列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
1:1 Ta-bi̍t Ông ê Boán-nî
Ta-bi̍t ông hòe chē nî lāu, sûi-jiân kā i kah-phōe, iû-goân bē sio.
1:2 I hiahê lô͘-po̍k chiū kā i kóng, " Tio̍h kā góa ê chú — góa ê ông chhōe chi̍t-ê chāi-sek-lí, hō͘ i khiā tī ông ê bīn-chêng lâi kā lí sū-hōng, koh khùn tī lí ê heng chêng, thang hō͘ góa ê chú — góa ê ông tit tio̍h sio. "
1:3 In chiū tī I-su-la-el ê sì-kho͘-ûi chhōe súi ê chabó͘ gín'á, chhōe tio̍h Siu-ném chi̍t-ê lú-chú, miâ A-mí-siak, chiū chhōa i lâi-kàu ông hia.
1:4 Chit-ê chabó͘ gín'á hui-siông súi, i hōng-ióng ông, kā i sū-hāu, chóng-.sī, ông bô chhin-kīn i.
1:5 A-to-nî-iah Tô͘-bô͘ Chhoàn-toa̍t Ông-ūi
Hit sî, Hak-git ê kiáⁿ A-to-nî-iah kiau-ngō͘, kóng, " Góa beh chò ông. " I chiū ūi kakī chún-pī chhia kah bé-peng, koh ū gō͘-cha̍p lâng cháu tī i ê thâu-chêng.
1:6 I ê lāu-pē pêng-sî m̄ bat hō͘ i iu-būn, m̄ bat tùi i kóng, " Lí ná ē ánne chò? " I seⁿ-chò put-chí hó khòaⁿ; i chhut-sì tī Αp-sa-lôm ê bóe-āu.
1:7 I kah Che-lú-iah ê kiáⁿ Io-ap, í-ki̍p chè-si A-bi-a-thal chham-siông; in chiū tòe A-to-nî-iah, lâi kā i pang-chān.
1:8 Chóng-.sī, Cha-tok chè-si kah Io-ho-iá-tah ê kiáⁿ Be-ná-iah, Ná-than sian-ti kah Si-mí, Lī-í kah Ta-bi̍t ê ióng-sū, lóng bô ūi A-to-nî-iah.
1:9 A-to-nî-iah tī kīn Ian-lo-gel, Só-hi-lia̍t ê chio̍h-pôaⁿ piⁿ, thâi iûⁿ, gû kah pûi ê chengseⁿ, chhiáⁿ i ê chèng hiaⁿ-tī, to̍h-sī ông ê kiáⁿ, í-ki̍p Iô-tah só͘-ū chò ông ê jîn-sîn ê chèng lâng.
1:10 Chóng-.sī, Ná-than sian-ti kah Be-ná-iah, í-ki̍p ióng-sū kah i ê sió-tī Só͘-lô-móng, i lóng bô chhiáⁿ in.
1:11 Só͘-lô-móng Siū Siat-li̍p chò Ông
Ná-than kā Só͘-lô-móng ê lāu-bú Bat-se-ba kóng, " Hak-git ê kiáⁿ A-to-nî-iah chò ông à, lí kám bô thiaⁿ-.tio̍h? Lán ê chú Ta-bi̍t mā m̄-chai.
1:12 Taⁿ lí lâi, góa thè lí phah-sǹg, thang pó-choân lí kah lí ê kiáⁿ Só͘-lô-móng ê sèⁿ-miā.
1:13 Lí ji̍p-khì kìⁿ Ta-bi̍t ông, kā i kóng, ' Góa ê chú — góa ê ông, lí kám m̄ bat tùi lí ê lú-pī chiùchōa kóng: Lí ê kiáⁿ Só͘-lô-móng ē sòa-chiap góa chò ông, i ē chē góa ê ūi? Ná ē A-to-nî-iah teh chò ông? '
1:14 Lí tī hia kah ông kóng-ōe ê sî, góa mā tòe lí ê kha-chiah-āu ji̍p-.khì, lâi chèng-bêng lí ê ōe sī si̍t-chāi. "
1:15 Bat-se-ba ji̍p-khì pâng lāi kìⁿ ông, ông chin lāu, Siu-ném ê chabó͘ gín'á A-mí-siak teh sū-hāu ông.
1:16 Bat-se-ba kiok-kiong pài ông, ông kóng, " Lí beh siáⁿ-mi̍h? "
1:17 I kā ông kóng, " Góa ê chú ah, lí bat kí Siōng-chú — lí ê Siōng-tè, lâi tùi lí ê lú-pī chiùchōa kóng, ' Lí ê kiáⁿ Só͘-lô-móng ē sòa-chiap góa chò ông, i ē chē tī góa ê ūi. '
1:18 Lí khòaⁿ, taⁿ A-to-nî-iah chò ông, góa ê chú — góa ê ông, lí mā m̄-chai.
