列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
8:1 Gêng-chiap Iok-kūi Ji̍p Sèng-tiān
( LTH 5: 2-6: 2)
Hit sî, Só͘-lô-móng chū-chi̍p I-su-la-el ê tiúⁿ-ló kah ta̍k chi-cho̍k ê siú-léng, í-ki̍p I-su-la-el lâng hiahê cho̍k-tiúⁿ, lâi-kàu Ê-lú-sa-lèm Só͘-lô-móng ông hia, beh kā Siōng-chú ê iok-kūi tùi Ta-bi̍t siâⁿ, to̍h-sī Si-óng, ūn-.lâi.
8:2 Tī E-tha-ním goe̍h, to̍h-sī chhit-.goe̍h ê cheh-kî, I-su-la-el lâng lóng chū-chi̍p lâi-kàu Só͘-lô-móng ông hia.
8:3 I-su-la-el ê tiúⁿ-ló lóng lâi; hiahê chè-si kng iok-kūi.
8:4 In chiū kā Siōng-chú ê kūi kah hōe-bō͘, í-ki̍p pò͘-pêⁿ lāi it-chhè sèng ê khì-kū ūn-.lâi; chè-si kah Lē-bī lâng lóng kā i kng khí-.lâi.
8:5 Só͘-lô-móng ông kah chū-chi̍p lâi-kàu i hia ê I-su-la-el ê choân hōe-chiòng, tī iok-kūi chêng hiàn iûⁿ kah gû chò chè-sū, sò͘-bo̍k chē kàu bē sǹg-tit, mā sǹg bē liáu.
8:6 Chè-si kng Siōng-chú ê iok-kūi lâi-kàu i ê só͘-chāi, ji̍p-khì hit keng āu-tiān, to̍h-sī chì-sèng-só͘, kā i hē tī ki-lō͘-peng ê si̍t-ē.
8:7 In-ūi ki-lō͘-peng thí-khui in ê si̍t, tī kūi ê só͘-chāi ê téng-bīn, só͘-í ū ki-lō͘-peng tī hit téng-bīn jia-khàm kūi kah i ê kǹg.
8:8 Hiahê kǹg chin tn̂g, kǹg bóe tī āu-tiān chêng ê sèng-só͘ khòaⁿ ē tio̍h, tī gōa-bīn chiū khòaⁿ bē tio̍h; kàu kin-á-ji̍t iáu tī hia.
8:9 Kūi lāi chí ū nn̄g tè chio̍h-pi, to̍h-sī I-su-la-el lâng chhut Ai-gi̍p tē, Siōng-chú kah in li̍p-iok ê sî, Mô͘-se tī Hô-lep soaⁿ só͘ hē ê, che í-gōa bô pa̍t hāng mi̍h.
8:10 Tng chè-si tùi sèng-só͘ chhut-.lâi ê sî, ū hûn chhiong-móa Siōng-chú ê tiān;
8:11 tì-sú chè-si ūi tio̍h hûn ê iân-kò͘ bē tàng khiā-teh ho̍k-sāi, in-ūi Siōng-chú ê êng-kng chhiong-móa Siōng-chú ê tiān.
8:12 Hit sî, Só͘-lô-móng kóng, " Siōng-chú bat kóng I ē tiàm tī o͘-o͘ àm-àm ê só͘-chāi;
8:13 góa í-keng khí chit keng tiān hō͘ Lí tòa, chò Lí éng-oán tòa ê só͘-chāi. "
8:14 Só͘-lô-móng Tùi Jîn-bîn ê Kà-sī
( LTH 6: 3-11)
Ông oa̍t-tńg i ê bīn chiok-hok I-su-la-el hōe-chiòng; I-su-la-el hōe-chiòng lóng khiā khí-.lâi.
8:15 I kóng, " Siōng-chú — I-su-la-el ê Siōng-tè sī eng-kai oló ê, in-ūi I chhin-chhùi tùi góa ê lāu-pē Ta-bi̍t èng-ín ê, mā chhin-chhiú kā i èng-giām. I kóng,
8:16 ' Tùi Góa chhōa Góa ê chú-bîn — I-su-la-el lâng chhut Ai-gi̍p í-lâi, Góa m̄ bat tī I-su-la-el chèng chi-cho̍k tiong-kan kéng chi̍t-ê siâⁿ, khí tiān hō͘ Góa ê miâ tī hia, to̍k-to̍k kéng Ta-bi̍t tī-lí Góa ê chú-bîn — I-su-la-el lâng. '
8:17 " Góa ê lāu-pē Ta-bi̍t sim-lāi ū ì-sù, beh ūi Siōng-chú — I-su-la-el ê Siōng-tè ê miâ khí tiān.
