創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
32:1 Iâ-kop Chún-pī kah E-sáu Siong-hōe
Iâ-kop koh kè-sio̍k kiâⁿ i ê lō͘, Siōng-tè ê sù-chiá tú tio̍h i.
32:2 Iâ-kop khòaⁿ tio̍h in, chiū kóng, " Che sī Siōng-tè ê kun-tūi. " Só͘-í, kā hit só͘-chāi hō-miâ kiò-chò Ma-há-niam.
32:3 Iâ-kop chhe lâng seng khì Se-il ê tē, E-tóm ê chhân, kìⁿ i ê a-hiaⁿ E-sáu.
32:4 I kā in hoan-hù kóng, " Lín kā góa ê chú E-sáu kóng, ' Lí ê lô͘-po̍k Iâ-kop ánne kóng, góa tī La̍h-ban hia kià-kha, tòa kàu kin-á-ji̍t.
32:5 Góa ū gû, lî, iûⁿ-kûn, lô͘-po̍k, lú-pī, taⁿ chhe lâng lâi pò góa ê chú, ài beh tī lí ê bīn-chêng tit tio̍h un-tián. '"
32:6 Só͘ chhe ê lâng tńg-lâi Iâ-kop hia, kóng, " Goán kàu lí ê a-hiaⁿ E-sáu hia, i chitmá tng teh lâi beh kā lí gêng-chiap, koh ū sì-pah lâng kah i chò-hóe lâi. "
32:7 Iâ-kop tōa kiaⁿ koh sim-būn, chiū kā hiahê kah i tông-chāi ê lâng, iûⁿ-kûn, gû-kûn, lo̍k-tô, hun-chò nn̄g tūi,
32:8 kóng, " E-sáu nā lâi kong-kek chit tūi, chhun-ê hit-tūi iáu thang tô-cháu. "
32:9 Iâ-kop koh kóng, " Góa ê chó͘-sian A-bu-la-hàm ê Siōng-tè, góa ê pē Í-sak ê Siōng-tè — Siōng-chú ah, Lí bat tùi góa kóng, ' Tò-khì lí ê pún-tē pún cho̍k, góa ē hó khoán-thāi lí. '
32:10 Lí tùi Lí ê lô͘-po̍k só͘ si it-chhè ê chû-ài kah sêng-si̍t, to̍h-sī siōng sè ê góa mā bē kham-tit tit tio̍h; góa chêng gia̍h góa ê koái-á, kòe chit-ê Iol-tàn hô, taⁿ góa í-keng chiâⁿ-chò nn̄g tūi.
32:11 Kiû Lí kiù góa thoat-lī góa ê a-hiaⁿ E-sáu ê chhiú, in-ūi góa kiaⁿ i, khióng-kiaⁿ i lâi thâi-sí góa kah góa hiahê bó͘-kiáⁿ.
32:12 Lí mā bat kóng, ' Góa it-tēng ē hó khoán-thāi lí, hō͘ lí ê kiáⁿ-sun chhin-chhiūⁿ hái piⁿ ê soa, chē kàu sǹg bē liáu. '"
32:13 Hit mê, Iâ-kop hioh tī hia, chiū tī i só͘-ū ê mi̍h ê lāi-bīn, kéng-chhut lé-mi̍h, beh sàng i ê a-hiaⁿ E-sáu:
32:14 Soaⁿ-iûⁿ-bó nn̄g-pah chiah, soaⁿ-iûⁿ-kang jī-cha̍p chiah, mî-iûⁿ-bó nn̄g-pah chiah, mî-iûⁿ-kang jī-cha̍p chiah,
32:15 Lo̍k-tô-bó kah chia̍h leng ê kiáⁿ saⁿ-cha̍p chiah, gû-bó sì-cha̍p chiah, gû-káng cha̍p chiah, lî-bó jī-cha̍p chiah, lî-á-kiáⁿ cha̍p chiah.
