列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
14:1 Ia-lô-ba-am ê Kiáⁿ ê Sí-bông
Hit sî, Ia-lô-ba-am ê kiáⁿ A-bi-iah phòa-pēⁿ.
14:2 Ia-lô-ba-am tùi i ê bó͘ kóng, " Lí khí-lâi kái-chong, hō͘ lâng m̄-chai lí sī Ia-lô-ba-am ê bó͘. Jiân-āu khì Sī-lô, tī hia ū sian-ti A-hi-iah, koan-hē góa i bat kóng, góa ē chò chiahê jîn-bîn ê ông.
14:3 Taⁿ lí ê chhiú tio̍h tòa cha̍p tè mī-pau kah kúi-tè-á po̍h piáⁿ, í-ki̍p chi̍t kan bi̍t khì kìⁿ i, i ē kā lí kóng lán ê kiáⁿ ē án-chóaⁿ. "
14:4 Ia-lô-ba-am ê bó͘ chiū chiàu ánne khì kiâⁿ, khí-sin khì Sī-lô, lâi-kàu A-hi-iah ê ke. A-hi-iah in-ūi nî lāu, ba̍k-chiu chhâ-chhâ khòaⁿ bē tio̍h.
14:5 Siōng-chú kā A-hi-iah kóng, " Lí khòaⁿ, Ia-lô-ba-am ê bó͘ lâi beh ūi tio̍h i ê kiáⁿ lâi mn̄g lí, in-ūi i ū phòa-pēⁿ. Lí tio̍h ánne ánne kā i kóng. Ia-lô-ba-am ê bó͘ ji̍p-.lâi ê sî, ē chng chò pa̍t-ê chabó͘ lâng. "
14:6 I tú-á ji̍p mn̂g, A-hi-iah thiaⁿ tio̍h i ê kha-pō͘ siaⁿ, chiū kóng, " Ia-lô-ba-am ê bó͘, ji̍p-.lâi! Lí ná ē chng chò pa̍t-ê chabó͘ lâng? Góa hōng chhe-khián lâi pò lí pháiⁿ siau-sit.
14:7 Lí tńg-khì kā Ia-lô-ba-am kóng: Siōng-chú — I-su-la-el ê Siōng-tè ánne kóng, ' Góa tùi jîn-bîn tiong kí-khí lí, siat-li̍p lí chò Góa ê I-su-la-el jîn-bîn ê kun-ông,
14:8 tùi Ta-bi̍t ke thiah-li̍h kok, siúⁿ-sù hō͘ lí. Chóng-.sī, lí bô chhin-chhiūⁿ Góa ê lô͘-po̍k — Ta-bi̍t chun-siú Góa ê kài-bēng, chi̍t-sim tòe Góa, choan-sim kiâⁿ Góa khòaⁿ-chò chèng-ti̍t ê tāichì.
14:9 Lí kèng-jiân kiâⁿ pháiⁿ, iâⁿ-kòe it-chhè tī lí í-chêng ê ông. In-ūi lí ūi kakī chō pa̍t-ê sîn-bêng, koh chù ngó͘-siōng, kek góa ê siū-khì, kā góa khì-sak tī lí ê kha-chiah-āu.
14:10 In-ūi ánne, Góa ē hō͘ chai-hō lîm-kàu Ia-lô-ba-am ê ke, Góa ē chián-tû sio̍k Ia-lô-ba-am ê chapo͘ teng, bô-lūn siū khu-sok ê á-.sī chū-iû ê, tī I-su-la-el mā beh choân-pō͘ tû-khì Ia-lô-ba-am ê ke, chhin-chhiūⁿ lâng tû-khì pùn-sò, kàu choân-pō͘ tû-liáu.
14:11 Kiàn-nā sio̍k Ia-lô-ba-am ê lâng, sí tī siâⁿ lāi ê, káu ē kā i chia̍h; sí tī chhân-iá ê, khong-tiong ê chiáu ē kā i chia̍h, in-ūi Siōng-chú í-keng kóng kòe à. '"
14:12 Taⁿ lí khí-lâi tńg-khì lí ê ke, lí ê kha chi̍t ē ta̍h ji̍p siâⁿ, lí ê kiáⁿ chiū ē sí.
14:13 I-su-la-el jîn-bîn ē ūi i thî-khàu, kā i bâi-chòng, in-ūi sio̍k Ia-lô-ba-am ê lâng, chí ū i tit tio̍h ji̍p bōng. In-ūi tī Ia-lô-ba-am ê chhù lāi, chí ū i ǹg Siōng-chú — I-su-la-el ê Siōng-tè hián-chhut hó sū.
14:14 Siōng-chú ē ūi kakī heng-khí chi̍t-ê ông, lâi koán-lí I-su-la-el. Tī hit ji̍t, I ē chián-tû Ia-lô-ba-am ê ke. Tī tang-sî? Chit sî to̍h-sī.