8:18 Chóng-.sī, Siōng-chú tùi góa ê lāu-pē Ta-bi̍t kóng, ' Lí ê sim ū ì-sù beh ūi Góa ê miâ khí tiān, lí chit-ê ì-sù chin hó.
8:19 Chóng-.sī, lí m̄ thang khí tiān, lí só͘ chhin-seⁿ ê kiáⁿ ē ūi Góa ê miâ khí tiān. '
8:20 " Taⁿ Siōng-chú èng-giām I só͘ kóng ê ōe, góa chiàu Siōng-chú ê ōe khí-lâi sòa-chiap góa ê lāu-pē Ta-bi̍t, chē I-su-la-el ê kok-ūi, koh ūi Siōng-chú — I-su-la-el Siōng-tè ê miâ khí tiān.
8:21 Góa mā tī hia ūi iok-kūi chún-pī chi̍t-ê só͘-chāi, kūi lāi ū Siōng-chú ê iok, to̍h-sī I chhōa lán ê chó͘-sian chhut Ai-gi̍p ê sî kah in só͘ li̍p ê iok. "
8:22 Só͘-lô-móng ê Kî-tó
( LTH 6: 12-42)
Só͘-lô-móng tng I-su-la-el hōe-chiòng ê bīn-chêng, khiā tī Siōng-chú ê tôaⁿ chêng, gia̍h-khí chhiú ǹg thiⁿ, kóng,
8:23 " Siōng-chú — I-su-la-el ê Siōng-tè ah, tī thiⁿ-téng, tī tē-hā, bô ū sîn-bêng chhin-chhiūⁿ Lí siú iok koh kiâⁿ thiàⁿ-sim tī Lí hiahê lô͘-po̍k, to̍h-sī chīn-sim kiâⁿ tī Lí ê bīn-chêng ê.
8:24 Lí tùi Lí ê lô͘-po̍k — góa ê lāu-pē Ta-bi̍t só͘ èng-ín ê, Lí ū siú iok. Lí chhin-chhùi kóng ê, ū chhin-chhiú kā i èng-giām, tú chiàu kin-á-ji̍t ê khoán.
8:25 Siōng-chú — I-su-la-el ê Siōng-tè ah, Lí ū èng-ín Lí ê lô͘-po̍k — góa ê lāu-pē Ta-bi̍t kóng, ' Lí ê kiáⁿ-sun nā kín-sīn in ê só͘ chò, kiâⁿ tī Góa ê bīn-chêng, chhin-chhiūⁿ lí kiâⁿ tī Góa ê bīn-chêng, chiū sio̍k tī lí ê beh tī Góa ê bīn-chêng chē I-su-la-el ê kok-ūi éng bô tn̄g', taⁿ kiû Lí kā i èng-giām.
8:26 I-su-la-el ê Siōng-tè ah, Lí tùi Lí ê lô͘-po̍k — góa ê lāu-pē Ta-bi̍t só͘ kóng ê, kiû Lí hō͘ i chiâⁿ-chò sū-si̍t.
8:27 " Siōng-tè kám chin-chiàⁿ ē tòa tī tē-chiūⁿ? Lí khòaⁿ, thiⁿ kah chiahê thiⁿ ê thiⁿ siōng-chhiáⁿ bô kàu-gia̍h thang hō͘ Lí tòa, hô-hòng góa só͘ khí ê chit keng tiān?
8:28 Siōng-chú — góa ê Siōng-tè ah, goān Lí àⁿ-lo̍h siàu-liām Lí ê lô͘-po̍k ê kî-tó kah khún-kiû, lâi thiaⁿ Lí ê lô͘-po̍k kin-á-ji̍t tī Lí bīn-chêng só͘ kî-tó ê kiû-kiò.
