列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
2:1 Ta-bi̍t hō͘ Só͘-lô-móng ê Ûi-hùn
Ta-bi̍t beh sí ê kî kīn lah, i chiū hoan-hù i ê kiáⁿ Só͘-lô-móng kóng,
2:2 " Góa teh beh kiâⁿ sè-kan kûn-chiòng só͘ tio̍h kiâⁿ ê lō͘, só͘-í, lí tio̍h ióng-kám, chò chi̍t-ê tāi-tiōng-hu,
2:3 siú Siōng-chú — lí ê Siōng-tè só͘ kau-tài lí siú ê, kiâⁿ I ê tō-lō͘, chiàu Mô͘-se lu̍t-hoat só͘ siá ê lâi siú I ê lu̍t-lē, I ê kài-bēng, I ê hoat-tō͘ kah I kiàn-chèng ê ōe. Án-ne, lí bô-lūn chò siáⁿ-mi̍h, bô-lūn tùi tó-ūi khì, lóng ē heng-thong.
2:4 Mā ē hō͘ Siōng-chú èng-giām I só͘ èng-ín góa ê ōe kóng, ' Lí ê kiáⁿ-sun nā kín-sīn i ê lō͘, chīn-sim chīn-ì sêng-si̍t kiâⁿ tī góa ê bīn-chêng, lí ê kiáⁿ-sun chiū ē chē I-su-la-el ê kok-ūi, éng-oán bē tn̄g. '
2:5 " Lí mā chai Che-lú-iah ê kiáⁿ Io-ap tùi góa só͘ kiâⁿ ê; thâi-sí I-su-la-el nn̄g-ê kun-tiúⁿ, to̍h-sī Ne-l ê kiáⁿ Ap-nel kah E-hel ê kiáⁿ A-ma-sa. I tī thài-pêng ê sî lâu in ê hoeh, chhin-chhiūⁿ tī kau-chiàn ê sî; kā chit-ê hoeh bak tio̍h i ê io só͘ hâ ê tòa, kah i ê kha só͘ chhēng ê ê.
2:6 Só͘-í, lí tio̍h chiàu lí ê tì-hūi lâi kiâⁿ, m̄ thang iông-ín i pe̍h thâu-mn̂g an-jiân lo̍h im-kan.
2:7 " Lí tio̍h hó khoán-thāi Gi-lia̍t lâng Bal-chi-lâi hiahê kiáⁿ, hō͘ in tiāⁿtiāⁿ tī lí ê toh chia̍h pn̄g, in-ūi góa siám-phiah lí ê a-hiaⁿ Αp-sa-lôm ê sî, in ū ánne khoán-thāi góa.
2:8 " Lí khoaⁿ, kah lí tī-.leh ê ū Ba-hu-lîm ê Biān-iá-mín lâng, Ge-la̍h ê kiáⁿ Si-mí; góa khì Ma-há-niam ê ji̍t, i ēng tāng ê chiù-chó͘ kā góa chiù-chó͘, chóng-.sī, i ū lo̍h-lâi Iol-tàn hô kā góa gêng-chiap, góa chiū kí Siōng-chú tùi i chiùchōa kóng, ' Góa bô beh ēng to thâi lí. '
2:9 Taⁿ lí m̄ thang sǹg i bô chōe, in-ūi lí sī chhong-bêng ê lâng, mā ē chai tio̍h án-chóaⁿ kā i khoán-thāi, tio̍h hō͘ i pe̍h thâu-mn̂g lâu hoeh lo̍h im-kan. "
2:10 Ta-bi̍t ê Sí-bông
Ta-bi̍t kah i ê chó͘-sian chò-hóe khùn, bâi-chòng tī Ta-bi̍t ê siâⁿ.
2:11 Ta-bi̍t chò I-su-la-el ông kiōng sì-cha̍p nî; tī He-bú-lông chò ông chhit nî, tī Ê-lú-sa-lèm chò ông saⁿ-cha̍p saⁿ nî.
2:12 Só͘-lô-móng chē i ê lāu-pē Ta-bi̍t ê ūi, i ê kok kian-kò͘ kàu-ke̍k.
2:13 A-to-nî-iah ê Sí-bông
Hak-git ê kiáⁿ A-to-nî-iah, khì kìⁿ Só͘-lô-móng ê lāu-bú Bat-se-ba, i mn̄g i kóng, " Lí lâi kám sī pêng-an ê? " I ìn kóng, " Sī. "
2:14 I koh kóng, " Góa ū tāichì beh tùi lí kóng. " Bat-se-ba kóng, " Chò lí kóng. "
2:15 A-to-nî-iah kóng, " Lí chai kok pún-lâi sī góa ê, I-su-la-el jîn-bîn mā lóng ì-hiòng góa, ài góa chò ông, chóng-.sī, kok tian-tò kui tī góa ê sió-tī, in-ūi sī tùi Siōng-chú hō͘ i.
