列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
12:1 Pak-pō͘ ê Chi-cho̍k Chō-hoán
( LTH 10: 1-19)
Lô-bo-àm khì Sī-khiàm, in-ūi I-su-la-el jîn-bîn lâi-kàu Sī-khiàm, beh kā i siat-li̍p chò ông.
12:2 Chá-chêng Ne-bat ê kiáⁿ Ia-lô-ba-am siám-phiah Só͘-lô-móng ông ê bīn, cháu-khì Ai-gi̍p, tòa tī hia. Ia-lô-ba-am iáu tī Ai-gi̍p ê sî, thiaⁿ tio̍h chit-ê tāichì.
12:3 I-su-la-el lâng chiū chhe lâng khì kiò i lâi, Ia-lô-ba-am chiū kah I-su-la-el choân hōe-chiòng lâi kìⁿ Lô-bo-àm, kā i kóng,
12:4 " Lí ê lāu-pē hō͘ goán phāiⁿ kan-khó͘ ê ka-taⁿ, lí ê lāu-pē só͘ hē tī goán ê khó͘-kang kah tāng ê ka-taⁿ, kiû lí kiám khin, goán chiū kā lí ho̍k-sāi. "
12:5 Lô-bo-àm kā in kóng, " Lín tńg-.khì, kàu tē-saⁿ ji̍t chiah koh lâi kìⁿ góa. " Jîn-bîn chiū tńg-.khì.
12:6 Lô-bo-àm ê lāu-pē Só͘-lô-móng oa̍h-.leh ê sî, ū kin-tòe tī i bīn-chêng ê lāu lâng. Lô-bo-àm ông kah in gī-lūn, kóng, " Lín ū siáⁿ-mi̍h kè-chhek, góa thang hôe-hok chiahê jîn-bîn? "
12:7 In ìn i kóng, " Kin-á-ji̍t lí nā goān-ì chò chiahê jîn-bîn ê lô͘-po̍k, lâi kā in ho̍k-sāi, ēng hó ōe lâi kā in ìn-tap, in chiū ē éng-oán chò lí ê lô͘-po̍k. "
12:8 Chóng-.sī, i kī-choa̍t lāu lâng só͘ hō͘ i ê kè-chhek kah hiahê khiā tī i bīn-chêng, khì kah i pêⁿ-ûn ê siàu-liân lâng chham-siông,
12:9 kā in kóng, " Chit-ê jîn-bîn ū tùi góa kóng, ' Lí ê lāu-pē hē tī goán ê ka-taⁿ, kiû lí kā goán kiám khah khin. ' Taⁿ lín ū siáⁿ-mi̍h kè-chhek hō͘ lán thang kā in hôe-hok? "
12:10 Hiahê kah i pêⁿ-ûn ê siàu-liân lâng kóng, " Chit-ê jîn-bîn tùi lí kóng, ' Lí ê lāu-pē hō͘ goán phāiⁿ tāng ê ka-taⁿ, kiû lí kā goán kiám khin. ' Lí tio̍h ánne ìn in kóng, ' Góa ê bóe-cháiⁿ khah tōa kòe góa ê lāu-pē ê io.
12:11 Góa ê lāu-pē hō͘ lín phāiⁿ tāng ê ka-taⁿ, góa beh ke-thiⁿ lín ê ka-taⁿ! Góa ê lāu-pē ēng piⁿ kā lín kéng-kài, góa beh ēng giat-á-thâng kā lín kéng-kài! '"
12:12 Tē-saⁿ ji̍t, Ia-lô-ba-am kah chèng lâng lâi-kàu Lô-bo-àm hia; tú chiàu ông só͘ bēng-lēng ê kóng, " Tē-saⁿ ji̍t chiah koh lâi góa chia. "
12:13 Ông ēng pháiⁿ siaⁿ-sàu ìn jîn-bîn; i pàng-sak lāu lâng só͘ hiàn ê kè-chhek,
12:14 Chiàu siàu-liân lâng ê kè-chhek tùi jîn-bîn kóng, " Góa ê pē hō͘ lín phāiⁿ tāng ê tàⁿ, góa beh ke-thiⁿ lín ê ka-taⁿ; góa ê pē ēng piⁿ kā lín kéng-kài, góa beh ēng giat-á-thâng kā lín kéng-kài! "
12:15 Ông bô chun-thàn jîn-bîn, in-ūi chit-ê tāichì sī chhut tī Siōng-chú, sī beh èng-giām Siōng-chú thok Sī-lô lâng A-hi-iah tùi Ne-bat ê kiáⁿ Ia-lô-ba-am só͘ kóng ê ōe.
12:16 I-su-la-el chèng lâng khòaⁿ tio̍h ông bô chun-thàn in, jîn-bîn chiū tùi ông kóng, " Goán tī Ta-bi̍t ū siáⁿ-mi̍h hūn-gia̍h? Goán kah I-é-sái ê kiáⁿ bô koan-hē. I-su-la-el, tńg-khì lín ê pò͘-pêⁿ! Ta-bi̍t, tio̍h kò͘ lí kakī ê chhù! " Chiū ánne, I-su-la-el lâng tńg-khì in ê pò͘-pêⁿ.