8:29 Goān Lí mê-ji̍t khòaⁿ-kò͘ chit-ê tiān, to̍h-sī Lí só͘ kóng-khí ê ' Góa ê miâ beh tī hia'ê só͘-chāi, lâi thiaⁿ Lí ê lô͘-po̍k só͘ beh ǹg chit só͘-chāi kî-tó ê kî-tó.
8:30 Lí ê lô͘-po̍k kah Lí ê chú-bîn — I-su-la-el lâng ǹg chit só͘-chāi kî-tó ê sî, goān Lí thiaⁿ in ê kî-kiû, goān Lí tī thiⁿ-.ni̍h — Lí tòa ê só͘-chāi lâi thiaⁿ in ê kî-kiû, Lí thiaⁿ-.tio̍h ê sî chiū kā in sià-bián.
8:31 " Lâng nā tek-chōe i ê chhù-piⁿ, koh ū lâng ēng chi̍t-ê chiùchōa kah i chiùchōa, i nā lâi chit keng tiān, tī Lí ê tôaⁿ chêng chiùchōa ê sî,
8:32 kiû Lí tī thiⁿ-.ni̍h sôe-thiaⁿ lâi kā i pān-lí; sím-phòaⁿ Lí chiahê lô͘-po̍k, tēng pháiⁿ lâng ê chōe, chiàu i só͘ kiâⁿ ê pò-èng tī i ê thâu-khak; tēng gī lâng chò gī, chiàu i ê gī lâi hō͘ i.
8:33 " Siat-sú Lí ê chú-bîn — I-su-la-el lâng, in-ūi tek-chōe Lí, chiah tī tùi-te̍k ê bīn-chêng thâi-su, in nā kui-ǹg Lí, jīn Lí ê miâ, koh tī chit keng tiān kî-tó, kā Lí khún-kiû,
8:34 kiû Lí tī thiⁿ-.ni̍h thiaⁿ in ê kî-tó, lâi sià-bián Lí ê chú-bîn — I-su-la-el ê chōe, hō͘ in tńg-lâi Lí só͘ siúⁿ-sù hō͘ in ê chó͘-sian ê tē.
8:35 " Siat-sú in tek-chōe Lí, tì-sú thiⁿ koaiⁿ-ba̍t, bô lo̍h hō͘; Lí kā in hêng-hoa̍t ê sî, in nā ǹg chit só͘-chāi kî-tó, jīn Lí ê miâ, lī-khui in ê chōe,
8:36 kiû Lí tī thiⁿ-.ni̍h thiaⁿ in ê kî-tó, sià-bián Lí ê lô͘-po̍k kah Lí ê chú-bîn — I-su-la-el ê chōe; tī Lí kà-sī in só͘ tio̍h kiâⁿ ê hó lō͘ ê sî, koh lo̍h hō͘ tī Lí ê tē, to̍h-sī Lí siúⁿ-sù Lí ê chú-bîn chò sán-gia̍p ê.
8:37 " Chit-ê tē nā ū ki-hng, un-e̍k, ta-sò, hiú-nōa, chháu-meh, chián-thâng, á-.sī in ê tùi-te̍k tī in hiahê siâⁿ ê tē kā in ûi-khùn, bô-lūn ū siáⁿ-mi̍h chai-hō, siáⁿ-mi̍h phòa-pēⁿ,
8:38 Lí ê chú-bîn — I-su-la-el ê kûn-chiòng, bô-lūn sī kò-jîn, á-.sī kûn-chiòng, nā ta̍k-ê chai kakī sim-lāi ê chai-hō, ǹg chit keng tiān gia̍h-khí chhiú, bô-lūn án-chóaⁿ khún-kiû, án-chóaⁿ kî-tó,
8:39 goān Lí tī thiⁿ-.ni̍h, Lí só͘ tòa ê só͘-chāi, lâi thiaⁿ, lâi sià-bián, lâi si-hêng. Lí chai in ê sim, chiàu in ta̍k lâng ê hêng-ûi lâi khoán-thāi in, ( in-ūi sè-kan ta̍k lâng ê sim, chí ū Lí chai ),
8:40 hō͘ in tī Lí siúⁿ-sù hō͘ goán chó͘-sian ê tē, chi̍t-sì-lâng kèng-ùi Lí.