32:16 I kā kok chióng chengseⁿ lēng-gōa chi̍t kûn chi̍t kûn hun-khui, kau-tài lô͘-po̍k koán-lí, koh kā lô͘-po̍k kóng, " Lín chò góa ê thâu-chêng khì, tio̍h hō͘ ta̍k kûn chi kan ū sio-lī. "
32:17 I koh hoan-hù chò thâu ê kóng, " Góa ê a-hiaⁿ E-sáu tú tio̍h lí ê sî, nā mn̄g lí kóng, ' Lí sī siáⁿ lâng ê? Lí beh khì tó-ūi? Lí thâu-chêng hiahê chengseⁿ sī siáⁿ lâng ê? '
32:18 Lí tio̍h kóng, ' Sī lí ê lô͘-po̍k Iâ-kop ê, sī beh sàng góa ê chú E-sáu ê lé-mi̍h. I chitmá pún-sin mā tī goán ê āu-bīn. '"
32:19 Iâ-kop koh hoan-hù tē-jī kûn, tē-saⁿ kûn kah só͘-ū kóaⁿ kui kûn chengseⁿ ê lâng kóng, " Lín tú tio̍h E-sáu ê sî, mā tio̍h chiàu ánne kā i kóng.
32:20 Lín mā tio̍h kóng, ' Lí ê lô͘-po̍k Iâ-kop tī goán ê āu-bīn. '" In-ūi Iâ-kop kakī siūⁿ kóng, " Góa ēng tī góa thâu-chêng khì ê lé-mi̍h lâi kái i ê hūn, jiân-āu góa kìⁿ tio̍h i ê bīn ê sî, kiámchhái i ē chiap-la̍p góa. "
32:21 Chiū ánne, lé-mi̍h seng kiâⁿ; hit mê, Iâ-kop hioh tī tiùⁿ-pâng tiong.
32:22 Iâ-kop tī Pe-nu-el Sio-ián
Iâ-kop àm-sî khí-.lâi, chhōa i nn̄g-ê bó͘, nn̄g-ê lú-pī kah cha̍p-it-ê kiáⁿ, lóng kòe Iá-bo̍k ê tō͘-thâu.
32:23 I tāi-seng hō͘ in kòe khe, só͘-ū ê mā lóng hō͘ in kòe.
32:24 Chí-ū chhun Iâ-kop kakī tī hia. Ū chi̍t-ê lâng lâi kah i sio-ián, it-ti̍t kàu thiⁿ-phú-kng.
32:25 Hitê lâng khòaⁿ ián bē iâⁿ i, chiū siàn Iâ-kop ê tōa-thúi-khū; sio-ián ê sî, Iâ-kop ê tōa-thúi-khū choāiⁿ-.tio̍h.
32:26 Hitê lâng kóng, " Thiⁿ beh kng à, tio̍h pàng góa khì. " Iâ-kop kóng, " Lí nā bô kā góa chiok-hok, góa m̄-pàng Lí khì. "
32:27 Hitê lâng kóng, " Lí ê miâ kiò-chò siáⁿ-mi̍h? " I kóng, " Góa kiò-chò Iâ-kop. "
32:28 Hitê lâng kóng, " Lí ê miâ bô beh koh kiò-chò Iâ-kop, beh kiò-chò I-su-la-el, in-ūi lí kah Siōng-tè á-.sī kah lâng tàu su-iâⁿ, lóng tit tio̍h khah iâⁿ. "
32:29 Iâ-kop mn̄g I kóng, " Chhiáⁿ kā góa kóng Lí ê miâ. " Hitê lâng ìn kóng, " Lí án-chóaⁿ beh mn̄g Góa ê miâ? " Jiân-āu, chiū tī hia kā i chiok-hok.
32:30 Iâ-kop kā hit só͘-chāi kiò-chò Pe-nu-el, in-ūi i kóng, " Góa tng-thâu tùi-bīn kìⁿ tio̍h Siōng-tè, góa ê sèⁿ-miā iáu tit tio̍h pó-choân. "
32:31 Ji̍t tú-á chhut, Iâ-kop keng-kòe Pe-nu-el, i ê tōa-thúi í-keng pái.
32:32 Só͘-í, kàu kin-á-ji̍t, chiahê I-su-la-el lâng bô chia̍h tōa-thúi-thâu ê kin, in-ūi hit-ê lâng siàn Iâ-kop tōa-thúi-khū ê kin.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。