撒母耳記下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
24:1 Ta-bi̍t Tiâu-cha Jîn-kháu
( LTS 21: 1-27)
Siōng-chú koh siū-khì I-su-la-el lâng, kek-tōng Ta-bi̍t lâi hāi in, chiū kóng, " Tio̍h khì sǹg I-su-la-el lâng kah Iô-tah lâng. "
24:2 Ông hoan-hù kah i tī-.leh ê kun-tiúⁿ Io-ap kóng, " Lí taⁿ khì piàn kiâⁿ I-su-la-el chèng chi-cho̍k, tùi Tàn kàu Bel-sí-bah, tiám-sǹg jîn-bîn, hō͘ góa chai jîn-bîn ê sò͘-gia̍h. "
24:3 Io-ap kā ông kóng, " Bô-lūn jîn-bîn gōa chē, goān Siōng-chú — lí ê Siōng-tè ke-thiⁿ pah pōe, koh hō͘ góa ê chú — góa ê ông chhin-ba̍k khòaⁿ-.tio̍h. Chóng-.sī, góa ê chú — góa ê ông ná ē hoaⁿ-hí chit-ê tāichì? "
24:4 Chóng-.sī, ông ê ōe iâⁿ-kòe Io-ap kah hiahê kun-tiúⁿ. Io-ap kah hiahê kun-tiúⁿ chiū tùi ông ê bīn-chêng chhut-.khì, tiám-sǹg I-su-la-el ê jîn-bîn.
24:5 In kòe Iol-tàn hô, chat iâⁿ tī A-ló-el, tī Ga̍t soaⁿ-kok tiong ê siâⁿ ê chiàⁿ pêng kah Ia-chel sio-kīn,
24:6 Koh kàu Gi-lia̍t kah Tha-thim-ho͘t-sī ê tē, koh kàu Tan-iá-an, se̍h kàu Si-tòng,
24:7 koh kàu Tu-lô kian-kò͘ ê siâⁿ kah Hi-bī lâng í-ki̍p Ka-nân lâng só͘-ū ê siâⁿ, koh chhut-khì kàu Iô-tah lâm-hong ê Bel-sí-bah.
24:8 In piàn kiâⁿ choân tē, keng-kòe káu goe̍h-ji̍t koh jī-cha̍p kang, chiū tò-tńg kàu Ê-lú-sa-lèm.
24:9 Io-ap ēng sǹg jîn-bîn ê sò͘-gia̍h thêng-pò hō͘ ông chai. Gia̍h to ê ióng-sū, I-su-la-el lâng ū peh-cha̍p bān, Iô-tah lâng ū gō͘-cha̍p bān.
24:10 Ta-bi̍t tiám-sǹg jîn-bîn ê sò͘-gia̍h liáu-āu, sim chiū kakī chek-pī. Ta-bi̍t kā Siōng-chú kóng, " Góa kiâⁿ chit-ê tāichì tōa-tōa ū hoān chōe. Siōng-chú ah, kiû Lí tû-khì Lí ê lô͘-po̍k ê kòe-sit, in-ūi góa só͘ kiâⁿ ê sī chin gōng. "
24:11 Ta-bi̍t thiⁿ-kng chá-khí khí-.lâi ê sî, Siōng-chú ê ōe lîm-kàu sian-ti Ga̍t, to̍h-sī Ta-bi̍t ê sian-kiàn, kóng,
24:12 " Lí khì kā Ta-bi̍t kóng, Siōng-chú ánne kóng, ' Taⁿ Góa ēng saⁿ hāng hō͘ lí, lí kéng chi̍t hāng, góa thang tùi lí lâi kiâⁿ. '"
24:13 Ga̍t chiū lâi thong-ti Ta-bi̍t, tùi i kóng, " Lí kám ài lí ê tē ki-hng chhit nî? Á-sī ài lí ê tùi-te̍k jiok lí, lí tī i ê bīn-chêng tô-cháu saⁿ goe̍h-ji̍t? Á-sī ài un-e̍k tī lí ê tē saⁿ ji̍t kú? Taⁿ lí tio̍h chim-chiok siūⁿ khòaⁿ chi̍t-.ē, góa thang ēng siáⁿ-mi̍h ōe hôe-hok chhe góa lâi ê. "
24:14 Ta-bi̍t kā Ga̍t kóng, " Góa chin ûi-lân, lán lêng-khó hām-lo̍h tī Siōng-chú ê chhiú, in-ūi I ū hong-sēng ê liân-bín, góa m̄-goān hām-lo̍h tī lâng ê chhiú. "
24:15 Siōng-chú chiū kàng un-e̍k hō͘ I-su-la-el, tùi thàu-chá kàu só͘ tiāⁿ tio̍h ê sî, tùi Tàn kàu Bel-sí-bah, jîn-bîn tiong-kan sí chhit bān lâng.