14:15 In-ūi Siōng-chú ē phah I-su-la-el lâng, chhin-chhiūⁿ chúi tiong ê lô͘-úi teh iô, koh ē tī I só͘ siúⁿ-sù hō͘ in chó͘-sian ê hó tē poe̍h-chhut I-su-la-el ê kin, hō͘ in tī tōa hô hit pêng sì-sòaⁿ, in-ūi in chō in ê A-si-lah, kek Siōng-chú ê siū-khì.
14:16 In-ūi Ia-lô-ba-am ê chōe, to̍h-sī i pún-sin só͘ hoān ê chōe, koh hō͘ I-su-la-el lâng hoān chōe, só͘-í, Siōng-chú ē khì-sak I-su-la-el. "
14:17 Ia-lô-ba-am ê bó͘ chhut-hoat, tńg-khì kàu Til-chah, tú-á kàu chhù ê hō͘-tēng, i ê kiáⁿ chiū sí.
14:18 I-su-la-el jîn-bîn kā i bâi-chòng, ūi i thî-khàu, chiàu Siōng-chú thok I ê lô͘-po̍k sian-ti A-hi-iah só͘ kóng ê ōe.
14:19 Ia-lô-ba-am Sí-.khì
Ia-lô-ba-am kî-tha ê tāichì, i án-chóaⁿ kau-chiàn, án-chóaⁿ chò ông, lóng siá tī I-su-la-el lia̍t ông ê kì-lio̍k.
14:20 Ia-lô-ba-am chò ông, kiōng jī-cha̍p jī nî, chiū kah i ê chó͘-sian chò-hóe khùn. I ê kiáⁿ Ná-tap sòa-chiap i chò ông.
14:21 Iô-tah Ông Lô-bo-àm
( LTH 11: 5-12: 15)
Só͘-lô-móng ê kiáⁿ Lô-bo-àm tī Iô-tah chò ông. Lô-bo-àm chē-ūi ê sî, sì-cha̍p-it hòe, tī Ê-lú-sa-lèm, to̍h-sī Siōng-chú tùi I-su-la-el chèng chi-cho̍k tiong só͘ kéng lâi an-tì I ê miâ ê siâⁿ, chò ông cha̍p-chhit nî. I ê lāu-bú ê miâ kiò-chò Ná-má, sī Am-móng lâng.
14:22 Iô-tah kok kiâⁿ Siōng-chú só͘ khòaⁿ-chò pháiⁿ ê tāichì, i só͘ kiâⁿ ê chōe kek-tōng I thòng-hūn, pí in chó͘-sian só͘ chò ê koh khah pháiⁿ.
14:23 In-ūi in tī ta̍k-ê koân soaⁿ, ta̍k châng chheⁿ-chhùi ê chhiū kha khí tôaⁿ, chō thiāu-siōng kah A-si-lah.
14:24 Kok lāi mā ū lâm-sèng biō-chhiong. In o̍h hiahê Siōng-chú tī I-su-la-el lâng ê bīn-chêng só͘ kóaⁿ-chhut ê lia̍t kok, lâi kiâⁿ it-chhè khó-ò͘ⁿ ê tāichì.
14:25 Lô-bo-àm ông gō͘ nî, Ai-gi̍p ông Si-siak khí-lâi kong-kek Ê-lú-sa-lèm,
14:26 Chhiúⁿ Siōng-chú sèng-tiān ê pó-bu̍t kah ông-kiong ê pó-bu̍t, lóng tòa cháu-.khì, koh chhiúⁿ Só͘-lô-móng só͘ chò hiahê kim ê pîn-pâi.
14:27 Lô-bo-àm ông chò tâng ê pîn-pâi lâi tāi-thè, kau hō͘ kò͘-siú ông-kiong mn̂g ê sī-ōe-tiúⁿ lâi kò͘-siú.
14:28 Ông ta̍k pái ji̍p-khì Siōng-chú ê tiān, sī-ōe chiū tòa chiahê pîn-pâi khì, jiân-āu koh tòa tò tńg-.khì, hē tī sī-ōe ê chhù.
14:29 Lô-bo-àm kî-tha ê tāichì, kiàn-nā i só͘ kiâⁿ ê, kám bô kì tī Iô-tah lia̍t ông ê kì-lio̍k?
14:30 Lô-bo-àm kah Ia-lô-ba-am tiāⁿtiāⁿ kau-chiàn.
14:31 Lô-bo-àm kah i ê chó͘-sian tâng khùn, kah i ê chó͘-sian chòng tī Ta-bi̍t ê siâⁿ. I ê lāu-bú ê miâ kiò-chò Ná-má, sī Am-móng lâng. Lô-bo-àm ê kiáⁿ A-mí-iam sòa-chiap i chò ông.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。