撒母耳記下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
19:1 Io-ap Khó͘-khǹg Ta-bi̍t
Ū lâng kā Io-ap kóng, " Lí khòaⁿ, ông ūi tio̍h Αp-sa-lôm thî-khàu pi-siong. "
19:2 Hit ji̍t ê tek-sèng piàn-chò chèng lâng ê pi-ai, in-ūi hit ji̍t jîn-bîn thiaⁿ tio̍h kóng, " Ông ūi tio̍h i ê kiáⁿ iu-būn. "
19:3 Hit ji̍t, jîn-bîn thau-thau-á ji̍p siâⁿ, chhin-chhiūⁿ tī tīn-.ni̍h tô-cháu kiàn-siàu ê jîn-bîn thau-thau-á ji̍p-.lâi.
19:4 Ông tà i ê bīn, ông tōa-siaⁿ háu, kóng, " Góa ê kiáⁿ Αp-sa-lôm! Αp-sa-lôm, góa ê kiáⁿ, góa ê kiáⁿ!. "
19:5 Io-ap ji̍p-khì chhù lāi kìⁿ ông kóng, " Lí kin-á-ji̍t hō͘ lí só͘-ū ê lô͘-po̍k bô thé-biān, in kin-á-ji̍t kiù lí ê sèⁿ-miā kah lí ê kiáⁿ-jî ê sèⁿ-miā, lí hiahê bó͘ ê sèⁿ-miā, lí hiahê sè-î ê sèⁿ-miā,
19:6 in-ūi oàn-hūn lí ê lí thiàⁿ i, thiàⁿ lí ê lí oàn-hūn i. Lí kin-á-ji̍t í-keng hián-bêng lí bô iàu-kín hiahê siú-léng kah jîn-sîn. Góa kin-á-ji̍t khòaⁿ-chhut, nā Αp-sa-lôm oa̍h-.leh, goán kin-á-ji̍t lóng sí, lí chiū hoaⁿ-hí.
19:7 Taⁿ lí tio̍h khí-lâi chhut-.khì, an-ùi lí ê lô͘-po̍k ê sim. Góa kí Siōng-chú lâi chiùchōa, lí nā bô chhut-.khì, kim-mê bô chi̍t-ê lâng ē kah lí tī-.leh; chit-ê chai-hō pí lí tùi siàu-liân kàu taⁿ só͘ tú-.tio̍h ê khah chhám! "
19:8 Ông chiū khí-.lâi, chē tī siâⁿ mn̂g-.ni̍h. Ū lâng kā chèng lâng kóng, " Lí khòaⁿ, ông chē tī siâⁿ mn̂g-.ni̍h. " Jîn-bîn chiū lóng lâi-kàu ông ê bīn-chêng. Ta-bi̍t Tńg-khì Ê-lú-sa-lèm
I-su-la-el lâng tô-cháu liáu-āu, ta̍k lâng tńg-khì i kakī ê pò͘-pêⁿ.
19:9 I-su-la-el chèng chi-cho̍k ê lâng hun-hun gī-lūn, kóng, " Ông bat kiù lán thoat-lī tùi-te̍k ê chhiú, koh kiù lán thoat-lī Hui-lī-sū lâng ê chhiú, taⁿ i siám-phiah Αp-sa-lôm cháu tī gōa-bīn.
19:10 Lán ēng iû boah Αp-sa-lôm lâi tī-lí lán, i í-keng tīn-bông. Lín taⁿ ná ē m̄ chhut chi̍t kù ōe, chhiáⁿ ông tńg-.lâi? "
19:11 Ta-bi̍t ông chhe lâng khì kìⁿ Cha-tok chè-si kah A-bi-a-thal, kóng, " Lín tio̍h kā Iô-tah ê tiúⁿ-ló kóng, ' I-su-la-el jîn-bîn í-keng ū ōe kàu tī ông, chhiáⁿ ông tńg-lâi i ê chhù, lín chhiáⁿ ông tńg-.lâi, ná ē chò lâng ê lō͘-bóe?
19:12 Lín sī góa ê hiaⁿ-tī, sī góa ê kut-jio̍k, chhiáⁿ ông tńg-.lâi, ná ē chò lâng ê lō͘-bóe? '
19:13 Mā kā A-ma-sa kóng, ' Lí kám m̄-sī góa ê kut-jio̍k? Góa nā bô siat-li̍p lí lâi thè Io-ap kú-tn̂g tī góa ê bīn-chêng chò kun-tiúⁿ, goān Siōng-chú ka-pōe kā góa chek-hoa̍t! '"
19:14 Chiū ánne, i chiū kám-kek Iô-tah kûn-chiòng ê sim, chhin-chhiūⁿ chi̍t-ê lâng ê sim. In chiū chhe lâng khì kìⁿ ông kóng, " Goān lí kah lí ê chèng jîn-sîn lóng tńg-.lâi. "
19:15 Ông chiū tńg-.lâi, lâi-kàu Iol-tàn. Iô-tah lâng lâi-kàu Gil-gal beh gêng-chiap ông, chhōa ông kòe Iol-tàn.