2:16 Taⁿ góa ū chi̍t kiāⁿ tāichì kiû lí, ǹg-bāng lí m̄ thang kā góa the-sî. " Bat-se-ba kóng, " Chò lí kóng. "
2:17 A-to-nî-iah kóng, " Kiû lí tùi Só͘-lô-móng ông kóng, hō͘ i kā Siu-ném ê chabó͘ kiáⁿ A-mí-siak siúⁿ-sù góa chò bó͘, in-ūi ông it-tēng bē kā lí the-sî. "
2:18 Bat-se-ba kóng, " Hó, góa thè lí khì kā ông kóng. "
2:19 Chiū ánne, Bat-se-ba khì kìⁿ Só͘-lô-móng ông, beh ūi A-to-nî-iah kóng-ōe. Ông khí-lâi kā i gêng-chiap, tùi i kiok-kiong, koh chē i ê ūi, mā hoan-hù lâng ūi ông ê lāu-bú siat chō-ūi, i chiū chē tī ông ê chiàⁿ pêng.
2:20 I kóng, " Góa ū chi̍t kiāⁿ sió-khóa tāichì kiû lí, chhiáⁿ lí mài kā góa the-sî. " Ông kā i kóng, " Góa ê lāu-bú, chò lí kóng, góa bô beh kā lí the-sî. "
2:21 Bat-se-ba kóng, " Goān lí kā Siu-ném ê chabó͘ gín'á A-mí-siak, siúⁿ-sù hō͘ lí ê a-hiaⁿ A-to-nî-iah chò bó͘. "
2:22 Só͘-lô-móng ông ìn i ê lāu-bú kóng, " Lí ná ē ūi tio̍h A-to-nî-iah lâi iau-kiû Siu-ném ê chabó͘ gín'á A-mí-siak? Lí mā tio̍h thè i kiû kok, in-ūi i sī góa ê a-hiaⁿ; to̍h-sī tio̍h ūi i kah chè-si A-bi-a-thal, í-ki̍p Che-lú-iah ê kiáⁿ Io-ap lâi kiû. "
2:23 Só͘-lô-móng ông chiū kí Siōng-chú lâi chiùchōa kóng, " A-to-nî-iah kóng che, sī ē hāi tio̍h kakī ê sèⁿ-miā; nā bô, goān Siōng-chú ka-pōe kā góa chek-hoa̍t.
2:24 Siōng-chú kian-kò͘ góa, hō͘ góa chē góa ê lāu-pē Ta-bi̍t ê ūi, chiàu I só͘ èng-ín ê ōe kā góa kiàn-li̍p ke; góa kí I éng-oán ê oa̍h-miā lâi chiùchōa, A-to-nî-iah kin-á-ji̍t it-tēng tio̍h sí. "
2:25 Só͘-lô-móng ông chiū chhe Io-ho-iá-tah ê kiáⁿ Be-ná-iah khì, i chiū kā i phah-tó, hō͘ i sí.
2:26 A-bi-a-thal kah Io-ap ê Kiat-kio̍k
Ông kā chè-si A-bi-a-thal kóng, " Lí tio̍h tò tńg-khì A-ná-thot, lí ê chhân-hn̂g hia! Lí pún-lâi eng-kai tio̍h sí, chóng-.sī, kin-á-ji̍t góa m̄ hō͘ lí sí, in-ūi lí tī góa ê lāu-pē Ta-bi̍t ê bīn-chêng ū kng chì-koân Siōng-chú ê kūi, jî-chhiáⁿ góa ê lāu-pē só͘ siū it-chhè ê hoān-lān, lí mā kah i tâng siū-kòe. "
2:27 Só͘-lô-móng chiū kā A-bi-a-thal kóaⁿ chhut-.khì, m̄-chún i chò Siōng-chú ê chè-si. Án-ne chiū èng-giām Siōng-chú tī Sī-lô só͘ kóng koan-hē E-lī ê ke ê ōe.
2:28 Chit-ê siau-sit thoân kàu Io-ap, Io-ap chiū cháu, ji̍p-khì Siōng-chú ê pò͘-pêⁿ, khîⁿ-tiâu tôaⁿ-kak, in-ūi Io-ap sûi-jiân bô kin-tòe Αp-sa-lôm, chóng-.sī, sī kin-tòe A-to-nî-iah.
2:29 Ū lâng kā Só͘-lô-móng ông kóng, " Io-ap cháu-khì-kàu Siōng-chú ê pò͘-pêⁿ, taⁿ tī tôaⁿ piⁿ. " Só͘-lô-móng chiū chhe Io-ho-iá-tah ê kiáⁿ Be-ná-iah kóng, " Lí khì kā i phah. "
2:30 Be-ná-iah lâi-kàu Siōng-chú ê pò͘-pêⁿ, kā Io-ap kóng, " Ông ánne kóng, lí tio̍h chhut-.lâi! " Io-ap ìn kóng, " M̄ lah, góa beh sí tī chia. " Be-ná-iah tńg-khì hôe-hok ông kóng, " Io-ap ánne kóng, ánne ìn góa. "
2:31 Ông kā i kóng, " Lí thang chiàu i ê ōe kiâⁿ, kā i phah-sí koh bâi-chòng, thang hō͘ Io-ap bô-iân bô-kò͘ lâu lâng ê hoeh ê hit-ê chōe bô kui tī góa kah góa lāu-pē ê ke.