1:19 I ū thâi chin chē gû, pûi ê chengseⁿ kah iûⁿ, chhiáⁿ ông ê chèng kiáⁿ kah chè-si A-bi-a-thal, í-ki̍p kun-tiúⁿ Io-ap; to̍k-to̍k lí ê lô͘-po̍k Só͘-lô-móng, i bô chhiáⁿ.
1:20 Góa ê chú — góa ê ông, I-su-la-el jîn-bîn ê ba̍k-chiu lóng teh khòaⁿ lí, thèng-hāu lí kā in kóng, siáⁿ lâng ē sòa-chiap góa ê chú — góa ê ông, lâi chē i ê ūi.
1:21 Nā bô, tán kàu góa ê chú — góa ê ông kah chó͘-sian chò-hóe khùn liáu-āu, góa kah góa ê kiáⁿ Só͘-lô-móng ē sǹg-chò ū chōe ê lâng. "
1:22 I iáu teh kah ông kóng-ōe ê sî, Ná-than sian-ti mā ji̍p-.lâi.
1:23 Ū lâng kā ông kóng, " Sian-ti Ná-than tī chia. " Ná-than ji̍p-khì ông ê bīn-chêng, phak tī thô͘-kha pài ông.
1:24 Ná-than kóng, " Góa ê chú — góa ê ông, lí kám ū kóng, ' A-to-nî-iah beh sòa-chiap góa chò ông, beh chē góa ê ūi? '
1:25 In-ūi kin-á-ji̍t i lo̍h-.khì, thâi chin chē gû kah pûi ê chengseⁿ, í-ki̍p iûⁿ, chhiáⁿ ông ê chèng kiáⁿ kah chiahê kun-tiúⁿ, í-ki̍p chè-si A-bi-a-thal; lí khòaⁿ, in tī i ê bīn-chêng lim-chia̍h, chiū kóng, ' Goān A-to-nî-iah ông bān-sòe! '
1:26 To̍k-to̍k góa, to̍h-sī lí ê lô͘-po̍k kah Cha-tok chè-si kah Io-ho-iá-tah ê kiáⁿ Be-ná-iah, í-ki̍p lí ê lô͘-po̍k Só͘-lô-móng, i lóng bô chhiáⁿ.
1:27 Che kám sī góa ê chú — góa ê ông só͘ chò, jî-chhiáⁿ mā bô kā lí ê lô͘-po̍k kóng, siáⁿ lâng ē sòa-chiap góa ê chú — góa ê ông, lâi chē i ê ūi? "
1:28 Ta-bi̍t ông ìn kóng, " Kā góa kiò Bat-se-ba lâi. " I chiū ji̍p-.lâi, tī ông ê bīn-chêng khiā-.leh.
1:29 Ông chiùchōa kóng, " Góa kí kiù góa ê sèⁿ-miā thoat-lī it-chhè ê hoān-lān ê éng-oán oa̍h ê Siōng-chú lâi kóng.
1:30 Góa kì-jiân ū kí Siōng-chú — I-su-la-el ê Siōng-tè tùi lí chiùchōa kóng, lí ê kiáⁿ Só͘-lô-móng ē sòa-chiap góa chò ông, i beh chē góa ê ūi lâi thè góa, góa kin-á-ji̍t ē chiàu ánne kiâⁿ. "
1:31 Bat-se-ba chiū kiok-kiong phak tī thô͘-kha, pài ông, kóng, " Goān góa ê chú — Ta-bi̍t ông bān-bān-sòe! "
1:32 Ta-bi̍t ông koh kóng, " Kā góa kiò Cha-tok chè-si, Ná-than sian-ti kah Io-ho-iá-tah ê kiáⁿ Be-ná-iah lâi! " In chiū lóng lâi ông ê bīn-chêng.
1:33 Ông kā in kóng, " Tio̍h chhōa lín ê chú hiahê lô͘-po̍k kah lín khì, hō͘ góa ê kiáⁿ Só͘-lô-móng khiâ góa ê lô, hō͘ i lo̍h-khì kàu Gi-hóng;
1:34 tī hia, Cha-tok chè-si kah Ná-than sian-ti tio̍h kā i boah iû chò I-su-la-el ông; lín mā tio̍h pûn sàu-kak, kóng, ' Goān Só͘-lô-móng ông bān-sòe! '
1:35 Jiân-āu tòe i khí-.lâi, i beh lâi chē góa ê ūi, sòa-chiap góa chò ông. In-ūi góa í-keng siat-li̍p i chò I-su-la-el kah Iô-tah ê kun-ông. "
1:36 Io-ho-iá-tah ê kiáⁿ Be-ná-iah ìn ông kóng, " A-men! Goān Siōng-chú — góa ê Chú — góa ê ông ê Siōng-tè mā ánne kóng.