19:16 Ba-hu-lîm ê Biān-iá-mín lâng, Ge-la̍h ê kiáⁿ Si-mí kóaⁿ-kín kah Iô-tah lâng lo̍h-lâi gêng-chiap Ta-bi̍t ông.
19:17 Kah i lâi ê, ū chi̍t-chheng-ê Biān-iá-mín lâng, mā ū Sàu-lô ke ê lô͘-po̍k Chi-bah kah i cha̍p-gō͘-ê kiáⁿ, í-ki̍p jī-cha̍p-ê lô͘-po̍k, in lóng tī ông ê bīn-chêng kòe Iol-tàn.
19:18 Ū tō͘-chûn kòe-.khì, chài ông ê ka-koàn, chhut-chāi ông ēng. Ta-bi̍t Sià-bián Si-mí
Ông kòe Iol-tàn hô ê sî, Ge-la̍h ê kiáⁿ Si-mí chiū phak tī ông ê bīn-chêng,
19:19 kā ông kóng, " Góa ê chú — góa ê ông chhut Ê-lú-sa-lèm ê ji̍t, lí ê lô͘-po̍k chò pōe-ge̍k ê tāichì; taⁿ kiû góa ê chú m̄ thang kā góa chek-chōe, m̄ thang kì tiâu-.leh, ông mā m̄ thang hē tī sim-.ni̍h.
19:20 Lí ê lô͘-po̍k bêng-bêng chai-iáⁿ kakī ū chōe, só͘-í, Iô-sé-huh choân ke kin-á-ji̍t, góa tē-it tāi-seng lo̍h-lâi gêng-chiap góa ê chú — góa ê ông. "
19:21 Che-lú-iah ê kiáⁿ A-bi-sai kóng, " Si-mí bat chiù-chó͘ Siōng-chú só͘ boah iû ê, kám bián in-ūi ánne hō͘ i sí? "
19:22 Ta-bi̍t kóng, " Che-lú-iah ê kiáⁿ, góa kah lín ū siáⁿ-mi̍h khan-liân, hō͘ lín kin-á-ji̍t lâi hoán-tùi góa? Kin-á-ji̍t I-su-la-el tiong kám thang hō͘ lâng sí? Góa kám m̄-chai góa kin-á-ji̍t chò I-su-la-el ông? "
19:23 Chiū ánne, ông kā Si-mí kóng, " Lí m̄-bián sí. " Ông chiū tùi i chiùchōa.
19:24 Ta-bi̍t Un-thāi Me-hui-bo-siat
Sàu-lô ê sun Me-hui-bo-siat mā lo̍h-khì gêng-chiap ông, tùi ông chhut-khì ê ji̍t kàu ông pêng-an tńg-.lâi ê ji̍t, i lóng bô siu-chéng kha, mā bô siu-chéng chhùi-chhiu, mā bô sé saⁿ.
19:25 I tī Ê-lú-sa-lèm gêng-chiap ông ê sî, ông kā i kóng, " Me-hui-bo-siat, lí ná ē bô kah góa lo̍h-.khì? "
19:26 I ìn kóng, " Góa ê chú — góa ê ông, tong-sî lí ê lô͘-po̍k siūⁿ kóng, góa beh chún-pī lî-á, khiâ i kah ông chò-hóe khì, in-ūi lí ê lô͘-po̍k sī pái-kha, chóng-.sī, góa ê lô͘-po̍k phiàn góa,
19:27 koh tī góa ê chú — góa ê ông ê bīn-chêng húi-pòng lí ê lô͘-po̍k. Chóng-.sī, góa ê chú — góa ê ông chhin-chhiūⁿ Siōng-chú ê sù-chiá, chiàu lí só͘ khòaⁿ-chò hó ê chiàu ánne khì chò.
