撒母耳記下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
18:1 Αp-sa-lôm Pāi-bông
Ta-bi̍t tiám-sǹg tòe i ê jîn-bîn, siat-li̍p iâⁿ-tiúⁿ kah liân-tiúⁿ lâi chhōa in.
18:2 Ta-bi̍t chhe jîn-bîn chhut-.khì, saⁿ-hūn chi-it kau Io-ap ê chhiú, saⁿ-hūn chi-it kau Che-lú-iah ê kiáⁿ — Io-ap ê hiaⁿ-tī A-bi-sai ê chhiú, saⁿ-hūn chi-it kau Gat lâng It-thai ê chhiú. Ông kā jîn-bîn kóng, " Góa it-tēng kah lín chhut-.khì. "
18:3 Chóng-.sī, jîn-bîn kóng, " Lí m̄ thang chhut-.khì. Nā-sī goán tô-cháu, tùi-te̍k bô lia̍h goán chò iàu-kín; goán nā tīn-bông chi̍t-pòaⁿ, tùi-te̍k mā bô lia̍h goán chò iàu-kín, in-ūi lí chi̍t-ê lâng ē tòng-tit goán chi̍t bān lâng, lí tùi siâⁿ lāi pang-chān goán khah hó. "
18:4 Ông kā in kóng, " Lín só͘ khòaⁿ-chò hó ê, góa ē chiàu ánne khì chò." Chiū ánne, ông khiā tī siâⁿ mn̂g piⁿ, jîn-bîn ū ê chi̍t pah, ū ê chi̍t chheng, chiàu chhù-sū chhut-.khì.
18:5 Ông bēng-lēng Io-ap, A-bi-sai kah It-thai, kóng, " Lín tài tio̍h góa ê chêng, khoán-thāi hit-ê siàu-liân lâng Αp-sa-lôm tio̍h khah khoan-iông. " Ông ūi tio̍h Αp-sa-lôm bēng-lēng hiahê siú-léng ê ōe, jîn-bîn lóng ū thiaⁿ-.tio̍h.
18:6 Jîn-bîn chiū chhut-khì chhân-iá tí-te̍k I-su-la-el lâng, tī E-hu-laim ê chhiū-nâ kau-chiàn.
18:7 Tī hia, I-su-la-el lâng tī Ta-bi̍t hiahê lô͘-po̍k ê bīn-chêng thâi-su, hit ji̍t tīn-bông ê chin chē, chóng-kiōng ū nn̄g bān lâng.
18:8 In-ūi chiàn-tīn sòaⁿ chin khui, piàn-piàn tī hit só͘-chāi, chhiū-nâ só͘ thun-bia̍t ê, pí hō͘ to só͘ thun-bia̍t ê khah chē.
18:9 Αp-sa-lôm ngó͘-jiân tú tio̍h Ta-bi̍t ê lô͘-po̍k. Αp-sa-lôm khiâ i ê lô, lô cháu tùi tōa châng siōng chhiū ām ê chhiū-ki ē-bīn keng-kòe, i ê thâu-khak kùi tio̍h siōng chhiū, tiàu tī pòaⁿ khong-tiong, só͘ khiâ ê lô chò i khì.
18:10 Ū chi̍t-ê lâng khòaⁿ-.tio̍h, chiū kā Io-ap kóng, " Góa khòaⁿ tio̍h Αp-sa-lôm kùi tī siōng chhiū-.ni̍h. "
18:11 Io-ap kā pò i ê lâng kóng, " Lí í-keng khòaⁿ-.tio̍h, ná ē m̄ tùi hia kā i phah, hō͘ i tūi-lo̍h tē? Góa chiū siúⁿ lí cha̍p-ê gîn kah chi̍t tiâu io-tòa. "
18:12 Hitê lâng kā Io-ap kóng, " Góa to̍h-sī tit tio̍h chi̍t chhìn gîn tī góa ê chhiú, mā m̄-káⁿ chhun chhiú hāi-sí ông ê kiáⁿ; in-ūi goán thiaⁿ tio̍h ông bēng-lēng lí kah A-bi-sai, It-thai, kóng, ' Lín tio̍h sè-jī, m̄ thang hāi hit-ê siàu-liân lâng Αp-sa-lôm. '
18:13 Góa nā lāmsám chò, lâi hāi i ê sèⁿ-miā, bô chi̍t hāng ē môa-tit ông, lí chiū ē khiā tī piⁿ-á m̄-chhap góa. "
18:14 Io-ap kóng, " Góa m̄ thang kah lí iân-chhiân. " Io-ap chhiú gia̍h saⁿ ki té-chhiuⁿ, hit sî Αp-sa-lôm tiàu tī siōng chhiū téng, iáu oa̍h-.leh, chiū chha̍k-thàu i ê sim.
18:15 Kā Io-ap gia̍h ke-si ê siàu-liân lâng cha̍p-ê, ûi Αp-sa-lôm phah hō͘ i sí.
18:16 Io-ap pûn sàu-kak, jîn-bîn chiū tńg-.lâi, bô koh jiok I-su-la-el lâng, in-ūi Io-ap chó͘-chí jîn-bîn.
18:17 In kā Αp-sa-lôm hiat tī chhiū-nâ lāi chi̍t-ê tōa chhim kheⁿ, téng-bīn thia̍p chi̍t tōa-tui ê chio̍h-thâu. I-su-la-el jîn-bîn ta̍k-ê lóng cháu tńg-khì in ê pò͘-pêⁿ.