8:41 " Nā-sī gōa-pang lâng, in m̄-sī sio̍k Lí ê chú-bîn — I-su-la-el, i ūi tio̍h Lí ê miâ tùi hn̄g-hn̄g ê só͘-chāi lâi ê,
8:42 ( in-ūi in thiaⁿ tio̍h Lí ê tōa miâ, tōa koân-lêng ê chhiú, chhun-chhut ê chhiú. ) nā lâi ǹg chit-ê tiān kî-tó,
8:43 goān Lí tī thiⁿ-.ni̍h Lí tòa ê só͘-chāi, lâi thiaⁿ in ê kî-tó, chiàu gōa-pang lâng it-chhè só͘ tùi Lí kiû ê lâi kiâⁿ, hō͘ thiⁿ-ē bān-bîn lóng bat Lí ê miâ, kèng-ùi Lí, chhin-chhiūⁿ Lí ê chú-bîn — I-su-la-el, koh hō͘ in chai góa só͘ khí chit keng tiān sī ēng Lí ê miâ lâi chheng-ho͘ ê.
8:44 " Lí ê chú-bîn nā chhut-khì Lí só͘ chhe in khì ê lō͘ kah tùi-te̍k kau-chiàn, mā ǹg Lí só͘ kéng ê siâⁿ kah góa ūi tio̍h Lí ê miâ só͘ khí ê tiān, lâi tùi Siōng-chú kî-tó,
8:45 goān Lí tī thiⁿ-.ni̍h lâi thiaⁿ in ê kî-tó kah khún-kiû, lâi kā in phòaⁿ-toàn.
8:46 " Lí ê chú-bîn nā tek-chōe Lí, ( in-ūi bô ū bô hoān chōe ê lâng ), Lí tùi in siū-khì, kā in kau hō͘ tùi-te̍k, tì-sú tùi-te̍k lia̍h in kàu tùi-te̍k ê tē, á-.sī hn̄g, á-.sī kīn ê só͘-chāi,
8:47 in nā tī só͘ lia̍h-.khì ê tē, sim-lāi tò tńg-lâi siūⁿ, lâi hóe-kái, koh tī lia̍h in ê lâng ê tē, khún-kiû Lí kóng, ' Goán ū chōe, goán ū pōe-ge̍k, goán ū chò pháiⁿ';
8:48 in nā tī siū lia̍h-.khì ê só͘-chāi, to̍h-sī tùi-te̍k lia̍h in khì ê só͘-chāi, chīn-sim, chīn-sèng kui-ho̍k Lí, koh ǹg pún-tē, to̍h-sī Lí siúⁿ-sù hō͘ in chó͘-sian ê tē kah Lí só͘ kéng ê siâⁿ, í-ki̍p góa ūi tio̍h Lí ê miâ só͘ khí ê tiān, lâi tùi Lí kî-tó,
8:49 goān Lí tī thiⁿ-.ni̍h Lí só͘ tòa ê só͘-chāi, thiaⁿ in ê kî-tó kah khún-kiû, kā in phòaⁿ-toàn;
8:50 koh sià-bián Lí ê chú-bîn tek-chōe Lí ê, í-ki̍p in it-chhè tek-chōe Lí ê chōe-kò, hō͘ in tī lia̍h in ê lâng ê bīn-chêng tit tio̍h liân-bín, tì-sú lia̍h in ê lâng kā in liân-bín.
8:51 In-ūi in sī Lí ê chú-bîn, Lí ê sán-gia̍p, sī Lí chhōa in chhut Ai-gi̍p, tùi chù-thih ê lô͘ tiong chhut-.lâi ê.
8:52 " Goān lí khui ba̍k-chiu khui lâi khòaⁿ-kò͘ Lí ê lô͘-po̍k kah Lí ê chú-bîn — I-su-la-el ê kî-tó, lâi thiaⁿ in it-chhè tùi Lí khún-kiû ê.
8:53 Chì-koân Siōng-chú ah, in-ūi Lí bat tùi tē-chiūⁿ chèng lâng ê tiong-kan kā in hun-pia̍t chhut-lâi chò Lí ê sán-gia̍p, sī chiàu Lí chhōa goán ê chó͘-sian chhut Ai-gi̍p ê sî, thok Lí ê lô͘-po̍k Mô͘-se só͘ kóng ê. "
8:54 Chiok-hok Jîn-bîn
Só͘-lô-móng tī Siōng-chú ê tôaⁿ chêng, kha-thâu-u kūi-.leh, chhun chhiú ǹg thiⁿ, í-keng tùi Siōng-chú kî-tó khún-kiû liáu-āu, chiū khí-.lâi.