19:28 In-ūi góa ê chó͘-sian choân ke, tī góa ê chú — góa ê ông ê bīn-chêng, lóng sī tio̍h sí ê lâng, chóng-.sī, lí hō͘ lí ê lô͘-po̍k kah lí chi̍t toh ê lâng chò-hóe chia̍h, góa iáu ū siáⁿ-mi̍h lí-iû thang koh tùi ông kiû-kiò? "
19:29 Ông tùi i kóng, " Lí ná ē koh kóng lí ê tāichì? Góa kóng, lí kah Chi-bah tio̍h pêⁿ-pun hiahê sán-gia̍p. "
19:30 Me-hui-bo-siat kā ông kóng, " Góa ê chú — góa ê ông í-keng pêng-an tńg-lâi kiong lāi, chhut-chāi i lóng the̍h-khì mā thang. "
19:31 Ta-bi̍t Un-thāi Bal-chi-lâi
Gi-lia̍t lâng Bal-chi-lâi tùi Lô-ki-lîm lo̍h-.lâi, beh sàng ông kòe Iol-tàn hô, i chiū kah ông kòe Iol-tàn hô.
19:32 Bal-chi-lâi chin lāu, í-keng peh cha̍p hòe. Ông tòa tī Ma-há-niam ê sî, i ēng chia̍h-mi̍h kiong-kip ông, in-ūi i sī tōa hó-gia̍h lâng.
19:33 Ông kā Bal-chi-lâi kóng, " Lí kah góa kòe-khì kah góa tòa tī Ê-lú-sa-lèm, góa ē kiong-kip lí. "
19:34 Bal-chi-lâi kā ông kóng, " Góa ê sèⁿ-miā iáu ū kúi nî, kúi ji̍t, thang hō͘ góa kah ông chò-hóe chiūⁿ Ê-lú-sa-lèm?
19:35 Góa hiān-kim í-keng peh cha̍p hòe à, kám iáu ē hun-pia̍t hó-pháiⁿ? Lí ê lô͘-po̍k kám iáu ē chhì-thàm lim-chia̍h ê chu-bī? Chhiùⁿ koa ê lâm-lí góa kám ē-hiáu thiaⁿ in ê siaⁿ-im? Lô͘-po̍k ná thang thoa-lūi góa ê chú — góa ê ông?
19:36 Lí ê lô͘-po̍k chí ū sī beh kah ông kòe Iol-tàn chi̍t-chām-á, ông ná tio̍h ēng chit-ê pò-siúⁿ hō͘ góa?
19:37 Kiû lí chún lí ê lô͘-po̍k tńg-.khì, hō͘ góa thang sí tī góa ê pún-siâⁿ, góa ê pē-bú ê bōng hia. Lí khòaⁿ, lí ê lô͘-po̍k Kim-hám tī chia, hō͘ i kah góa ê chú — góa ê ông kòe-.khì, chiàu lí só͘ khòaⁿ-chò hó ê lâi kā i khoán-thāi. "
19:38 Ông kóng, " Kim-hám thang kah góa-.khì, góa ē chiàu lí só͘ khòaⁿ-chò hó ê lâi kā i khoán-thāi, lí kiàn-nā ū tùi góa kiû ê, góa ē kā lí chiâⁿ. "
19:39 Chiū ánne, chèng lâng kòe Iol-tàn hô, ông mā kòe-.khì. Ông chiū kah Bal-chi-lâi chim-chhùi, kā i chiok-hok; i chiū tńg-khì i ê pún só͘-chāi.
19:40 Iô-tah kah I-su-la-el Ūi tio̍h Ông Khí Hun-cheng
Chiū ánne, ông kòe-.khì, lâi-kàu Gil-gal, Kim-hám mā kah i kòe-.khì. Iô-tah chèng lâng kah I-su-la-el jîn-bîn ê chi̍t-pòaⁿ, mā lóng sàng ông kòe-.khì.
19:41 I-su-la-el jîn-bîn lâi kìⁿ ông, kā i kóng, " Goán ê hiaⁿ-tī Iô-tah lâng án-chóaⁿ thau-thau-á lâi chhōa ông kah i ê ka-koàn í-ki̍p kin-tòe Ta-bi̍t ê lâng, lóng chò-hóe kòe-khì Iol-tàn hô? "
19:42 Iô-tah kûn-chiòng ìn I-su-la-el lâng, kóng, " In-ūi ông kah goán sī tâng-chong, lín án-chóaⁿ in-ūi chit-ê tāichì siū-khì? Goán kám bat chia̍h tio̍h ông siáⁿ-mi̍h? Ông kám bat ēng siáⁿ-mi̍h sàng goán? "
19:43 I-su-la-el lâng ìn Iô-tah lâng kóng, " Chiàu chi-cho̍k, chit-ê ông goán ū cha̍p hūn, goán tùi Ta-bi̍t pí lín khah ū koan-hē. Lín án-chóaⁿ khòaⁿ-khin goán, chhōa goán ê ông tńg-.lâi, ná-bô tāi-seng kah goán chham-siông? " Chóng-.sī, Iô-tah lâng ê ōe pí I-su-la-el lâng ê ōe khah ngē.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。