1:37 Siōng-chú án-chóaⁿ kah góa ê chú — góa ê ông tông-chāi, goān I mā chiàu ánne kah Só͘-lô-móng tông-chāi, koh hō͘ i ê kok-ūi pí góa ê chú — Ta-bi̍t ông ê kok-ūi koh khah tōa. "
1:38 Chiū ánne, Cha-tok chè-si kah Ná-than sian-ti, Io-ho-iá-tah ê kiáⁿ Be-ná-iah kah Ke-le-thih lâng, Be-le-thi lâng, lóng lo̍h-.khì, hō͘ Só͘-lô-móng khiâ Ta-bi̍t ông ê lô, sàng i kàu Gi-hóng.
1:39 Chè-si Cha-tok chiū tùi pò͘-pêⁿ lāi the̍h té iû ê kak, ēng iû boah Só͘-lô-móng. Lâng chiū pûn sàu-kak, chèng lâng lóng kóng, " Goān Só͘-lô-móng ông bān-sòe! "
1:40 Chèng lâng tòe i chiūⁿ-.lâi, koh pûn ta̍t-á, tōa-tōa hoaⁿ-hí, tì-sú tē in-ūi in ê siaⁿ kàu beh li̍h-.khui.
1:41 A-to-nî-iah í-ki̍p kah i tī-.leh hiahê lâng-kheh tú-á chia̍h-toh soah, in thiaⁿ tio̍h chit-ê siaⁿ. Io-ap thiaⁿ tio̍h sàu-kak ê siaⁿ chiū kóng, " Siâⁿ lāi ná ē ū hōa-hōa háu ê siaⁿ? " I iáu teh kóng ê sî, lí khòaⁿ, chè-si A-bi-a-thal ê kiáⁿ Io-ná-than lâi-kàu-ūi.
1:42 A-to-nî-iah kā i kóng, " Ji̍p-.lāi! Lí sī thò-tòng ê lâng, it-tēng sī pò hó siau-sit. "
1:43 Io-ná-than ìn A-to-nî-iah kóng, " Ū-iáⁿ to̍h tio̍h, lán ê chú — Ta-bi̍t ông í-keng siat-li̍p Só͘-lô-móng chò ông.
1:44 Ông chhe Cha-tok chè-si, Ná-than sian-ti, Io-ho-iá-tah ê kiáⁿ Be-ná-iah kah Ke-le-thih lâng, Be-le-thi lâng kah Só͘-lô-móng khì, in hō͘ i khiâ ông ê lô.
1:45 Chè-si Cha-tok kah Ná-than sian-ti, tī Gi-hóng í-keng kā i boah iû chò ông; in lóng tùi hia khí-.lâi, chin hoaⁿ-hí, tì-sú siâⁿ ìn-siaⁿ, che to̍h-sī lín só͘ thiaⁿ tio̍h ê siaⁿ;
1:46 jî-chhiáⁿ Só͘-lô-móng í-keng chē kok-ūi.
1:47 Ông ê jîn-sîn mā lâi kā lán ê chú — Ta-bi̍t ông chiok-hok, kóng, ' Goān lí ê Siōng-tè hō͘ Só͘-lô-móng ê miâ pí lí ê miâ khah iâⁿ, hō͘ i ê kok-ūi pí lí ê kok-ūi khah tōa. ' Ông chiū tī chhn̂g-.ni̍h àⁿ lo̍h-khì pài.
1:48 Ông mā ánne kóng, ' Siōng-chú — I-su-la-el ê Siōng-tè sī eng-kai oló ê, in-ūi I ū siúⁿ-sù góa chi̍t-ê lâng kin-á-ji̍t chē góa ê ūi, góa mā chhin-ba̍k khòaⁿ-.tio̍h. '"
1:49 Hiahê kah A-to-nî-iah tī-.leh ê lâng-kheh lóng kiaⁿ-hiâⁿ khí-.lâi, ta̍k lâng kiâⁿ in ê lō͘ sì-sòaⁿ-.khì.
1:50 A-to-nî-iah ūi tio̍h Só͘-lô-móng chiū kiaⁿ, khí-lâi khì lia̍h-tiâu chè-tôaⁿ ê kak.
1:51 Ū lâng kā Só͘-lô-móng kóng, " Lí khòaⁿ, A-to-nî-iah kiaⁿ Só͘-lô-móng ông, in-ūi i khîⁿ-tiâu chè-tôaⁿ ê kak, kóng, ' Goān Só͘-lô-móng ông kin-á-ji̍t tùi góa chiùchōa, it-tēng bô ēng to thâi-sí i ê lô͘-po̍k. '"
1:52 Só͘-lô-móng kóng, " I nā beh chò hó lâng, chi̍t ki thâu-mn̂g mā bē ka-la̍uh tī tē-.ni̍h; nā khòaⁿ i ū chò pháiⁿ, chiū it-tēng tio̍h sí. "
1:53 Só͘-lô-móng ông chiū chhe lâng khì, in chiū tùi tôaⁿ-.ni̍h tòa i lo̍h-.lâi. I chiū lâi tī Só͘-lô-móng ông ê bīn-chêng kā i pài. Só͘-lô-móng kā i kóng, " Lí tńg-khì lí ê chhù! "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。