18:18 Αp-sa-lôm oa̍h-.leh ê sî, tī ông ê soaⁿ-kok ūi kakī khiā chi̍t ki thiāu, in-ūi i kóng, " Góa bô kiáⁿ thang lâu góa ê miâ. " Chiū ēng kakī ê miâ chheng hit ki thiāu, kàu kin-á-ji̍t kiò-chò Αp-sa-lôm ê kì-liām pi.
18:19 Ta-bi̍t Thiaⁿ tio̍h Αp-sa-lôm ê Sí-bông
Cha-tok ê kiáⁿ A-hi-mâ-chu kóng, " Chún góa cháu-khì pò siau-sit hō͘ ông, to̍h-sī Siōng-chú ū án-chóaⁿ tùi i ê tùi-te̍k pò-siû. "
18:20 Io-ap kā i kóng, " Lí kin-á-ji̍t m̄ thang khì pò siau-sit, pa̍t-ji̍t lí chiah thang khì pò siau-sit; chóng-.sī, kin-á-ji̍t lí m̄ thang pò siau-sit, in-ūi ông ê kiáⁿ í-keng sí. "
18:21 Io-ap kā Ku-si lâng kóng, " Lí khì kā lí só͘ khòaⁿ tio̍h ê kā ông kóng. " Ku-si lâng tùi Io-ap kiok-kiong kiâⁿ-lé, chiū cháu-.khì.
18:22 Cha-tok ê kiáⁿ A-hi-mâ-chu koh kā Io-ap kóng, " Bô-lūn án-chóaⁿ, kiû lí chún góa tòe Ku-si lâng khì. " Io-ap kóng, " Góa ê kiáⁿ, lí lâi pò siau-sit, kì-jiân bē tàng siúⁿ, án-chóaⁿ ài lī-khui? "
18:23 I koh kóng, " Bô-lūn án-chóaⁿ, góa beh lī-khui. " Io-ap kóng, " Chò lí khì. " A-hi-mâ-chu chiū tùi pêng-goân ê lō͘ lī-khui khì, kiâⁿ tī Ku-si lâng ê thâu-chêng.
18:24 Ta-bi̍t tú-á chē tī mn̂g ê siâⁿ chhiûⁿ ê tiong-kan, siú-bōng ê lâng peh-chiūⁿ siâⁿ chhiûⁿ, kàu siâⁿ mn̂g ê lâu-téng, gia̍h thâu koan-khòaⁿ, khòaⁿ tio̍h chi̍t-ê lâng toaⁿ-sin cháu-.lâi.
18:25 Siú-bōng ê lâng kiò i lâi kā ông kóng. Ông kóng, " I nā kakī lâi, it-tēng ū siau-sit beh pò. " I ná cháu ná kīn óa-.lâi.
18:26 Siú-bōng ê lâng koh khòaⁿ tio̍h chi̍t-ê lâng cháu-.lâi, siú-bōng ê lâng kā kò͘ siâⁿ mn̂g ê lâng kóng, " Lí khòaⁿ, ū chi̍t-ê lâng toaⁿ-sin cháu-.lâi. " Ông kóng, " Che mā sī pò siau-sit ê. "
18:27 Siú-bōng ê lâng kóng, " Góa khòaⁿ tio̍h thâu-chêng teh cháu ê chhin-chhiūⁿ Cha-tok ê kiáⁿ A-hi-mâ-chu teh cháu ê khoán. " Ông kóng, " I sī hó lâng, lâi pò hó siau-sit. "
18:28 A-hi-mâ-chu tùi ông tōa-siaⁿ hoah, " Pêng-an à! " Chiū tī ông ê bīn-chêng phak tī thô͘-kha pài, kóng, " Siōng-chú — lí ê Siōng-tè sī eng-kai tio̍h oló ê, in-ūi I í-keng kā hiahê khí chhiú kong-kek góa ê chú — góa ê ông ê lâng kau hō͘ lí. "
18:29 Ông kóng, " Siàu-liân lâng Αp-sa-lôm pêng-aná bô? " A-hi-mâ-chu ìn kóng, " Io-ap chhe ông ê lô͘-po̍k kah lí ê lô͘-po̍k, hit sî góa khòaⁿ tio̍h tōa hán-hoah, m̄-chai sī siáⁿ-mi̍h tāichì. "
18:30 Ông kóng, " Lí kiâⁿ-khui, khiā tī piⁿ-á. " I chiū kiâⁿ-khui, tī hia khiā-.leh.
18:31 Ku-si lâng mā kàu, Ku-si lâng kóng, " Ū siau-sit pò hō͘ góa ê chú — góa ê ông! Siōng-chú kin-á-ji̍t tùi só͘-ū heng khí-lâi kong-kek lí ê lâng thè lí pò-siû.
18:32 Ông kā Ku-si lâng kóng, " Siàu-liân lâng Αp-sa-lôm pêng-an bô? " Ku-si lâng ìn kóng, " Goān góa ê chú — góa ê ông ê tùi-te̍k kah it-chhè heng-khí kong-kek lí beh hāi lí ê lâng, lóng chhin-chhiūⁿ hit-ê siàu-liân lâng ánne. "
18:33 Ông chiū put-chí siong-sim, peh khí-lih siâⁿ mn̂g téng ê lâu thî-khàu, ná kiâⁿ ná-kóng, " Góa ê kiáⁿ Αp-sa-lôm, góa ê kiáⁿ, góa ê kiáⁿ, Αp-sa-lôm! Góa hūn bē tàng thè lí sí, Αp-sa-lôm! Góa ê kiáⁿ! Góa ê kiáⁿ! "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。