列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
9:1 Siōng-chú koh Hiòng Só͘-lô-móng Hián-hiān
Só͘-lô-móng í-keng khí Siōng-chú ê tiān kah ông-kiong, i it-chhè só͘ tio̍h chò ê mā lóng oân-sêng liáu-āu,
9:2 Siōng-chú tē-jī pái tùi Só͘-lô-móng hián-hiān, chhin-chhiūⁿ chá-chêng tī Gi-bóng tùi i hián-hiān ánne.
9:3 Siōng-chú tùi i kóng, " Lí tī Góa ê bīn-chêng só͘ kî-tó kah khún-kiû ê, Góa lóng ū thiaⁿ-.tio̍h. Góa í-keng kā lí só͘ khí chit keng tiān hun-pia̍t chò sèng, hō͘ Góa ê miâ éng-oán tī hia; Góa ê ba̍k-chiu, Góa ê sim mā ē tiāⁿtiāⁿ tī hia.
9:4 Kóng tio̍h lí, lí nā ēng sêng-si̍t ê sim, chèng-ti̍t kiâⁿ tī Góa ê bīn-chêng, chhin-chhiūⁿ lí ê lāu-pē Ta-bi̍t só͘ kiâⁿ ê, koh chun-thàn Góa it-chhè só͘ bēng-lēng lí ê, mā chip-siú Góa ê lu̍t-lē kah Góa ê hoat-tō͘,
9:5 Góa chiū beh tī I-su-la-el tiong kian-kò͘ lí ê kok-ūi, ti̍t-kàu éng-oán, chhin-chhiūⁿ Góa èng-ín lí ê lāu-pē Ta-bi̍t kóng, ' Lí ê kiáⁿ-sun chē I-su-la-el ê kok-ūi, éng-oán bô tn̄g. '
9:6 Siat-sú lín á-.sī lín ê kiáⁿ-sun, oa̍t tńg-sin bô tòe Góa, bô siú Góa siúⁿ-sù hō͘ lín ê kài-bēng kah lu̍t-lē, khì ho̍k-sāi pa̍t-ê sîn-bêng, lâi kā i kèng-pài,
9:7 Góa chiū beh tùi Góa siúⁿ-sù hō͘ in ê tē chián-tû I-su-la-el, jî-chhiáⁿ Góa ūi kakī ê miâ só͘ hun-pia̍t chò sèng ê chit keng tiān, mā beh tùi Góa ê bīn-chêng kā i khì-sak, hō͘ I-su-la-el lâng tī bān-kok tiong chò ōe-pèⁿ, siū khau-sé.
9:8 Chit keng tiān sûi-jiân chin koân, chiong-lâi keng-kòe ê lâng ē tio̍h-kiaⁿ kah gāng-.khì, koh thí-chhiò, kóng, ' Siōng-chú ná ē ánne khoán-thāi chit-ê tē, chit keng tiān? '
9:9 Lâng chiū ē ìn kóng, ' Sī in-ūi in khì-sak Siōng-chú — in ê Siōng-tè, to̍h-sī chhōa in ê chó͘-sian chhut Ai-gi̍p tē ê, khì kiat-liân pa̍t-ê sîn-bêng, ho̍k-sāi koh kā i kèng-pài, só͘-í, Siōng-chú hō͘ che it-chhè ê chai-hō lîm-kàu in. '"
9:10 Só͘-lô-móng kah Hi-lâm ê Hia̍p-iok
( LTH 8: 1-2)
Kàu jī-cha̍p nî bóe, to̍h-sī Só͘-lô-móng khí Siōng-chú ê tiān kah ông-kiong chit nn̄g keng chhù oân-kang ê sî,
9:11 Só͘-lô-móng ông chiū kā Ga-lí-la-iah tē-jī-cha̍p-ê siâⁿ hō͘ Hi-lâm; che sī in-ūi Tu-lô ông Hi-lâm bat chiàu Só͘-lô-móng it-chhè só͘ ài ê, ēng pek-hiuⁿ chhâ, siông chhâ kah kim hō͘ i.
9:12 Hi-lâm tùi Tu-lô chhut-.lâi, khòaⁿ Só͘-lô-móng só͘ hō͘ i ê siâⁿ, khòaⁿ-liáu bô kah-ì,
9:13 chiū kóng, " Góa ê a-hiaⁿ, lí só͘ hō͘ góa hiahê siâⁿ sī siáⁿ-mi̍h? " I chiū kā i kiò-chò Ka-bul ê tē, ti̍t-kàu kin-á-ji̍t.
