撒母耳記下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
14:1 Io-ap An-pâi Αp-sa-lôm Tńg-.lâi
Che-lú-iah ê kiáⁿ Io-ap chai-iáⁿ ông ê sim ì-hiòng Αp-sa-lôm,
14:2 chiū chhe lâng khì The-ko-oah, tùi hia kiò chi̍t-ê chhong-bêng ê chabó͘ lâng lâi, kā i kóng, " Chhiáⁿ lí ké-chò tòa hà ê, chhēng hàu saⁿ, m̄ thang ēng iû boah seng-khu, tio̍h chng chò ūi tio̍h sí-lâng chin kú pi-ai ê chabó͘ lâng,
14:3 ji̍p-khì kìⁿ ông, chiàu chit-ê khoán tùi i ánne kóng. " Io-ap chiū kā só͘ tio̍h kóng ê ōe kà chabó͘ lâng kóng.
14:4 The-ko-oah ê chabó͘ lâng tùi ông kóng ê sî, bīn phak tī thô͘-kha, pài kóng, " Ông, kiù góa. "
14:5 Ông mn̄g i kóng, " Lí ū siáⁿ-mi̍h tāichì? " I ìn kóng, " Góa si̍t-chāi sī kóaⁿ-hū, góa ê tiōng-hu í-keng sí.
14:6 Lú-pī ū nn̄g-ê kiáⁿ, in nn̄g-ê tī chhân-.ni̍h sio-phah, bô lâng tī in tiong-kan pâi-kái, chit-ê phah hit-ê hō͘ i sí.
14:7 Taⁿ choân ke ê lâng lóng khí-lâi kong-kek lí ê lú-pī, kóng, ' Lí tio̍h kā hit-ê phah-sí hiaⁿ-tī ê kau chhut-.lâi, goán thang hō͘ i sí, pôe i phah-sí hiaⁿ-tī ê sèⁿ-miā, choa̍t i ê hō͘-sû. ' Án-ne, in ē kā góa chhun lo̍h-.lâi ê hóe-thòaⁿ phah-hoa, bô hō͘ góa ê tiōng-hu lâu-miâ lâu kiáⁿ-sun tī sè-kan. "
14:8 Ông kā chabó͘ lâng kóng, " Lí thang tńg-khì lín tau, góa ē ūi tio̍h lí chhut bēng-lēng. "
14:9 The-ko-oah ê chabó͘ lâng koh kā ông kóng, " Góa ê chú — góa ê ông, goān chit-ê chōe kui tī góa kah góa ê pē ê ke, ông kah i ê ūi lóng bô chōe. "
14:10 Ông kóng, " Kiàn-nā ū kah lí ke kóng-ōe ê, lí chiū chhōa i lâi-kàu góa chia, i chiū bē koh khì kāng lí. "
14:11 Cha-bó͘ lâng kóng, " Goān ông kì-liām Siōng-chú — lí ê Siōng-tè, m̄ thang chún pò-siû ê kiâⁿ bia̍t-bông, khióng-kiaⁿ in bia̍t-bông góa ê kiáⁿ. " Ông kóng, " Góa kí éng-oán oa̍h ê Siōng-chú lâi chiùchōa, lí ê kiáⁿ liân chi̍t ki thâu-mn̂g mā bē ka-la̍uh tī tē-.ni̍h. "
14:12 Cha-bó͘ lâng kóng, " Kiû lí iông-ín lí ê lú-pī tùi góa ê chú — góa ê ông koh kóng chi̍t kù ōe. " Ông kóng, " Chò lí kóng. "
14:13 Cha-bó͘ lâng kóng, " Lí ná ē siūⁿ ánne lâi kong-kek Siōng-chú ê chú-bîn? Ông kóng chit-ê ōe, chhin-chhiūⁿ ū chōe, in-ūi ông bô hō͘ i ê tô-miā ê tò tńg-.lâi.
14:14 In-ūi lán lóng it-tēng tio̍h sí, chhin-chhiūⁿ chúi phoah tī tē-.ni̍h, bē tàng koh siu tò tńg-.lâi. Chóng-.sī, Siōng-chú bô chhiúⁿ lâng ê sèⁿ-miā, sī siat-hoat hō͘ tô-miā ê lâng bián siū kóaⁿ-chhut lâi lī-khui I.
14:15 Góa lâi kā chit-ê ōe kā góa ê chú — góa ê ông kóng, sī in-ūi jîn-bîn hō͘ góa kiaⁿ-hiâⁿ. Só͘-í, lú-pī kóng, taⁿ góa beh kā ông kóng, kiámchhái ông ē chiâⁿ lú-pī ê só͘ kiû.