12:17 Chóng-.sī, tòa tī Iô-tah chiahê siâⁿ ê I-su-la-el lâng, Lô-bo-àm iû-goân chò in ê ông.
12:18 Lô-bo-àm ông chhe koán-lí chò khó͘-kang ê lâng A-to-lâm khì I-su-la-el lâng hia, I-su-la-el jîn-bîn chiū ēng chio̍h-thâu kā i tìm-sí. Lô-bo-àm ông chiū kóaⁿ-kín chiūⁿ chhia, cháu-khì Ê-lú-sa-lèm.
12:19 Chiū ánne, I-su-la-el chō-hoán Ta-bi̍t ke, kàu kin-á-ji̍t.
12:20 I-su-la-el jîn-bîn thiaⁿ tio̍h Ia-lô-ba-am tńg-.lâi, chiū chhe lâng chhiáⁿ i kàu hōe-chiòng ê bīn-chêng, siat-li̍p i chò I-su-la-el jîn-bîn ê ông. Iô-tah chi-cho̍k í-gōa, bô lâng tòe Ta-bi̍t ê ke.
12:21 Si-má-iah Sian-ti ê Ī-giân
( LTH 11: 1-4)
Lô-bo-àm kàu Ê-lú-sa-lèm ê sî, chiū chū-chi̍p Iô-tah choân ke kah Biān-iá-mín chi-cho̍k ê lâng, kiōng cha̍p-peh bān lâng, lóng sī kòe kéng ê chiàn-sū, beh kah I-su-la-el ê chú-bîn kau-chiàn, hō͘ kok-ūi koh kui tī Só͘-lô-móng ê kiáⁿ Lô-bo-àm.
12:22 Chóng-.sī, Siōng-chú ê ōe lîm-kàu Siōng-tè ê lô͘-po̍k Si-má-iah, kóng,
12:23 " Lí khì kā Só͘-lô-móng ê kiáⁿ, Iô-tah ông Lô-bo-àm kah Iô-tah Biān-iá-mín choân ke, í-ki̍p kî-tha ê jîn-bîn kóng,
12:24 ' Siōng-chú ánne kóng: Lín m̄ thang chiūⁿ-.khì, m̄ thang kah lín ê hiaⁿ-tī I-su-la-el lâng kau-chiàn. Ta̍k lâng tio̍h tńg-khì i ê ke! In-ūi chit-ê tāichì sī chhut tī Góa. '" In thiaⁿ Siōng-chú ê ōe, chiū chiàu Siōng-chú ê ōe tò tńg-.khì.
12:25 Ia-lô-ba-am Khì-sak Siōng-chú
Ia-lô-ba-am tī E-hu-laim soaⁿ-tē khí-chō Sī-khiàm, chiū tòa tī hit tiong-kan, koh tùi hia chhut-.khì, khí-chō Pe-nu-el.
12:26 Ia-lô-ba-am sim-lāi siūⁿ kóng: Taⁿ chit-ê kok beh kui Ta-bi̍t ê ke;
12:27 chiahê jîn-bîn nā chiūⁿ-khì Ê-lú-sa-lèm, tī Siōng-chú ê tiān hiàn chè, chiahê jîn-bîn ê sim beh kui in ê chú Iô-tah ông Lô-bo-àm, in ē thâi-sí góa, iû-goân kui Iô-tah ông Lô-bo-àm. "
12:28 Ông chiū kè-ōe, chù-chō nn̄g chiah kim ê gû-á, tùi chèng lâng kóng, " Lín chiūⁿ-khì Ê-lú-sa-lèm, si̍t-chāi ûi-lân; I-su-la-el, lí khòaⁿ, chiahê sī lín ê sîn-bêng, sī chhōa lín tùi Ai-gi̍p tē khí-.lâi ê. "
12:29 I hē chi̍t chiah tī Be-thel, hē chi̍t chiah tī Tàn.
12:30 Chit-ê tāichì chiâⁿ-chò hoān chōe, in-ūi jîn-bîn khì Tàn, tī hit chiah ê thâu-chêng kèng-pài.
12:31 Ông tī soaⁿ-thâu khí biō, tùi jîn-bîn tiong m̄-sī sio̍k Lē-bī cho̍k ê, siat-li̍p i chò chè-si.
12:32 Tī Be-thel Hiàn-chè Hông Tēng-Chōe
Ia-lô-ba-am tiāⁿ tio̍h peh-.goe̍h, hit goe̍h ê cha̍p-gō͘, siat cheh-kî, chhin-chhiūⁿ Iô-tah ê cheh-kî, tī tôaⁿ téng hiàn chè. Tī Be-thel mā sī ánne hiàn chè tī i só͘ chù ê gû-á, koh kā i só͘ khí-chō soaⁿ-thâu tôaⁿ ê chè-si, an-tì tī Be-thel.
12:33 I tī peh-goe̍h cha̍p-gō͘, to̍h-sī i ê sim su-hā só͘ tiāⁿ tio̍h ê goe̍h, hiàn chè tī i tī Be-thel só͘ khí ê tôaⁿ; i kā I-su-la-el lâng siat cheh-kî, hiàn chè tī tôaⁿ-.ni̍h, koh sio hiuⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。