2:32 Siōng-chú ē ēng i ê hoeh kui tī i kakī ê thâu-khak, in-ūi i thâi-sí pí i khah gī koh pí i khah hó ê nn̄g lâng, to̍h-sī I-su-la-el ê kun-tiúⁿ Ne-l ê kiáⁿ Ap-nel kah Iô-tah ê kun-tiúⁿ E-hel ê kiáⁿ A-ma-sa; góa ê lāu-pē Ta-bi̍t mā m̄-chai.
2:33 Chiū ánne, in ê hoeh beh kui tī Io-ap ê thâu-khak kah i ê kiáⁿ-sun ê thâu-khak, ti̍t-kàu éng-oán; to̍k-to̍k Ta-bi̍t kah i ê kiáⁿ-sun, i ê ke, i ê ūi, ē tùi Siōng-chú tit tio̍h pêng-an, ti̍t-kàu éng-oán. "
2:34 Io-ho-iá-tah ê kiáⁿ Be-ná-iah chiū chiūⁿ-.khì, kā Io-ap phah-sí, koh kā i bâi-chòng tī khòng-iá, tī i kakī ê chhù.
2:35 Ông chiū siat-li̍p Io-ho-iá-tah ê kiáⁿ Be-ná-iah tāi-thè Io-ap chò kun-tiúⁿ, koh siat-li̍p Cha-tok chè-si lâi tāi-thè A-bi-a-thal.
2:36 Ông chhe lâng kiò Si-mí lâi, chiū kā i kóng, " Lí tio̍h ūi kakī tī Ê-lú-sa-lèm khí chhù, tòa tī hia, m̄ thang lī-khui hia khì pa̍t ūi.
2:37 In-ūi lí tio̍h khak-si̍t chai, lí nā chhut-.khì, kiâⁿ-kòe Kit-lông khe, hit ji̍t lí tio̍h sí, lí ê hoeh beh kui lí kakī ê thâu-khak. "
2:38 Si-mí ìn ông kóng, " Chit-ê ōe chin hó, góa ê chú — góa ê ông só͘ kóng ê, lí ê lô͘-po̍k ē chiàu ánne khì kiâⁿ. " Chiū ánne, Si-mí tòa tī Ê-lú-sa-lèm chin chē ji̍t.
2:39 Kòe saⁿ nî, Si-mí ê nn̄g-ê lô͘-po̍k cháu kàu Gat ông Má-kah ê kiáⁿ A-ki-si hia. Ū lâng kā Si-mí kóng, " Lí khòaⁿ, lí ê lô͘-po̍k tī Gat. "
2:40 Si-mí khí-.lâi, khiâ lî khì Gat, lâi-kàu A-ki-si ông hia, chhōe i ê lô͘-po̍k, Si-mí tùi Gat chhōa i ê lô͘-po̍k tńg-.lâi.
2:41 Ū lâng kā Só͘-lô-móng kóng, " Si-mí chhut Ê-lú-sa-lèm khì-kàu Gat chiah tńg-.lâi. "
2:42 Ông chiū chhe lâng kiò Si-mí lâi, tùi i kóng, " Góa kám m̄-sī kiò lí kí Siōng-chú chiùchōa, koh kéng-kài lí kóng, ' Lí tio̍h khak-si̍t chai lí nā chhut-khì gōa-bīn, bô-lūn khì tó-ūi, hit ji̍t lí tio̍h sí? ' Lí ū ìn góa kóng, ' Góa thiaⁿ chit-ê ōe chin hó. '
2:43 Taⁿ lí ná ē bô chip-siú kí Siōng-chú só͘ chiùchōa ê kah góa só͘ kéng-kài lí ê bēng-lēng? "
2:44 Ông koh kā Si-mí kóng, " Lí ê sim só͘ chûn ê pháiⁿ, to̍h-sī lí tùi goán lāu-pē Ta-bi̍t só͘ kiâⁿ ê lí kakī lóng chai, só͘-í, Siōng-chú ē kā lí ê pháiⁿ kui tī lí kakī ê thâu-khak.
2:45 Chóng-.sī, Só͘-lô-móng ông ē tit tio̍h hok-khì, jî-chhiáⁿ Ta-bi̍t ê kok-ūi ē tī Siōng-chú ê bīn-chêng kian-kò͘ khí-.lâi, ti̍t-kàu éng-oán. "
2:46 Ông chiū bēng-lēng Io-ho-iá-tah ê kiáⁿ Be-ná-iah, i chiū chhut-khì kā i phah-sí. Chiū ánne, kok-ūi kian-kò͘ tī Só͘-lô-móng ê chhiú.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。