14:16 Lâng ē kā góa kah góa ê kiáⁿ tùi Siōng-chú ê sán-gia̍p chò chi̍t-ē tû-bia̍t, chóng-.sī, ông ē thiaⁿ, kiù I ê lú-pī thoat-lī hit-ê lâng ê chhiú. "
14:17 Lú-pī koh kóng, goān góa ê Chú — góa ê ông ê ōe lâi an-ùi góa, in-ūi góa ê Chú — góa ê ông ē hun-pia̍t sī-hui, chhin-chhiūⁿ Siōng-chú ê sù-chiá, to̍k-to̍k goān Siōng-chú — lí ê Siōng-tè kah lí tông-chāi! "
14:18 Ông ìn chabó͘ lâng kóng, " Góa kiàn-nā só͘ beh mn̄g lí ê, lóng m̄ thang tùi góa ún-ba̍t. " Cha-bó͘ lâng kóng, " Goān góa ê chú — góa ê ông kóng chhut-.lâi. "
14:19 Ông kóng, " Chiahê kám m̄-sī Io-ap kah lí thò ōe ê? " Cha-bó͘ lâng kóng, " Góa ê chú — góa ê ông, góa kí lí ê oa̍h-miā lâi chiùchōa, góa ê chú — góa ê ông só͘ kóng ê, bô lâng ē phian chó á phian iū lâi siám-phiah. In-ūi lí ê lô͘-po̍k Io-ap hoan-hù góa, ēng chiahê ōe lóng kà lí ê lú-pī kóng.
14:20 Lí ê lô͘-po̍k Io-ap ánne chò, sī beh hō͘ chit-ê tāichì se̍h tńg oan; góa ê chú ū tì-hūi, chhin-chhiūⁿ Siōng-chú sù-chiá ê tì-hūi, ē bêng-chhat sè-chiūⁿ it-chhè ê tāichì. "
14:21 Ông kā Io-ap kóng, " Góa it-tēng chò chit-ê tāichì, taⁿ lí tio̍h khì, chhōa hit-ê siàu-liân lâng Αp-sa-lôm tò tńg-.lâi. "
14:22 Io-ap phak tī thô͘-kha lâi pài, kā ông chiok-siā, Io-ap kóng, " Góa ê chú — góa ê ông, ông kì-jiân kiâⁿ lí ê lô͘-po̍k só͘ kiû ê, kin-á-ji̍t lí ê lô͘-po̍k chai-iáⁿ góa ū tī lí ê ba̍k-chiu chêng tit tio̍h un-tián. "
14:23 Chiū ánne, Io-ap chhut-hoat khì Ge-siul, chhōa Αp-sa-lôm lâi-kàu Ê-lú-sa-lèm.
14:24 Ông kóng, " Kiò i tńg-khì i ê chhù, m̄ thang kìⁿ góa ê bīn. " Αp-sa-lôm chiū tńg-khì i ê chhù, bô kìⁿ ông ê bīn.
14:25 Ta-bi̍t kah Αp-sa-lôm Hô-hó
Αp-sa-lôm seⁿ-chò chin hó khòaⁿ, choân I-su-la-el tiong bô lâng chhin-chhiūⁿ i hiah tit tio̍h lâng oló, tùi kha-té kàu thâu-khak téng lóng bô khoat-tiám.
14:26 I chián thâu-mn̂g ê sî, chhìn i ê thâu-mn̂g, chiàu ông ê chhìn-á, tāng nn̄g pah si-khel; i tī ta̍k-ê nî bóe chián thâu-mn̂g, in-ūi i ê thâu-mn̂g chin tāng, só͘-í, tio̍h chián.
14:27 Αp-sa-lôm seⁿ saⁿ-ê kiáⁿ kah chi̍t-ê chabó͘ kiáⁿ. Cha-bó͘ kiáⁿ miâ kiò-chò Tha-mal, sī chi̍t-ê bīn-māu chin súi ê chabó͘ gín'á.
14:28 Αp-sa-lôm tòa tī Ê-lú-sa-lèm móa nn̄g nî, lóng bô kìⁿ ông ê bīn.
14:29 Αp-sa-lôm chhe lâng khì kiò Io-ap, beh chhe i khì kìⁿ ông, chóng-.sī, Io-ap m̄-khéng lâi i hia. I tē-jī pái chhe lâng khì kiò i, i iû-goân m̄ lâi.
14:30 Só͘-í, Αp-sa-lôm tùi i ê lô͘-po̍k kóng, " Lín khòaⁿ, Io-ap ê hn̂g kīn góa ê hn̂g, i ū tōa-be̍h tī hia, lín khì kā i pàng hóe sio. " Αp-sa-lôm ê lô͘-po̍k chiū khì pàng hóe sio.
14:31 Io-ap chiū lâi-kàu Αp-sa-lôm ê chhù, mn̄g i kóng, " Lí ê lô͘-po̍k ná ē pàng hóe sio góa ê hn̂g? "
14:32 Αp-sa-lôm ìn Io-ap kóng, " Góa chhe lâng khì kiò lí lâi góa chia, hō͘ góa thang chhe lí khì kìⁿ ông, kā i kóng, ' Góa ná tio̍h tùi Ge-siul tńg-.lâi? Góa put-jû iû-goân tòa hia. ' Taⁿ tio̍h chún góa kìⁿ ông ê bīn, góa nā ū chōe, i thang thâi góa. "
14:33 Io-ap chiū khì kìⁿ ông, kā i kóng. Ông kiò Αp-sa-lôm lâi, Αp-sa-lôm chiū lâi kìⁿ ông, tī ông ê bīn-chêng phak tī thô͘-kha, ông chiū chim Αp-sa-lôm.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。