9:14 Hi-lâm chiū kià chîⁿ chi̍t-pah jī-cha̍p tha-lan-t hō͘ ông.
9:15 Só͘-lô-móng ê Kî-tha Sêng-chiū
( LTH 8: 3-18)
Só͘-lô-móng ông phài lâng-kang ê goân-in to̍h-sī beh khí Siōng-chú ê tiān, kakī ê ông-kiong, í-ki̍p Mi-lō͘, Ê-lú-sa-lèm ê siâⁿ chhiûⁿ kah Ha-cho͘l, Me-gi-tóng, Ge-chel.
9:16 Chá-chêng Ai-gi̍p ông Hôa-láu chiūⁿ-lâi cheng-ho̍k Ge-chel, ēng hóe kā i sio, thâi-sí tòa tī siâⁿ lāi ê Ka-nân lâng, kā siâⁿ hō͘ i ê chabó͘ kiáⁿ, to̍h-sī Só͘-lô-móng ê bó͘ chò kè-chng.
9:17 Só͘-lô-móng khí Ge-chel kah ē-bīn ê Bia̍t-ho-lông,
9:18 Ba-la̍h kah kok lāi khòng-iá-.ni̍h ê Ta̍t-mo͘l,
9:19 í-ki̍p Só͘-lô-móng só͘-ū kim-khò͘ ê siâⁿ, chhia ê siâⁿ, bé-peng ê siâⁿ kah Só͘-lô-móng tī Ê-lú-sa-lèm, tī Le-ba-nòng kah tī i só͘ tī-lí ê choân tē, ūi kakī ê khoài-lo̍k só͘ ài khí ê, lóng khí khí-.lâi.
9:20 Koan-hē só͘ chhun lo̍h-.lâi ê jîn-bîn, to̍h-sī hiahê m̄-sī sio̍k I-su-la-el ê A-mô͘-lī lâng, Hiat lâng, Pe-lí-ji lâng, Hi-bī lâng kah I-é-bú-suh lâng,
9:21 to̍h-sī tī chit tē-hng in só͘ chhun lo̍h-.lâi ê kiáⁿ-sun, I-su-la-el lâng bē tàng kā in choân-pō͘ siau-bia̍t ê, Só͘-lô-móng phài in chò khó͘-kang, ti̍t-kàu kin-á-ji̍t.
9:22 Chóng-.sī, I-su-la-el lâng, Só͘-lô-móng bô hō͘ in chò lô͘-po̍k, sī chò i ê chiàn-sū, jîn-sîn, siú-léng, kun-tiúⁿ, chhia-tiúⁿ kah bé-peng-tiúⁿ.
9:23 Só͘-lô-móng tok-kang ê thâu-lâng, kiōng gō͘-pah gō͘-cha̍p lâng, in koán-lí chò-kang ê jîn-bîn.
9:24 Hôa-láu ê chabó͘ kiáⁿ tùi Ta-bi̍t ê siâⁿ chiūⁿ-khì Só͘-lô-móng só͘ kā i khí ê chhù. Hit sî, Só͘-lô-móng teh khí Mi-lō͘.
9:25 Só͘-lô-móng ta̍k nî saⁿ pái tī i kā Siōng-chú só͘ khí ê tôaⁿ hiàn sio-chè kah siā-un-chè, koh tī Siōng-chú ê bīn-chêng sio hiuⁿ tī tôaⁿ téng. Chiū ánne, i khí tiān ê kang oân-sêng.
9:26 Só͘-lô-móng ông tī E-tóm tē ê Âng-hái piⁿ, óa-kīn Ê-no͘k ê E-chióng-ge-bel chō chi̍t tīn ê chûn-chiah.
9:27 Hi-lâm chhe i ê lô͘-po̍k, to̍h-sī chai-iáⁿ kòe hái ê kiâⁿ-chûn lâng kah Só͘-lô-móng ê lô͘-po̍k kāng chûn khì.
9:28 In lâi-kàu O͘-huil, tùi hia tit tio̍h sì-pah jī-cha̍p tha-lan-t ê kim, ūn lâi-kàu Só͘-lô-móng ông hia.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。