8:55 I khiā-.leh, tōa-siaⁿ chiok-hok I-su-la-el choân hōe-chiòng, kóng,
8:56 " Siōng-chú sī eng-kai tio̍h oló ê, in-ūi I it-chhè só͘ èng-ín ê, siúⁿ-sù pêng-an hō͘ I ê chú-bîn — I-su-la-el; kiàn-nā thok I ê lô͘-po̍k Mô͘-se só͘ èng-ín ê hó ōe, bô chi̍t kù lo̍k-khong.
8:57 Goān Siōng-chú — lán ê Siōng-tè kah lán tông-chāi, chhin-chhiūⁿ I kah lán ê chó͘-sian tông-chāi. Goān I bô lī-khui lán, bô pàng-sak lán,
8:58 hō͘ lán ê sim kui-ǹg I, lâi kiâⁿ I it-chhè ê tō-lō͘, siú I só͘ bēng-lēng lán ê chó͘-sian ê kài-bēng, lu̍t-lē, hoat-tō͘.
8:59 Góa taⁿ tī Siōng-chú ê bīn-chêng só͘ kî-kiû chiahê ōe, goān chiahê ōe mê-ji̍t kīn tī lán ê Siōng-tè — Siōng-chú, koh ji̍t-ji̍t chiàu só͘ ha̍p-gî ê ūi I ê lô͘-po̍k phòaⁿ-toàn, mā ūi I ê chú-bîn — I-su-la-el phòaⁿ-toàn,
8:60 hō͘ tē-chiūⁿ bān-bîn chai-iáⁿ Siōng-chú sī Siōng-tè, I í-gōa bô pa̍t-ê.
8:61 Só͘-í, lín ê sim tio̍h oân-choân ǹg Siōng-chú — lán ê Siōng-tè, chun-thàn I ê lu̍t-lē, siú I ê kài-bēng, chhin-chhiūⁿ kin-á-ji̍t ánne. "
8:62 Sèng-tiān Hiàn-tn̂g Tián-lé
( LTH 7: 4-10)
Ông kah I-su-la-el chèng lâng chò-hóe tī Siōng-chú ê bīn-chêng hiàn chè.
8:63 Só͘-lô-móng hiàn siā-un ê chè, to̍h-sī hiàn hō͘ Siōng-chú gû nn̄g-bān nn̄g-chheng chiah, iûⁿ cha̍p-jī bān chiah. Án-ne, ông kah I-su-la-el chèng lâng, ūi Siōng-chú ê tiān kiâⁿ hiàn-tiān ê lé.
8:64 Tng hit ji̍t, ông hun-pia̍t Siōng-chú tiān chêng īⁿ tiong ê só͘-chāi ūi sèng, tī hia hiàn sio-chè, sò͘-chè kah siā-un-chè ê iû, in-ūi Siōng-chú thâu-chêng ê tâng-tôaⁿ siuⁿ sè, bē iông-ín tit hiahê sio-chè, sò͘-chè kah siā-un-chè ê iû.
8:65 Hit sî, Só͘-lô-móng kah I-su-la-el jîn-bîn, to̍h-sī tùi Ha-mat ê lō͘-kháu kàu Ai-gi̍p ê khe, lóng kah i chū-chi̍p chiâⁿ-chò tāi-hōe, tī Siōng-chú — lán ê Siōng-tè ê bīn-chêng siú cheh-iân chhit ji̍t koh chhit ji̍t, kiōng cha̍p-sì ji̍t.
8:66 Tē-peh ji̍t, ông chhe jîn-bîn sòaⁿ-.khì; in chiū kā ông chiok-hok; in-ūi Siōng-chú tùi I ê lô͘-po̍k — Ta-bi̍t kah I ê chú-bîn — I-su-la-el só͘ si-chhut it-chhè ê un-hūi, in chiū hoaⁿ-hí, sim-lāi khoài-lo̍k, ta̍k-ê tńg-khì in ê pò͘-pêⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。