘. A-hap chiū chē chhia khì E-chu-le-el.
18:46 Siōng-chú ê chhiú khòa tī E-li-iah ê sin chiūⁿ, i chiū hâ io, tī A-hap ê thâu-chêng cháu-khì-kàu E-chu-le-el ê siâⁿ mn̂g.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。