24:16 Tng thiⁿ-sài chhun chhiú tī Ê-lú-sa-lèm, beh kā i bia̍t-tiāu ê sî, Siōng-chú chiū hō͘-hóe kàng-lo̍h chit-ê chai-hō, chiū kā bia̍t jîn-bîn ê thiⁿ-sài kóng, " Kàu-gia̍h à, kiu lí ê chhiú. " Hit sî, Siōng-chú ê sù-chiá tī I-é-bú-suh lâng A-láu-nah ê tiūⁿ-tiâⁿ.
24:17 Ta-bi̍t khòaⁿ tio̍h phah jîn-bîn ê thiⁿ-sài, chiū kā Siōng-chú kóng, " Lí khòaⁿ, hoān chōe ê sī góa, pōe-ge̍k ê mā sī góa; chóng-.sī, chiahê kui kûn ê iûⁿ ū chò siáⁿ-mi̍h? Goān Lí ê chhiú kong-kek góa kah goán pē ê ke. "
24:18 Hit ji̍t, Ga̍t lâi kìⁿ Ta-bi̍t, kā i kóng, " Lí chiūⁿ-.khì, tī I-é-bú-suh lâng A-láu-nah ê tiūⁿ-tiâⁿ, kā Siōng-chú khí chi̍t chō tôaⁿ. "
24:19 Ta-bi̍t chiàu Ga̍t ê ōe chiūⁿ-.khì, chiàu Siōng-chú ê bēng-lēng.
24:20 A-láu-nah teh khòaⁿ, khòaⁿ tio̍h ông kah i ê jîn-sîn tùi tùi-bīn lâi, A-láu-nah chiū chhut-.khì, phak tī thô͘-kha kā ông pài.
24:21 A-láu-nah kóng, " Góa ê chú — góa ê ông lâi lô͘-po̍k chia chhòng siáⁿ? " Ta-bi̍t kóng, " Góa lâi beh bé lí chit-ê tiūⁿ-tiâⁿ, kā Siōng-chú khí chi̍t chō tôaⁿ, hō͘ jîn-bîn tiong-kan ê un-e̍k soah-.khì. "
24:22 A-láu-nah kā Ta-bi̍t kóng, " Góa ê chú — góa ê ông, chiàu lí só͘ khòaⁿ-chò hó ê the̍h-lâi hiàn. Lí khòaⁿ, chia ū gû thang chò sio-chè, ū phah ngó͘-kok ê khì-kū kah thò gû ê ka-chhia thang chò chhâ.
24:23 Góa ê ông, A-láu-nah kā che it-chhè sàng hō͘ ông. " A-láu-nah koh kā ông kóng, " Goān Siōng-chú — lí ê Siōng-tè chiap-la̍p lí. "
24:24 Ông kā A-láu-nah kóng, " M̄-thang lah, góa ē chiàu kè-chîⁿ kā lí bé; góa bô ài ēng pe̍h-pe̍h tit tio̍h ê mi̍h chò sio-chè, hiàn hō͘ Siōng-chú góa ê Siōng-tè. " Ta-bi̍t chiū ēng gō͘-cha̍p si-khel ê gîn, bé hit-ê tiūⁿ-tiâⁿ kah gû.
24:25 Ta-bi̍t tī hia kā Siōng-chú khí chi̍t chō tôaⁿ, hiàn sio-chè kah siā-un-chè. Án-ne Siōng-chú thiaⁿ in ūi tē-hng só͘ kiû ê, un-e̍k tī I-su-la-el tiong chiū soah-.khì.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。